Студентскиот и Професорскиот пленум во петок биле повикани на ненадејна средба со премиерот Никола Груевски во Владата, како дел од работната група на Универзитетот „Свети Кирил и Методиј“, соопштуваат од Студентскиот пленум.

„Сомнително е зошто владата повторно по последниот момент менува одлука за заседавање на комисија, особено кога таа не треба да ја води дискусијата за законот за високо образование – туку треба да биде набљудувач. Го потсетуваме Премиерот дека дебата за високото образование треба да се води на универзитетот, а не во Владата. Но, сепак, и покрај недоследностите во однесувањето на Владата, во знак на добра волја, ќе ја искористиме приликата да пратиме свои претставници во кабинетот на премиерот и уште еднаш да истакнеме дека Студентскиот пленум бара итно прогласување на мораториум врз последните измени во Законот за високо образование (ЗВО). Тоа подразбира одложно дејство врз измените во ЗВО, се додека не се донесе целосно нов закон, кој ќе произлегува од инклузивен дијалог и ќе се темели на суштински анализи“, соопштуваат од Студентскиот пленум.Пред три дена Министерството за образование и наука, го прифати предлогот на Универзитетскиот сенат на Универзитетот „Св. Кирил и Методиј” во Скопје, да се иницира расправа со наставниците, студентите и сите релевантни чинители во процесот на високото образование, заради сеопфатна, стручна и темелна анализа од која ќе произлезат предлози за реформи и подобрувања во високото образование.„Имајќи во предвид дека предлогот од наша страна беше оценет како конструктивен и во насока на унапредување на високото образование во земјата, Министерството за образование и наука на ден 10.о2.2015 година (вторник) предлага да се одржи иницијална средба на којашто би присуствувале соодветни претставници, делегирани од страна на Универзитетот „Св. Кирил и Методиј” – Скопје“, соопштија од Министерството.Студентите сепак ја продолжуваат борбата против новиот Закон за високо образование и потсетуваат дека „Универзитетот е на студентите“.„Бидејќи четири месеци ја водиме борбата на оспорување на овие лоши реформи, 4 месеци во кои владата одговараше со игнорирање, етикетирање, манипулирање и комплетна непочит кон идеите за демократска инклузивност и дијалог, сметаме дека е малку иронично што сега, на донесен закон, „вонредно“ не повикува на преговори. Токму затоа, се додека ова барање не помине во итна собраниска процедура, Студентскиот пленум нема да престане да делува вонинституционално, според договорениот тек“, велат од Студентскиот пленум./крај/мф/ффс