Сопствениците на имоти зад спорните гаражи на Водно, кои во вторник требаше да бидат урнати, барале и добиле решение за уривање од Општина Центар уште во 2013 година, појаснува преку допис адвокатската канцеларија која им го води случајот.

„За објектите (гаражи) кои се дивоградби и се предмет на уривање во законска процедура, доставено е Барање до Општина Центар за инспекциски надзор и на 7.10.2013 година  од страна на  Општина Центар е издадено решение за рушење. Барањето за инспекциски надзор на овие дивоградби е поднесено од страна на сопсвениците на имотот кој се наоѓа зад споменатите гаражи, од причина што тие физички го попречуваат пристапот до нивниот имот“, се вели во дописот на адвокатите.Адвокатот Фани Михајловска појаснува дека зад дивоизградените гаражи се наоѓа имот, во сопственост на нејзина странка, стекнат во постапка на денационализација, а тоа се катастарски парцели со броеви 1667, 1309/7, 1309/3, 1309/9 и 1309/12. Посочува дека податоци за сопствениците и основот за стекнување на сопственоста се јавно достапни во Агенцијата за катастар на недвижности и на нивната веб-страна, на која како што проверивме стои само дека тие парцели се имот на сосопственици, а не е наведено ниту едно име на сопственик.Во вторник, по вторпат градежни инспектори поддржани од полиција се обидоа да спроведат уривање, но беа спречени од десетици граѓани, меѓу кои и бизнисменот Ристо Гуштеров, кој е сопственик на една од гаражите и тврди дека тие се уриваат за да се направи пат кон градежни парцели, за кои наводно заинтересирани се високи функционери, објавено пред извесно време во „бомбите“ на опозицијата./крај/мф/бб