Македонија
АВМУ ги одби телевизиите за следење на работата на порталите

Советот на Агенцијата за аудио и аудиовизуелни медиуми ја усвои во петокот методологијата која ќе се применува за набљудување на известувањето на радиодифузерите во предизборниот период и притоа го отфрли барањето на Македонската медиумска асоцијација со методологијата да се определи дека ќе се набљудува работата и на интернет порталите, како што е предвидено со изборниот законик.
Претходно во вторникот кога беше претставена нацрт-методологијата за мониторинг на изборното медиумско претставување преку радио и телевизиските програмски сервиси за предвремените парламентарни избор кои би требало да се одржат до крајот на годината, петте најголеми телевизии во земјата побараа Агенцијата да го почитува и делот на Законот кој предвидува да се набљудува работата на интернет порталите.
„Кога станува збор за барањето на повеќе заинтересирани страни да се врши мониторинг и на електронските публикации, односно порталите, мораме да кажеме дека Агенцијата не го прифаќа ова барање. Не дека Агенцијата ја избегнува обврската или дека нема стручни капацитети за вршење мониторинг, меѓутоа за да се врши мониторинг на спроведувањето на одредбите од изборниот законик кај електронските публикации неопходни се претходно соодветни законски измени“, рече директорот на АВМУ Зоран Трајчевски.
Изборниот законик предвидува дека и интернет порталите мора да бидат подложни на идентични проверки како и телевизиите и радио станиците. Методологијата, за која стручните служби во АВМУ велат дека е подготвена врз францускиот модел, предвидува оценување на известувањето на медиумите врз основа на квантитативни и квалитативни оцени. Во квантитативниот дел, методологијата предвидува дека медиумите треба за партиите од опозицијата да издвојат најмалку половина од времето кое ќе биде одвоено за партиите од власта и за носителите на јавни функции.
Емилија Јаневска од Секторот за програмски работи на АВМУ изјави дека не е возможно да се бара издвојување еднакво време за кандидатите на позицијата и носителите на државни функции, од една страна, и за опозицијата, од друга страна, поради потребата на медиумите да известат за дејствувањето на државните институции.
Членови на Советот оценија дека со оваа одредба ќе се постигне зголемена застапеност на опозициските претставници во информативните програми, која ќе биде во пропорција со застапеноста на прилозите со кои се информира за настаните од јавен интерес и активностите на позицијата. Членовите на Советот, исто така, по претходна консултација со стручните служби, прифатија одреден број технички измени на методологијата.
Одбиени беа предлозите периодот во кој ќе се оценува дали медиумите ги кршат правилата за балансираност и правичност да се скрати од десет на седум дена, но беше прифатено барањето бројот „дозволени’ прилози во кои ќе се забележи прекршување на законикот да се намали од десет на пет во подоцнежниот период на изборната кампања.
Не беа прифатени и предлозите да не се бара од медиумите да имаат обврска да постигнат баланс во случаи кога политички партии систематски одбиваат да обезбедат соговорник или да дадат изјава за тој медиум. Избришана е и одредбата дека времето кое медиумите ќе го одвојат за претставници на граѓанските организации кои дејствуваат проопозициски да се брои во вкупното време кое е одвоено за опозицијата.
Во Агенцијата се одржа и средба на членовите на Привремената Комисија за Следење на Медиумското претставување, која треба да го преземе носењето на оценките за тоа дали одредени медиуми ги прекршиле одредбите од изборниот законик на 100 дена пред изборите. Ова тело сé уште не е конституирано во целост и не постигна согласност за избор на неговиот петти член./крај/мф/с
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ажурирана листата на контакти за поддршка на граѓаните и семејствата на повредените кои се испратени на лекување во странство

Ажурирана листата на контакти за 24/7 поддршка на граѓаните и семејствата на македонските граѓани кои се испратени на лекување во странство, објави на Фејсбук страницата министерот за надворешни работи и надворешна трговија Тимчо Муцунски.
Дежурни телефонски броеви во Министерството за надворешни работи и надворешна трговија се: 075/273-732 и 075/268-736.
Во продолжение се телефонските броеви на дежурните контакти во странство, каде што се наоѓаат повредени македонски граѓани на лекување.




Македонија
Над 500 граѓани на Бугарија дарувале крв за повредените од Кочани

Над 500 граѓани во Бугарија дарувале крв за повредените Кочани од трагичниот пожар во дискотеката „Пулс“. Ова го соопшти бугарскиот Црвен крст за агенцијата БТА.
Сепак, многумина се прашуваат дали собраната крв ќе биде доволна за сите повредени. Затоа, организаторите апелираат до граѓаните да продолжат со дарувањето до крајот на неделата. Инаку, секоја капка крв може да направи разлика за нечиј живот.
Крводарувањето се одржува во две клучни институции во Софија. Првата е Универзитетската болница за активно лекување и итна медицина „Н.И. Пирогов“. Втората е Националниот центар за трансфузиона хематологија. Денеска, 381 лице учествувало во акцијата за повредените Кочани. Вчера, пак, за само три часа над 120 лица дарувале крв. Од прес-службата на Црвениот крст на Бугарија соопштиле:
„Со болницата ‘Н.И. Пирогов’ и Националниот центар за трансфузиона хематологија организираме голема акција за да обезбедиме крв за младите луѓе повредени во несреќата во Кочани“.
Македонија
Пациентите примени во Анкара од денес дишат самостојно, Министертвото со информација за хоспитализираните млади луѓе по пожарот

Министерството за здравство информира дека медицинските тимови на здравствените установи и денеска се целосно ангажирани во обезбедување соодветна медицинска нега за сите пациенти.
На Клиника за пластична хирургија во моментот се хоспитализирани – 10 пациенти,
На Клиника за токсикологија – 10,
На Торакална – 4,
на трауматологија – 2,
на Детска хирургија – 4,
на КАРИЛ – 13,
На Клиника за пулмологија – 2,
Во ГОБ 8 септември -17,
Во Хируршка клиника „Св Наум Охридски“ -11
Во ОБ Штип – 2
Според информации од медицинските центри во Австрија, од шест пациенти, пет се на интензивно лекување во стабилна состојба, додека еден е префрлен на интерно одделение.
Во Литванија – четири пациенти се на интензивно лекување во стабилна состојба.
Петтемина пациенти повредени во пожарот во Кочани кои беа испратени на лекување во Анкара, Турција, од денес дишат самостојно.
Во Србија во моментот се лекуваат 30 пациенти, кои се на интензивно лекување во стабилна состојба.
Во здравствени установи во Бугарија се лекуваат 14 пациенти, од кои седум се на интензивна нега, а останатите се со помал процент на изгореници и самостојно дишат.
Во Грција се лекуваат осум пациенти, кои се стабилни во моментот.
Во текот на ноќта се очекува пациенти да бидат упатени во европски центри, за што Министерството за здравство изразува благодарност за поддршката која ни се пружа од првиот момент од нашите меѓународни партнери.