Дијаспора
Признание „Пријател на Македонија“ за Стјепан Месиќ

Убеден сум дека следните избори во Македонија конечно ќе овозможат историјата да им се препушти на историчарите за да може Македонија да се развива како сите други европски земји. Очекувам наскоро крај на кризата и верувам дека Македонија ќе ги исполни стандардите кои важат за ЕУ и дека ќе ги исполни поставените услови, рече поранешниот хравтски претседател Стјепан Месиќ на предавањето по свеченото доделување на годишните признанија на здружението на Македонците во Хрватска.
Граѓанската организација „Хрватско-македонска тангента“ во четвртокто вечерта во Шибеник му додели високо признание на поранешниот хрватски претседател Стјепан Месиќ . Во образложението е нагласено дека претседателот Месиќ во текот на долгогодишната соработка со „Хрватско- македонска тангента“ поддржал и поттикнал голем број иницијативи и проекти на оваа невладина организација во доменот на хрватско- македонските културни, стопански, медиумски и политички доближувања. Месиќ е првиот носител на признанието „Пријател на Македонија“, кое е втемелено во август годинава и во иднина ќе се доделува секоја трета година.
Во рамките на настанот претседателот Месиќ одржа предавање и предизвика големо внимание меѓу присутните гости и членови на „Хрватско-македонска тангента“. Тој се осврна на повеќе актуелни теми и истакна дека верува во заедничката иднина на Хрватска и Македонија.
Во врска со македонските избори на 11 декември Месиќ го истакна нивното значење и своето мислење дека тие ќе бидат вистинска прекретница.
„Убеден сум дека следните избори во Македонија конечно ќе овозможат историјата да им се препушти на историчарите за да може Македонија да се развива како сите други европски земји. Македонија на тоа има право. Очекувам наскоро крај на кризата и верувам дека Македонија ќе ги исполни стандардите кои важат за ЕУ и дека ќе ги исполни поставените услови. Со влезот на Македонија во ЕУ ќе добиеме уште еден забрзан чекор кон здружената Европа“, рече Месиќ.
На свеченоста беа врачени и три традиционални годишни признанија на личности кои значајно придонесуваат во реализација на проектите на „Хрватско-македонска тангента“. Од областа на медиумите годинешни добитници се новинарките Марина Јурковиќ од Слободна Далмација и Ксенија Билан од Шибенски портал, а од областа на културата, Вилијам Лакиќ, директор на градската библиотека во Шибеник.
Во повод на доделувањето на признанието „Пријател на Македонија“ на Стјепан Месиќ, честитки испратија почесните членови на „Хрватско-македонска тангента“, поранешниот хрватски претседател, д-р Иво Јосиповиќ, амбасадорите Данчо Марковски и Златко Крамариќ, генералот Лука Џанко и актерот Раде Шербеџија./крај/мф/мг
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Дијаспора
Димитриевски од Мала Преспа: Македонија мора повеќе да се грижи за своите граѓани надвор од границите на државата

Градоначалникот на општина Куманово Максим Димитриевски, денеска на покана на Заедницата на Македонци во Албанија и редакцијата на весникот „Преспа“, заедно со македонското друштво „Сонце“, присуствуваше на свечено одбележување на 30-годишнината од излегувањето на првиот македонски весник во Албанија – Преспа, а исто така направи и обиколка на музејот СТЕРЈО СПАССЕ во село Глобочени.
„Голема е честа за мене да бидам денеска во Мала Преспа. Ги поздравувам сите наши Македонци, денеска научив многу. Македонија мора да се грижи многу повеќе за своите граѓани вон границите на Македонија и оддавам признание на сите овие луѓе ентузијасти кои всушност сето ова што го сочувале досега го сочувале врз база на лични ангажмани. Македонија е должна да помогне, јас како локална власт во најитен можен период ќе изнајдам начин за повисоко ниво на соработка со локалните власти овде и дополнително ќе очекувам одредени идеи што ќе стигнат од нив. Но, она што ќе кажам за Македонците овде едноставно сум импресиониран од нивната заложба за зачувување на македонизмот на овие простори и истиот го поздравувам. Многумина од Македонија можат да учат од нив, бидејќи ние во Македонија денеска имаме една нова форма или еден нов феномен, на нов тип на домашни предавници коишто разнебитуваат се што е македонско, во форма и со убаво проткаени зборови и мисли за поубав живот, а всушност се работи за елементарна злоупотреба на позициите коишто ги имаат и за сочувување на власт, притоа немајќи ниту елементарно чувство за она што знаци нација, држава и самобитност“, рече Димитриевски.
Дијаспора
Османи во Швајцарија и Шпанија ќе се сретне со дијаспората за да бара поддршка за пописот

Министерот за надворешни работи, Бујар Османи, од утре ќе престојува во работна посета на Швајцарија и Шпанија.
„Во рамките на престојот во Берн, министерот Османи ќе оствари средба со бројни здруженија на граѓани и членови на нашата дијаспора од кои ќе побара поддршка за процесот на Попис 2021“, соопшти Министерството за надворешни работи.
За време на престојот во Швајцарија, Османи ќе се сретне и со својот колега, сојузниот министер за надворешни работи на Швајцарија, Игнацио Касис. Тема на разговорите ќе биде севкупниот развој на односите меѓу двете земји, со посебен фокус на билатералната развојна помош на Швајцарија кон Република Северна Македонија.
Директно од Швајцарија, министерот Османи патува за Мадрид на средба со својот домаќин, министерката за надворешни работи, Европска Унија и соработка на Шпанија, Аранча Гонзалес Лаја. Османи во Мадрид ќе се сретне и со Аурора Мехија, директор за Европска Унија и главен советник во кабинетот на претседателот на Владата, Педро Санчез, а ќе има средба и со претседателот на Комисијата за надворешни работи во Сенатот, Антонио Гутиерез Лимонеси. Главен акцент во разговорите ќе бидат билатералните односи, економската соработка и европските перспективи на државата.
Во рамките на престојот во Мадрид, Османи ќе се сретне и со директорот на Светската туристичка организација Зураб Пололикашвили, а ќе има одделни средби и со претставници на дијаспората на Република Северна Македонија во Шпанија.
Работните посети на Османи на Швајцарија и Шпанија се дел од дипломатските активности за презентација на европското досие на земјата, но и во насока на мобилизација на нашата дијаспора за вклучување во процесот на само-попишување во рамките на Попис 2021.
Дијаспора
Дијаспората бара прекинување и поништување на преговорите со Бугарија

Како реакција кон недоличните барања на бугарската дипломатија за ревидирање на македонската историја, јазик и постоење како посебен народ, Македонците во светот повикуваат на прекинување на сите преговори со Бугарија поврзани со идентитетски прашања.
„Секоја негација на македонскиот јазик, историја и идентитет од страна на соседите повлекува морална, национална и лична одговорност на Македонецот во одбраната на истите.Македонците во светот, со голем гнев и разочараност го осудуваат секој понатамошен “договор” со Софија со кој експлицитно се бара преименување на историјата и бришење на македонската вековна историска поврзаност и посебност. Причина повеќе и поради ставот на Советот на ЕУ од 25 март годинава, во кој се внесени забелешките на Бугарија за отпочнување на идни преговори“, се вели во соопштението на Обединетата македонска дијаспора.
Според нив, Бугарија како сосед и земја членка на ЕУ, отворено бара од Македонија да се откаже од македонскиот јазик и да се употребува само “службениот јазик на Република Северна Македонија.” Истовремено, Бугарија бара да се откажеме од постоењето на македонско малцинство во Бугарија, да прифатиме бугарско толкување на сопствената историја, што вклучува откажување од најзначајните македонски херои и нивно префарбување во Бугари.
„Со неотфрлањето на овие бугарски барања, ЕУ ги погазува своите сопствени вредности и принципи содржани во Договорот на Европската Унија, каде експлицитно се наведува во член 4 , “ ЕУ ги почитува и се залага за националниот идентитет на секоја држава“ како и промоција и реализирање на националните културни и историски вредности (член 167).Поаѓајки од фактот што ЕУ се заснова на ‘почитување’ на основните вредности за човечко достоинство, слобода и демократија во правна држава и има за цел почитување на различните култури и јазици (член 2 и 3), тогаш логички се поставува прашањето, зошто Македонецот е третиран надвор од овие принципи и критериуми? Дали Македонецот не е доволно човек за му се почитува основното право на изразување, самосвест, и самосознание на своето минато?
Ја повикуваме Европската Унија да го почитува нашето постоење како Македонци, да го уважи нашето право да си ја вреднуваме сопствената историја и да си го негуваме сопствениот јазик. Идентитетските прашања никогаш не биле и не треба да бидат предмет на разговори и преговори. Тие се право на поединецот и заедницата, што се над секоја држава или политички субјект.Можеби е време да се смени процедурата на тотален консензус во ЕУ, каде некои земји членки од злонамера го кочат проширувањето и наметнуваат анти- цивилизациски услови за земјите кандидати. Консензусот не е добродет ако со него се газат многу повозвишени вредности и се подриваат темелите на демократска, обединета, различна но сплотена, ЕВРОПА.И покрај сите премрежја со кој се среќаваме, Македонците во светот ја продолжуваат својата борба за промовирање на националните вредности преку изучување на македонскиот јазик, култура и историја, како и комплетна негација на “северната творба и нејзините институции”, се вели во соопштението Координативно тело на Македонците во светот.