Ако постои една идеја што како светилник нè водела низ бурите на историјата, тоа е идејата за слобода на Македонија. Благодарение на таа идеја, ние сме наоѓале сила да се помириме и да ги надминеме поделбите, порача во вторникот Претседателот на Република Македонија, Ѓорге Иванов, во честитката до граѓаните по повод празникот 11-ти Октомври – Денот на народното востание, истовремено апелирајќи за надминување на кризата која им ја одзема перспективата на младите.

„Минаа 75 години од 11-та Октомври 1941-та, од денот кога македонскиот народ се дигна на востание за ослободување на Македонија од нацистичкиот и фашистичкиот окупатор. Следуваа најтешките години исполнети со многу борби, жртви и искушенија. Иако соочени со многупати посилен и подобро вооружен непријател, борците во Народноослободителната борба не потклекнаа и заедно со слободољубивиот народ на Македонија храбро маршираа кон слободата. На 2 август 1944-та, на нашиот втор Илинден, тие се изборија за државотворниот АСНОМ. Нивното дело го продолжија основоположниците на независна Република Македонија. На 8 септември 1991-та, пред 25 години, го остваривме нашиот трет победоносен Илинден“, се вели во честитката од Претседателот Иванов.

Шефот на македонската држава истакнува натаму дека 11 Октомври бил возможен поради свежите сеќавања за илинденската епопеја, но и оти „без 11 Октомври 1941-та ние ќе го немавме ниту вториот ниту третиот Илинден, и оти благодарение на тоа востание македонскиот народ се изборил за слобода, и за државност и за независност.

„Нишката што ги поврзува сите наши Илиндени е идејата за слобода на Македонија која ги надминувала и порамнувала сите разлики. Оваа година на двоен јубилеј нè затекна меѓусебно поделени и раскарани. Премногу долго, длабоката политичка криза ја исцрпува енергијата на нашето општество и економија и им ја одзема перспективата на нашите млади. Неопходно е разрешување и надминување на кризата.

Иванов порачува дека 11-ти Октомври и 8-ми Септември треба да бидат потсетување дека само ако со помирување, простување и сплотување може да се зачува слободата, сувереноста и независноста на заедничката татковина.

„Како што се изборивме за слободата, државноста и независноста, така денес треба да се бориме за чување на придобивките и градење просперитетна иднина за нашите потомци… Нам ни останува да го чуваме сето тоа што го имаме“, заклучува Претседателот Иванов искажувајќи благодарност на сите кои учествуваа во остварувањето на стремежот за слобода, државност и независност./крај/мф//бс

Извор: Макфакс