Министерката за внатрешни работи, Гордана Јанкулоска на Денот на полицијата-7 мај во честитката до припадниците на МВР, ги повика во деновите кои следат да одговорат смирено и достоинствено, но исто така и одлучно, бескомпромисно и пожртвувано.

„Пред нас претстојат денови во кои креаторите на кризи, дестабилизација и анархија повторно ќе ја стават на тест приправноста, професионализмот и храброста на полицијата. На овие предизвици потребно е да се одговори на истиот начин како и до сега – смирено и  достоинствено, но исто така и одлучно, бескомпромисно и пожртвувано. Во овие денови на искушенија, Вие со Вашето дело испишувате светли страници во современата македонска историја, дело на кое граѓаните Ви се благодарни и кое ќе го паметат, а идните генерации ќе знаат да го вреднуваат и споменуваат“, пишува Јанкулоска во честитката.  По протестите изминативе два дена коишто се случија откако опозицијата објави наводни аудио разговори на владини функционери за убиството на Мартин Нешкоски, Јанкулоска констатира дека припадниците на МВР биле под жесток напад, најбрутално нападнати,  иако реагирале професионално.Tаа ги предупредува припадниците на МВР дека претстои исклучително значаен период за Македонија, во којшто тие треба да го дадат својот максимум. „Никогаш не било лесно и едноставно да бидеш припадник на МВР. Вршењето на работата барало жртви и откажување и од Вас и од Вашите семејства. Но да се биде припадник на МВР сега, веројатно е уште потешко и посложено, затоа што претстои исклучително значаен период за Македонија во кој ќе мора секој од нас да го даде својот максимум. Можеби ќе има провокации, напади, манипулации, лажни обвинувања. Важно е да бидеме на ниво на задачата тогаш кога сме им најпотребни на граѓаните и на државата. Овие девет години спроведовме низа реформи од кои дел беа доста длабоки и бараа сериозен напор. Тие имаа за цел македонската полиција да ја реформираат во модерна, ефикасна, европска полициска служба. Затоа сум убедена дека Вие имате капацитет и знаења да одговорите на сите предизвици“, пишува Јанкулоска.Во честитката таа го споменува и нападот на полициската станица во Гошинце кога поголема група, според полицијата околу 40-тина лица од Косово, заробија четворица полицајци. Информациите дека овој напад е режиран од самата власт, за Јанкулоска се извитоперени конструкции.„Поединци веднаш се обидоа да внесат поделби и раздор инсинуирајќи дека една од варијантите била режирање на нападот од самата власт. Монструозност, која покажува на што сè може да е подготвен еден ум расипан од болната амбиција, без работа и проекти, со подметнувања да се дојде на власт. Четворицата колеги знаат, а знаат и сите оние што се инволвирани во истрагата колку се извитоперени овие конструкции. Добро е што со секој изминат ден и со секое ново сознание истите се демантираат. Затоа од Вас, граѓаните очекуваат максимално ефикасно расчистување и документирање на овој но и на секој друг случај од надлежност на МВР. Оној кој се обидел да ја нападне Република Македонија, нејзините институции и нејзините граѓани не смее да мине неказнето“, порачува Јанкулоска.Честитката на министерката започнува со пофалби и благодарност до припадниците на МВР за пожртвуваност, професионализам, хуманост и посветеност на работата.„Вашата храброст која секојдневно ја демонстрирате ќе ја помнат македонските граѓани на кои им помогнавте при поплавите и временските непогоди, кога одредени места беа отсечени од комуникација заради снежните навеви или, пак, останаа без електрична енергија. Граѓаните очекуваат да го браните и правото, слободно и демократски секој да го изрази своето мислење. Да ги штитите овие придобивки. Сепак, граѓаните очекуваат професионално и одлучно да реагирате на секој обид да се наруши спокојноста и мирот и да завладее хаос. На секое насилството и вон институционално узурпирање на волјата на граѓаните мора соодветно да се одговори“, им пиша Јанкулоска на вработените.По повод денот на полицијата во четврток во 10 часот во Министерството за внатрешни работи зграда бр.1  ќе се положува цвеќе пред споменикот на бранителите, 10:15  пред зградата на гранична полиција и во 10:45 пред споменикот на бранителите во жена парк. Во 12 часот во касарната Ѓорче Петров  ќе биде отворен ден за граѓаните каде ќе биде изложена опремата од единиците во МВР. /крај/мф