Македонија
АРМ побогата за 25 потпоручници, нова класа од 29 питомци на Воената академија

На денешната свеченост во Воената академија „Генерал Михаило Апостолски“ во Скопје, промовирани во потпоручници беа 35 питомци, од кои 25 во редовите на Армијата на Република Македонија, по три за вооружените сили на Црна Гора и Босна и Херцеговина, и четири за Косово.
Свечена заклетва, пак, додоа 29 питомци, од 20. класа на Воената академија, која повторно ја задржа својата регионална димензија – 20 од нив се запотребите на Армијата на Република Македонија, четворица за Босна и Херцеговина, тројца за Црна Гора и двајца за Косово.
Министерот за одбрана Зоран Јолевски, во своето обраќање посочи дека високото образование на секој млад човек претставува незаборавен период посветен на стекнување знаења и вештини, но и стекнување на долготрајни пријателства. „На Воената академија имате неповторлива можност да учите од најдобрите професори и инструктори, да се стекнете со најсовремените знаења и вештини и да се оспособите за критичко размислување“, додаде министерот. Тој рече дека стекнатите лидерски способности се потребни на земјите од кои доаѓаат питомците, кои седејќи заедно во исти клупи придонесуваат и кон зајакнување на соработката и мирот во регионот.
Јолевски посочи дека военото образование е приоритет за Министерството и Армијата и во тој контекст спомена дека веќе започна да се применува размената на студенти со воените универзитети на земјите членки на НАТО. „Минатата година ја имавме првата група на двајца студенти кои што поминаа еден семестар на универзитетот ’Норвич’, а оваа година добивме понуда за пет студенти да поминат еден семестар на Западниот универзитет во Ново Мексико, САД“,информираше министерот.
Деканот на Воената академија, полковникот Орце Поповски наброја дел од успесите на Академијата во изминатата година, меѓу кои и фактот дека за прв пат функционирале трите циклуси на студии, како и дека со поддршка на Министерството и Генералштабот на АРМ успешно бил реализиран седмиот меѓународен „Летен кампус“ со учество на над 200 питомци и студенти од рекорден број држави досега.
Претставниците од Црна Гора, Босна и Херцеговина и Косово се заблагодарија за можноста нивни питомци да се школуваат на Воената академија и посочија дека со тоа се потврдува реномето на академијата како врвна високообразовна институција во регионални рамки, чии студии се базираат исклучиво на квалитет, знаење и дисциплина./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја делови од Кисела Вода

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, дел од корисниците од ул. 1523, објектите на фирмите Пастор, Орнамакс и други во нивна близина, корисниците од бул. Борис Трајковски од бр. 77 до бр. 85, како и корисниците лоцирани помеѓу објектите на фирмите Циле Инжињеринг и Интеграф. (општина Кисела Вода)
Македонија
Шукова: Време е за резултати, уреден Бутел, нови паркови, подобар превоз и вода за сите

Кандидатката за градоначалник на Град Скопје од СДСМ, Каја Шукова, вчера одржа митинг во Бутел, каде пред жителите порача дека Скопје мора да се гради со дела, а не со празни зборови.
„Вечерва не сум тука само како кандидатка за градоначалничка на Скопје. Тука сум, пред сè, како човек што верува во овој град и во луѓето што го прават Бутел дом,“ изјави Шукова.
Таа се осврна на реалните проблеми со кои се соочува општината запуштеното корито на Серава, недоволната инфраструктура, недостигот на јавен превоз и дотраената водоводна мрежа и истакна дека решенијата веќе се подготвени.
„Серава ќе стане место на кое ќе се гордееме уредено корито, пешачки и велосипедски патеки, зелена зона за сите. Новите паркови и 10.000 засадени дрвја ќе го вратат сјајот што Скопје го имаше пред децении,“ нагласи таа.
Посебен акцент стави и на водоснабдувањето и инфраструктурата:
„Денес, 60 проценти од питката вода се губи во системот. Време е за модернизација и стабилно снабдување со вода за секој дом. Новите мостови, клучки и булевари ќе го поврзат Бутел со целиот град и ќе овозможат безбедно и побрзо движење,“ рече Шукова.
Таа потсети дека во изминатите години градот беше заложник на неработење и популизам:
„Четири години ВМРО-ДПМНЕ ги запоставуваше општините. Време е за резултати, а не за слики и празни зборови. Половина од нашите проекти може веднаш да се реализираат,“ додаде таа.
Во својот говор, Шукова повика на единство и одговорност:
„Бутел не смее да биде изолиран. Бутел е почетна точка на модерното Скопје место каде што се инвестира, се гради и се слуша секој граѓанин.“
Македонија
Претежно облачно со врнежи од дожд, повремено пообилни

Времето денеска ќе биде претежно облачно со повремени врнежи од дожд кои ќе бидат пообилни во западните делови, каде се очекува локално да наврнат и над 25 l/m²дожд. Ќе дува слаб до умерен ветер од југоисточен правец.
Минималната температура ќе биде во интервал од 7 до 12, а максималната ќе достигне од 11 до 15 степени.
Во Скопје, претежно облачно со повремени врнежи од дожд, повремено пообилни. Ќе дува слаб до умерен ветер од југоисточен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Во сабота времето ќе биде променливо облачно со повремени локални врнежи од дожд со послаб интензитет. Потоа следува претежно стабилно време со потпросечни температури за овој период од годината.