Државниот врв и политичките партии испратија честитки по повод денешниот празник, Успение на Пресвета Богородица. Сите посакаа здравје, љубов и толеранција.

Претседателот на Република Македонија, Ѓорге Иванов, по повод големиот христијански празник упати честитка до поглаварот на Македонската православна црква – Охридска архиепископија, Архиепископот охридски и македонски г.г. Стефан и до сите верници од православна вероисповед, во којашто повика да им се помогне на погодените од поплавите.

„Ликот на светицата најчесто се поврзува со страдање и тага, но она што ја велича Богородица е нејзината верба, трпение, скромност и љубов кон Бога и кон ближниот свој. Успението на Пресвета Богородица е сведоштво за победата на понизноста над горделивоста, сигурноста над стравот и себедавањето над егоизмот. Водени од овие христијански вредности и сочувствувајќи со настраданите од неодамнешните поплави, Ве повикувам да бидеме солидарни, хумани и да дадеме помош на оние на кои им е најпотребна. Празникот на Мајката Божја во земјава се прославува и како празник на спасението, грижата и довербата. Овој ден нè учи дека разделбата може да значи и соединување, а грижата за послабите и немоќните наше исправување и просветлување на умот и срцето, мотив за извршување добри дела“, се вели во честитката.

Премиерот, Емил Димитриев во својата честитка до Поглаварот на Македонската Православна Црква – Охридска Архиепископија, Архиепископ Охридски и Македонски, Господин Господин Стефан порача дека секој верник треба да го следи примерот на Дева Марија за богоугоден живот, за потребната човечка скромност, за љубовта кон Бога и ближните и смирение пред Божјата Волја.

„Чествувајќи го денешниот празник, во овие динамични времиња полни со предизвици и искушенија, да се помолиме на Мајката Божја, за здравје, меѓусебна љубов, толеранција, почитување и разбирање во нашите семејства, во нашата земја и во светот. Нека Пресвета Богородица го чува нашиот народ и нашата држава и нејзината милост нека го покрие целиот христијански народ!“, се вели во честитката на Димитриев.

Претседателот на Собранието, Трајко Вељаноски порачува дека мајката Божја е вечен пример за чесност, искреност и грижливост кои се дел од основните принципи на христијанството и наши морални одлики.

„Искрено да веруваме во нашата сплотеност и да сме цврсто обединети во нашите цели за промовирање на православните христијански вредности како и чување на духовното и културното наследство. Потребно е сите заедно да работиме за подобра иднина на секој граѓанин, како и на нашата држава Република Македонија“, пишува Вељаноски.

Претседателот на владеачката ВМРО-ДПМНЕ, Никола Груевски во честитката пишува дека славејќи го овој празник, истовремено се слават и традиционалните вредности на нашето општество и на нашите семејства.

„Вредности кои не движеле низ вековите и кои треба да ни бидат пример за потребното човечко функционирање и во иднина, бидејќи само така ќе се задржиме на вистинскиот пат. Славејќи го денешниот голем празник Ве повикувам заедно да се помолиме за здравје, мир, спокој, меѓусебна љубов, радост, благодети и успеси во секое семејство и во нашата држава“, се вели во неговата честитка.

Претседателот на СДСМ, Зоран Заев во чест на големиот христијански празник Успение на Пресвета Богородица најави дека ќе го посети манастирскиот комплекс ,,Пресвета Богородица“ во село Матка. /крај/мф