Нам нема да ни пречи доколку Европската Унија посвети поголемо, посериозно и поиздржано внимание за спорот со името.

Нам нема да ни пречи доколку Европската Унија посвети поголемо, посериозно и поиздржано внимание за спорот со името. Ова денеска во Скопје го изјави шефот на дипломатијата Антонио Милошоски по работниот ручек на Претседателот Ѓорге Иванов со амбасадорите на земјите од Вишеградската група – Словачка, Полска и Унгарија. „Нам не би ни пречело ако ЕУ како целина посвети  поголемо внимание. Но, тоа внимание да биде поголемо, посериозно и поиздржано од оние билатерални дневни посети, укажувања и совети кои што ги имаме понекогаш во однос на билатералното прашање со Република Грција“, изјави министерот Милошоски, дополнувајќи дека по донесувањето на Лисабонскиот договор, постои поголем капацитет Унијата да се занимава со прашањата што се од европски интерес. Милошоски од претстојната посета на Нимиц очекува „нова динамика“ во разговорите за името. Смета дека ова е вистински момент за забрзување на овие разговори. Критикувајќи го честото истакнување на „црвените линии“ од страна на Грција, најави конструктивност од македонска страна при посетата на Нимиц. „Ние ќе понудиме добро расположение, добра волја, решителност, иницијативи за зголемена билатерална соработка и комуникации. Сметаме дека во едни такви подобрени околности можеме да направиме напредок во ова билатерално прашање“, рече Милошоски. Прашањето за името и евро-атлантската интеграција на Македонија биле дел од разговорите на денешниот работен ручек на Претседателот Иванов со амбасадорите од трите земји. “Ние не се обидуваме да даваме сугестии на Македонија како да го разреши прашањето со името, но препорачавме да се искористи времето во следните месеци за да се најде решение и да започнат вистинските преговори со ЕУ“, изјави по средбата унгарскиот амбасадор Ференц Кекеши. Амбасадорите на земјите од Вишеградската група го информирале Претседателот Иванов за приоритетните проекти, меѓу кои е интегрирањето на регионот на Југоисточна Европа во европските и евроатланските структури.

Амбасадорите го посочиле искуството на нивните земји како позитивен пример на меѓусебна соработка, и меѓусебна поддршка во процесот на интегрирање во Унијата и во НАТО, пример што е важен и за регионов.

На средбата било констатирано дека зајакнатата европска и евроатланска перспектива е клучен предуслов за натамошен напредок во регионот. /крај/ач