Македонија
ДИК одлучи: Ќе се прегласува во Теарце
Државната изборна комисија, на седница во среда, донесе едногласна одлука да се повтори гласањето на избирачкото место 2011 во општина Теарце.
Според симулацијата направена од ИТ-секторот на ДИК, прегласувањето може да влијае на резултатот од изборите, односно на бројот на освоени мандати на политичките партии во шестата изборна единица.
Прегласувањето во основното училиште „Кирил Пејчиновиќ“ ќе се врши в недела, на 25 декември.
Управниот суд, во вторник, ја прифати како основана тужбата поднесена од СДСМ и од коалицијата за ова избирачко место откако ДИК го отфрли нивниот приговор.
Приговорот и тужбата на СДСМ за ова гласачко место беа бидејќи, како што велат од партијата, на почетокот на гласањето било констатирано дека недостига гласачко ливче, кое на крајот при пребројувањето на гласовите било најдено во избирачката кутија сосе кочанот и серискиот број. Освен тоа, во доверливиот гласачки материјал недостига и образецот број 15.
Воедно, во образложението на пресудата се наведува дека Државната изборна комисија решението со кое го одбила приговорот го донела во постапка спротивна на законот, бидејќи за оспорувањето на приговорот гласале осум членови на ДИК, четири „за“, четири „против“, а еден член, односно Субхи Јакупи, самиот се иззел од гласањето, што е, како што утврдил советот на Управниот суд, спротивно на Изборниот законик и на правилникот за начинот и за постапката за решавање по приговори.
Во Изборната единица 6, според првичните резултати на ДИК, најмногу гласови (40.599) освои ДУИ, потоа следува ВМРО-ДПМНЕ со 26.135 гласови, па СДСМ со 25.828, Беса со 25.054, Алијанса за Албанците со 17.970, ДПА со 16.225, ВМРО за Македонија со 919 и Коалицијата за промени и правда – Трет блок со 239 гласови./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Трето судење за „Пулс“: Нов обид за воведни зборови на одбраната
Судењето за дискотеката „Пулс“ во која загинаа 63 лица и околу 200 беа повредени продолжува денеска со трето рочиште. Се очекуваат воведните зборови од одбраната, кои требаше да почнат минатата недела, но бранителите на обвинетите побараа интегрираниот обвинителен акт покрај тоа што судот им го испратил нив како бранители официјално да им го испрати и на обвинетите, оти како што рече Петре Шилегов, адвокат на еден од обвиннетите, не е работа на бранителите да бидат судски доставувачи.
Судијката Диана Груевска Илиевска ги одложи воведните зборови за следно судење и остави рок од шест дена за судска достава на интегрираните обвиненија и до обвинетите.
Откако не почна со воведни зборови, на рочиштето од минатата недела судијката Груевска Илиевска побара оштетените да се изјаснат за оштетни побарувања. Но и оваа постапка не можеше до крај да биде завршена бидејќи немаше адреси од сите оштетени, па уште на рочиштето од минатата недела побара нова листа со мејлови од сите оштетени и најави дека во истиот рок од шест дена во кој треба да се достават интегрираните обвиненија и на обвинетите, ќе се доставуваат и известувања до сите оштетени дека треба да се појават на судење за да се изјаснат за оштетни побарувања.
Иако судијката Груевска Илиевска најави динамика од две судења неделно, поради недостатокот од адреси од оштетените и поради неиспратените интегрирани обвиненија до обвинетите, мораше едното судење да го одложи и затоа судењето продолжува денеска.
За трагедијата во „Пулс“ обвинети се 35 физички и три правни лица. Судењето почна на 19 ноември со воведни зборови од одбраната.
Македонија
Дел од Карпош денеска без струја
Регионалниот центар за управување со кризи на Град Скопје, по добиеното известување од ЕВН Македонија АД, информира дека: поради технички зафати во електродистрибутивната мрежа, денеска, без електрична енергија ќе останат:
· од 11:00 до 15:00 часот, корисниците на ул. Хелсинки од бр. 22 до бр. 36, општина Карпош.
Македонија
Следува период на претежно облачно време со повремени локални врнежи од дожд
Времето денеска ќе биде променливо облачно со слаб до умерен ветер претежно од јужен правец. Претпладне по одделни котлини ќе има појава на слаба магла. Кон крајот на денот и во текот на ноќта ќе има повремени локални врнежи од дожд. Минималната температура ќе биде во интервал од -1 до 5, а максималната ќе достигне од 8 до 15 степени.
Во Скопје, претежно облачно со слаб јужен ветер. Минималната температура ќе се спушти до 1, а максималната ќе достигне до 9 степени.
Времето во наредните денови
Под влијание на серија од влажни воздушни бранови од денеска во вечерните часови следува период на претежно облачно време со повремени локални врнежи од дожд, кои ќе бидат пообилни во западните и јужните делови. На некои од повисоките планини врнежите од дожд ќе преминуваат во врнежи од снег. Минималните температури ќе бидат насекаде позивитивни.

