После трагедијата што се случи со прегазувањето на младата Фросина нацијата е во жалот а гневот на народот е огромен и реален. Наместо да преземат одговорност и да бараат решенија за проблемите, од ДПМНЕ етикетираат луѓе, лажат и манипулираат, велат од СДСМ.

„Срамно и недозволиво е ВМРО-ДПМНЕ да го злоупотребува овој трагичен настан, кога добро знаат дека и судијката и таткото на сторителот се блиски до нивната партија. Судијката Даниела Алексоска Стојановска е избрана токму од ВМРО-ДПМНЕ, во времето на нивниот режим, на 8 февруари 2012 година. Таа е дел од фамозното „тефтерче“ на Гордана Јанкулоска, симбол на партиските влијанија врз судството. Граѓаните добро знаат како се избираа судии тогаш и чии кадри се тие. Етикетирањето и лажните обвинувања се очајна стратегија која покажува дека Владата бега од решенија и јавната болка сака да ја сведе на политички пазар. СДСМ нема да дозволи манипулации со човечки трагедии. Ги повикуваме ВМРО-ДПМНЕ да престанат со некрофилски политики и да почнат да бараат решенија за вистинските проблеми – дивеењето по улиците и неспособноста на министерот Тошковски да воспостави ред и безбедност во државата“, стои во соопштението на СДСМ.

Здравствен систем е пред колапс и во тотален хаос: нема лекови на Онкологија, дечиња умираат на Клиниката за детски болести, има недостиг на кадар, повторно има листи на чекања, нема добри здравствени услуги, кажа денеска на прес-конференција, д-р Душанка Георигиева-Трпевски, членка на Извршниот одбор на СДСМ.

„Само минатата година, за шест месеци, регистрирани се 19 починати доенчиња и едно петгодишно девојче. Ова не се бројки – ова се изгубени животи! Деца умираат поради недостаток на здравствена грижа, поради неодговорноста на надлежните. Нема лекови на Клиниката за Онкологија, луѓе умираат поради неспособност на власта. Ова не е само здравствен проблем – туку хуманитарен, затоа што е директна закана по човечките животи. Животи кои зависат од лековите што државата мора да ги обезбеди, а денес ги нема! Сега дознаваме и дека лицата со хемофилија се во страв – тендерот за нивните лекови не е распишан навреме, и големи се шансите да остануваат без основната терапија која им значи живот!
Листи на чекања за преглед има повторно, пациенти се жалат дека ова станува голем проблем. И работата на Клиниката Козле е доведена во прашање. Се врши мобинг врз лекарите од директорка која по секоја цена ја штитат Таравари и ДПМНЕ, на директна штета на здравјето на децата“ вели Георигиева-Трпевски.

Таа истакна дека на чело на многу клиники се поставени директори без потребното искуство, што дополнително го влошува функционирањето на здравствениот систем.

„Има директори кои земаат пари за дежурства, а никогаш не се појавиле на клиника! Оваа катастрофална состојба во здравството не е случајна. Таа е резултат на неспособност и неодговорност на министерот Таравари и Министерството за здравство. Таравари веќе осум месеци раководи со здравствениот сектор, а неговата партија управува со овој ресор веќе две години. Политичкиот континуитет е факт, како што е факт и целосниот колапс на здравствениот систем. Ова не може и не смее да продолжи! Катастрофата во здравството ја плаќаат луѓето со своето здравје и живот. СДСМ бара итна оставка од министерот Арбен Таравари за хаосот во здравството! Бараме одговорност!“, заклучи Георигиева-Трпевски.

Обидот да се етикетира гневот на народот дека опозицијата ги организира протестите е навреда на луѓето што протестираат, власта покажува целосно отсуство на емпатија кон сопствениот народ и наместо да бара решенија ја сведува јавната болка на политички пазар, вели претседателот на СДСМ, Венко Филипче во објава на Фејсбук.

„Гледам како провладини профили водат наратив дека опозицијата ги организира протестите. Со ова не само што ги навредуваат луѓето што протестираат, туку и покажуваат целосно отсуство на емпатија кон сопствениот народ. Наместо да преземат одговорност и да бараат решенија, тие повторно бегаат од вистинските проблеми и ја сведуваат јавната болка на политички пазар.

Трагедијата треба да ја обедини нацијата во жалост и барање одговорност – не да се сведува на политичка пресметка. Обидот да се етикетира гневот на граѓаните како „опозициски организиран“ е само очајничка стратегија за да се одвлече вниманието од системските пропусти. Влада што се плаши од гласот на сопствениот народ веќе признава дека потфрлила.

Историјата е сведок дека секоја власт што не ги слушала граѓаните, на крајот била казнувана.“ наведува Филипче.