Премиерот Никола Груевски, во својот говор на прославата по повод празникот Св. Климент Охридски, упати неколку политички пораки па рече дека народот не смее да биде заплашуван, ека избори мора да има, а народот на нив да одлучи што сака, дека ДИК треба да биде канализатор на волјата на гласачите, но и дека нема да прифатат закон за медиуми кој не е европски. 

„Државната изборна комисија треба да биде канализатор и спроведувач на волјата на гласачите. Ние како партија имаме јасен став дека експертите кои треба да бидат предложени мора да бидат луѓе со кредибилитет и луѓе кои ги исполнуваат највисоките професионални стандарди, луѓе кои што важат за политички неутрални“, рече Груевски, осврнувајќи се на изборот на новата ДИК, која ќе има проширес состав и зголемени надлежности, а за која се разговара во работните групи за спроведување на договореното од Пржино.

Во Државната изборна комисија, според премиерот, треба да се работи по словото на законот и согласно фактите, а не по желбата на политичарите.

“Зад искривувањето на ваквите начела и принципи стои желбата да се наштети на процесот, да се избега од избори. И ние тоа нема и не смееме да го дозволиме. Мора да воведеме повисоки критериуми, мора да не се наштети на волјата на граѓаните“, рече Груевски.

Премиерот Груевски истакна дека во однос на медиумите се прифатливи само европски искуства, а не нешто што никаде го нема.

„Нашите позиции се принципиелни и реални. За медиумската сфера, иако има соодветен закон кој е донесен од страна на Собранието во тесна консултација, координација и соработка со Европската Унија и кој од страна на претставникот на ОБСЕ беше оценет со зборот одличен, и за кој освен ЕУ и ОБСЕ, и Советот на Европа даде позитивни оценки, ние сме подготвени да прифатиме измени на закон или нов закон, но само ако таков закон постои во било која европска земја, членка на ЕУ, и кој ќе биде прифатен од оние на кои се однесува, на медиумите и новинарите. Поевропски од ова нема, поевропски здравје. Кој закон сакаат од земја членка на ЕУ таков ќе прифатиме. Но, не нешто што никаде го нема“, рече Груевски.

Премиерот порача и дека избори мора да има, но дека секој оној кој со своето однесување ќе му оневозможи на народот да реши на кого ќе му ја даде довербата, кој ќе се обиде да му го одземе врвното демократско право на народот да решава на избори, без разлика дали тоа ќе го направи со сопственото бегање од избори, прави непринципелно и неетичко дело кое е на ранг на навреда на народот.

„На тој начин, со ова однесување политичкиот конкурент покажува недоверба во своите капацитети и отсуство на соодветна грижа за националните и државни интереси на Република Македонија“, рече Груевски.„Избори мора да има, и избори ќе има. Ова е наша земја и наша земја ќе остане. Народот ќе решава и народот мора да решава. Нема друго и нема бегање“, порача Груевски, во синоќешното обраќање на Академијата по повод празникот Свети Климент Охридски.

Премиерот рече дека ќе се спротивстави на секаков вид заплашување на народот.

„Секаков облик за заплашување на народот, како што го прават нашите политички конкуренти, заплашувањето на сите негови целни групи, пензионерите, социјално ранливите, земјоделците, банкарите, бизнисмените, адвокатите, судиите, обвинителите, новинарите, е неприфатливо, и политичката гарнитура која јас ја предводам секогаш и секаде силно и решително ќе се спротивстави на овие недозволиви однесувања кои ги прават некои поединци и групи“, рече премиерот.

„Не сакам на овој празник да се конфронтирам, додаде Груевски, но и нема да премолчам и не смеам да премолчам, и да не кажам дека секој оној кој се дрзнува да го навреди народот, да го потцени, да го заплаши, ќе наиде на препрека во мене лично и во политичка гарнитура која ја предводам. И нема да помине“, рече Груевски.

Во говорот на академијата за празникот Свети Климент Охридски, премиерот Никола Груевски објави проект со кој средношколците секоја среда ќе можат бесплатно да ги посетуваат државните театри, музеи и кина, а ќе можат бесплатно да се возат и со жичницата на Водно. Проектот започнува со важност од 1 јануари 2016 година.

„Следејќи ја успешната приказна на проектот „Слободен Четврток” наменет за студентите, преку овој нов проект кој се вика “Средношколска Среда” ќе се стремиме да ја подигнеме мобилноста, квалитетот на забава, и посетеноста на културните институции како театри, музеи и кина кај средношколците“, рече Груевски

Премиерот претходно најави и бесплатен превоз за студентите во јавниот градски сообраќај./крај/мф/бб

Извор: Макфакс