Македонија
KKCG најавува два главни бренда – Qinshift (Киншифт), технолошка компанија за развој на софтвер и „Арикома“, провајдер на целосни ИКТ-услуги
ИТ холдинг-компанијата Арикома, која е дел од KKCG групацијата, објавува дека ќе работи под два главни бренда за да ја утврди својата позиција како меѓународен лидер во областа на информатичката технологија (ИТ). Компаниите кои се фокусирани на развој на наменски софтвер ќе работат под брендот Qinshift, а останатите компании од групацијата ќе го усвојат брендот Арикома.
Во последниве шест години, технолошкиот столб KKCG порасна во водечки ИТ играч во Европа, со годишни приходи од речиси 500 милиони евра (11,7 милијарди чешки круни) и има вработено повеќе од 4000 експерти во 13 компании.
Оваа промена ќе овозможи дополнителна специјализација во рамки на технолошкиот столб на KKCG, со што секоја компанија ќе може да се фокусира на своите основни компетенции, поттикнувајќи понатамошен раст и поголема вредност.
„Дојдовме до точка нашите операции да се доволно обемни и сеопфатни со што можат да формираат две посебни, специјализирани компании,“ вели директорот за инвестиции на KKCG, Михал Томанек. „Веруваме дека основањето на Qinshift и освежувањето на оригиналниот бренд Арикома ќе биде катализатор за раст на двете компании и дека ќе ѝ помогне на нашата групација уште поефикасно да се натпреварува на светскиот пазар.“
Qinshift ќе интегрира шест компании со експертиза во дизајн на софтвер, комплетни корпоративни решенија, UX и UI дизајн, управувани услуги и иновативни понуди за развој на производи. Qinshift исто така ќе дава и деловни консултантски услуги. Компанијата опслужува разновидни клиенти, вклучувајќи големи телекомуникациски и сателитски оператори, финансиски институции, производствени и автомобилски компании, како и организации за мобилност и здравствени услуги, овозможувајќи им да напредуваат во дигиталната ера.
Сеавус, скандинавска компанија за развој на софтвер, и Stratiteq, компанија специјализирана за анализа на податоци со седиште во Шведска, ќе бидат првите компании кои ќе се приклучат на Qinshift на почетокот на септември. Cleverlance, чешкиот и словачки лидер во обезбедувањето услуги за дигитализација на бизнисот, како и дел од чешката корпорација Komix, која има силно присуство во автомобилската индустрија, ќе им се приклучи на почетокот на декември. Интеграцијата ќе биде завршена до крајот на 2024 година со вклучување на Clearcode, светски партнер за развој на софтвер за рекламирање и маркетинг (AdTech & MarTech), и Musala Soft, компанија со седиште во Бугарија која работи со големи клиенти (blue chip companies).
„Како бренд, Qinshift ги рефлектира нашите основни вредности, обединувајќи колектив кој е мотивиран од страста за работа и желбата за градење цврсти, партнерски односи со клиентите. Новиот бренд и идентитет ќе обединат неколку извонредни компании од нашето портфлио, сплотувајќи ги нивнатe силни страни, експертиза и наследства. Со пристап насочен кон луѓето, со вкупен приход од 200 милиони евра, 3500 професионалци, преку 300 клиенти и 28 канцеларии во светот, нашата цел е да станеме доверлив и посакуван партнер за дигитална трансформација,“ изјави извршниот директор на Qinshift, Лудовик Гауде.
Целта на Qinshift е да се прошири низ Европа, САД, Северна Африка, а на крајот и низ Латинска Америка, интегрирајќи врвни услуги за вештачка интелигенција во своето сеопфатно портфолио.
Арикома ќе обедини брендови фокусирани на ИТ инфраструктура, клауд услуги, корпоративни апликации, сајбер безбедност и дигитализација на јавниот сектор. Ќе ги опфаќа следниве компании: Autocont, лидер на локалниот пазар во ИТ услуги; AEC, експерти за сајбер безбедност; CES EA и дел од Komix, развивачи на софтвер за јавниот сектор; и Internet Projekt, експерти за е-трговија. Постепениот процес на ребрендирање ќе биде завршен на крајот од годината.
Овогодинешните аквизиции, SAP-фокусираните Sabris Consulting и Consulting 4U како и развивачот на софтвер за јавниот сектор SYSCOM Software ќе се приклучат кон брендот Арикома подоцна.
„Ова претставува возбудлив чекор во равојот на Арикома. Во последниве три децении, колегите од нашите компании посветено ја градеа Арикома, која прерасна во центар на искуство и експертиза во ИКТ решенијата,“ рече извршниот директор на Арикома, Милан Самеш. „Под едно име, ќе се етаблираме како активен, доверлив и динамичен партнер во дигитализацијата и на јавниот и на комерцијалниот сектор, како во Чешка така и во остатокот од Европа. Нашите првични планови за проширување ги опфаќаат земјите од регионот DACH, Германија, Австрија и Швајцарија, каде гледаме многу потенцијал,“ додаде тој.
Специјализацијата и агилноста на двете компании, кои истовремено минуваат низ процес на спојување на поединечни компании, ќе создаде подинамична средина за поттикнување соработка, иновативност и подобро опслужување на разновидната и престижна меѓународна база на клиенти, и од јавниот и од приватниот сектор.
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отфрлени се тужбите на „Европскиот фронт“ од Уставниот суд, ќе има прегласување
До доцна во ноќта Уставниот суд расправаше по тужбите на одлуките на Државната изборна комисија – ДИК за неколку избирачки места поднесени од коалицијата „Европски фронт“. Од судот соопштија за шест одлуки според кои тужбите се отфрлени како неосновани, а тоа значи, согласно одлуките на ДИК, дека ќе има прегласување на конкретни избирачки места.
„Европскиот фронт“ имаше поднесено седум тужби на одлуките на ДИК, а Управниот суд беше ограничен со роковите за нивно решавање.
Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Според Изборниот законик, доколку одлуката за прегласување на едно избирачко место може да влијае на конечните резулатите од изборите, ДИК ќе организира повторно гласање 14 дена од одржувањето на изборите, односно на 22 мај.
Македонија
Фирма од Чаир монтира небезбедно панорамско тркало во Карпош, обвини Град Скопје
Град Скопје информира дека правното лице Дизниленд реквизити, фирма од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, велат од таму.
Македонија
Вработен во МВР фатен со мито од 12.500 евра
Вработен во Министерството за внатрешни работи е фатен со мито од 12.500 евра, соопшти министерот Панче Тошковски. Како што вели тој, лицето И.М. било вработено како виш аналитичар во СВР Скопје. Осомничениот е лишен од слобода под сомневање за сторени кривични дела измама предвидени по чл. 247 од КЗ.
„Од страна на Одделот за внатрешна контрола, криминалистички истраги и професионални стандарди во координација со Одделот за криминалистичка полиција се постапуваше по пријава од три оштетени лица и на ден 17.05.2024 година наведеното лице е фатено на лице место во моментот на примопредавање на 12.500 евра, претходно криминалистички обработени кои ги прибавила за наводно посредување за добивање на социјални станови од Б категорија. Во врска со кривичното дело извршен е претрес во службените простории кои ги користела пријавената при што е пронајдена пообемна сомнителна документација која е поврзана со кривичното дело во вид на разни документи за кои постои сомневање дека се фалсификувани, разни договори за позајмици, договори за посредување за доделување на социјални станови, имотни листови, како и тефтер со ракопис во кој е водена евиденција за лица за кои биле вршени определени работи“, соопшти Тошковски.
При извршен претрес во дом и други простории кои ги користи лицето И.М. лоцирани во Општина Сарај, беше пронајдено и огнено оружје со шест парчиња муниција кое оружје и муниција најверојатно ги поседува без дозвола, за што известено е и Одделението за недозволена трговија со оружје при СВР Скопје заради преземање на дополнителни мерки.
Министерот додава дека МВР и понатаму продолжува со преземање на мерки и активности насочени кон испитување на евентуална поврзаност на наведеното лице со други високи полициски службеници.