Македонија
Mалите парламентарни партии: Да се донесе законското решение за една изборна единица

Малите парламентарни партии, кои со години се залагаат за промена на изборниот модел од шест во една изборна единица, сметаат дека постигнатиот договор помеѓу лидерите на СДСМ и ВМРО-ДПМНЕ е гаранција дека, конечно, ќе се донесат долгоочекуваните измени на Изборниот законик.
Пратеникот на Демократскиот сојуз, Павле Трајанов, порача дека власта и опозицијата не смеат да бараат изговори ниту, пак, одговорноста да ја префрлаат на други партии, туку што побргу да завршат работните средби и да се изгласа законското решение.
„Знаете дека ние во Собранието веќе поднесовме законско решение за промена на изборниот модел, при што бараме Македонија да биде една изборна единица и притоа бараме да нема изборен праг. Се надеваме дека работните групи во Собранието ќе постигнат договор, кој е прифатлив за нас, а предлагаме и ограничување на амандманската расправа на најмногу 10 дена за да може побргу да се донесе законот. Доколку носењето на измените се развлече, ќе сметаме дека не се конзистентни на договореното. Инсистираме на носење на измените во најбрз можен рок бидејќи постои можност и за вонредни парламентарни избори, кои би се организирале во една изборна единица“, вели пратеникот Трајанов.
Поддршка на иницијативата за една изборна единица има од повеќе од 30 пратеници од малите парламентарни партии, кои се дел и од коалицијата на СДСМ и ВМРО-ДПМНЕ. Од партијата ДОМ, која во неколку наврати го иницира предлогот за една изборна единица, стравуваат дека постои опасност од нова амандманска блокада во матичните комисии затоа што нема поддршка од ДУИ.
„Позитивно сме изненадени што лидерите постигнаа договор за една изборна единица, но сепак постои сомнеж дека може да ни се повтори сценариото од минатиот пат, да се соочиме со блокада од илјадници амандмани, овој пат од партијата ДУИ, во која не се расположени да го прифатат предлогот за една изборна единица. Не сакаме да веруваме дека и овој пат ќе бидеме изиграни и дека законот ќе биде предмет на политички пазарења и уцени. Добро е да биде донесен со консензус и сите партии да дадат поддршка. Ние имаме уште едно барање, а тоа е еднаква застапеност на мажите и жените на листите. Нашето барање ќе го преточиме во амандман за да биде дел од измените на Изборниот законик“, изјави Мирослав Богдановски, пратеник од ДОМ.
За малите партии, не е спорно дали ќе се разгледува постојниот закон, кој веќе е поднесен, или ќе има нов предлог сеедно дали од страна на група пратеници или предлагач ќе биде Министерството за правда. Велат не е проблем да го повлечат својот предлог и да му дадат поддршка на новиот затоа што суштината е иста.
Инаку, со договорот помеѓу Заев и Мицкоски работните групи на партиите СДСМ и ВМРО-ДПМНЕ во Собранието треба да постигнат договор за измените на изборниот модел во една изборна единица од досегашните шест, за отворени листи за советници на следните локални избори, избор на градоначалник во прв круг со одѕив од 30 отсто од вкупниот број запишани избирачи во општината и гласањето на дијаспората надвор од дипломатско-конзуларните претставништва.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Кузеска: Подготвува ли МВРО-ВМРО злоупотреби со личните карти пред избори

Според портпаролката на СДСМ, Богданка Кузеска, непосредно пред локалните избори, во време кога рејтингот на ВМРО-ДПМНЕ вртоглаво паѓа, а довербата во институциите е сериозно нарушена, МВР тајно започнала процес за нов систем за издавање лични карти.
Последните јавно достапни информации говорат, вели таа, дека веќе е ангажира фирма, без било какво искуство во оваа област.
„Замислете, досега правела студии за отпад и стадиони. Сега треба да направи студија за систем со највисок степен на доверливост – издавање на лични карти и пасоши.
Понатаму, во тендерската документација не се бара безбедносен сертификат за лицата што ќе имаат пристап до податоците. Што е крајно сомнително и несоодветно.
Нема гаранција ниту за заштита на доверливи податоци на државата и граѓаните. Зошто“, прашува Кузеска.
Оценува дека сè ова се прави без транспарентност, далеку од очите на јавноста и крајно сомнително.
„МВРО-ВМРО сака да го централизира целиот систем – од производство до издавање документи – без контрола, без надзор, без јавност, без сертитифакти. Тоа не е модернизација, тоа е рецепт за злоупотреба.
Се поставува прашањето дали ова значи дека повторно се подготвуваат сценаријата како од времето на Никола Груевски, кога МВРО-ВМРО масовно издаваше незаконски лични карти и спроведуваше незаконско гласање“.
Бара итни одговори од Тошковски, зошто се ангажира фирма без релевантно искуство и без безбедносен сертификат.
„Кој може да гарантира дека нема да има масовно издавање нови документи непосредно пред изборите и злоупотреби“.
СДСМ, напоменува таа, ќе остане буден чувар на јавниот интерес и на слободната волја на граѓаните и најави дека ќе ги информираат сите релевантни домашни и меѓународни фактори и ќе се спротивстават на сите обиди за злоупотреби.
Македонија
(Видео) Висинска: Центар заслужува промена, доаѓа времето на достоинствен живот за центарци

Центар стагнира, а центарци ги живеат последиците од неисполнетите ветувања.Градоначалникот Герасимовски многу вети – но малку направи. По 4 години, неговите ветувања се само празни букви на хартија, истакна на прес-конференција Марина Вишинска од ВМРО-ДПМНЕ.
„Градинката во Маџир Маало, градинка во клинички центар, воспитно-образовен центар со градинка и училиште во парк 1 – се само илузија и постојат само на хартија“.
Според неа, клучните проекти за деца и образование останаа само зборови.
„И додека тој се фали со „грижа за најмладите“, реалноста е – никаква реализација.
Монтажен паркинг со 296 места во Дебар Маало, Катната гаража спроти ПУИК, монтажен паркинг, во Пролет, гаража од 10.000 м2 кај Клиничкиот центар – ги нема во реалноста, ниту се планирани.
Наместо решено паркирање, центарци добија само хаос и изневерени очекувања.
Парк и нова административна зграда на локација ПУИК, Парк со игралиште кај Клинички центар и игралиште кај Куќата на Есма во Кале, се само празни ветувања на Герасимовски. Зеленилото и спортските површини постојат само во предизборни брошури.
А кај „Треска“ што добивме – бетонизација. Центар ја губи душата но кој профитира“, прашува таа.
За неа тоа се четири години само празни ветувања. И денес, како што додаде, истиот човек повторно ветува и повторно бара доверба. С
„Со кое лице? Зарем навистина мисли дека центарци забораваат. Центарци заслужуваат повеќе од лажни ветувања“, истакна Висинска.
Македонија
Финансиска поддршка за ранливи потрошувачи на струја, објавен списокот на одобрени баратели за 2025 година

Министерството за енергетика, рударство и минерални суровини ја заврши проверката на сите пристигнати барања поднесени по Јавниот оглас за доделување на финансиска поддршка на лица кои припаѓаат на категоријата на ранливи потрошувачи на енергија за 2025 година.
Постапката за проверка е спроведена врз основа на потпишаните Меморандуми за соработка со Управата за јавни приходи и Министерството за социјална политика, демографија и млади, со што се овозможи точна и ефикасна верификација на доставените податоци.
На веб-страницата на Министерството https://energy.gov.mk објавен е списокот на сите одобрени баратели: линк –Известување за објавување на список на добитници на финансиска поддршка за ранливи потрошувачи на енергија за 2025 година.
Според резултатите:
• 313 домаќинства со едно или повеќе деца со попреченост ќе добиваат месечна поддршка од 1.000 денари, почнувајќи од март 2025 година.
• 94 згрижувачки семејства исто така го стекнуваат правото на финансиска поддршка.
Поддршката се исплаќа во форма на намалување на месечната сметка за потрошена електрична енергија, во траење од 12 месеци, сметано од денот на поднесување на барањето.
За оваа намена, Министерството ќе издвои приближно 5 милиони денари од Буџетот за 2025 година, како директна поддршка за оние на кои им е најпотребна.
Дополнително, Министерството веќе достави предлог до Владата за нова Програма со која се предвидува проширување на опфатот на ранливите категории граѓани, што ќе овозможи уште поголем број семејства да добијат поддршка во 2025 година.
Новиот јавен оглас се очекува да биде објавен наскоро.