Македонија
Мајката на Тамара: Еден ден ќе ве стигне Божјата правда

Заминете си од своите фотелји за да не се случи нова Тамара, еден ден ќе ве стигне Божјата правда, им порача на здравствените власти, мајката на Тамара, девојчето кое почина чекајќи операција во странство, Жаклина Димовска, на протестот пред Министерството за здравство.
„Одете си за да може да се направи поубаво место за живеење за нашите деца, Тамара е доказ дека не се грижите добро за нашите деца, заминете си од вашите фотелји за да не се случи нова Тамара. Децата чекајќи ја вашата милост умираат. Одете си за да нема родители скршени од тага, преполни со болка и солзи. Мора да го најдеме виновникот. Вие веќе кажавте дека ние сме виновни за смртта. Три години баравме операција, вие ни ја дадовте три дена по смртта, ни испративте решение по цели три години“, рече Димовска.Таа реагираше на информацијата што излезе во медиумите дека Тамара не починала од сколиоза, туку од бронхопневмонија и дека нејзината болест не била третирана. На министерот за здравство Никола Тодоров му порача дека три години одела од врата на врата и барала лек за своето дете, но на крајот, според неа, властите изрежирале дека родителите биле виновни и дека не ја лекувале како што треба.„Вие бевте тие кои сето тоа го изрежиравте за да излезе дека родителите се виновни. Како можевте да напишете такво нешто, да помислите. Од врата на врата три години баравме лек за нашето дете и на крајот излезе дека јас не сум ја лекувала Тамара како што треба, јас не сум доктор. Во конзилијарните мислења докторите пишуваа дека мора да се постапи итно за да не добие белодробни проблеми. Да ме примеше пред три години (министерот Тодоров), Тамара ќе беше жива, да не излезеше со изјава дека министерството ќе ги покрие сите трошоци за лекувањето на Тамара, досега ќе беше излекувана со помош на хуманите луѓе, но вие ветивте дека ќе ги покриете трошоците. Каде ја испративте – на вечно почивалиште. Еден ден ќе ве стигне Божјата правда сите вие што режиравте смрт“, рече Димовска.Таа побара одговорност и од директорите на Фондот за здравствено осигурување, Маја Парнаџиева Змејкова и Џемали Мехази кој, според Димовска, го чувал документот за Тамара во фиока долго време. По смртта на Тамара две деца коишто, исто така, боледуваат од сколиоза добија можност за лекување во странство. „Нели не беа итни, требаше да се лекуваат во спиналниот центар… Каде е тој центар, сега излезе дека сите тие деца биле итни, но моето си замина кај ангелите. Каква е оваа правда?“, праша Димовска и порача дека едното дете го изгубила, а за другото сега се чекаат потписи за операција.Протестот со којшто се бара одговорност за смртта на Тамара почна пред подрачната единица на Фондот за здравствено осигурување, продолжи пред републичкиот Фонд за здравство и заврши пред Министерството за здравство каде граѓаните симболично му дадоа црвен картон на министерот Тодоров и побараа да си даде оставка./крај/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ го обвини Димитриевски за рушење на темелите на мирот

Опозициската Демократска унија за интеграција (ДУИ) остро реагира на изјавите на градоначалникот на Куманово и лидер на движењето „За наша Македонија“, Максим Димитриевски, кои тие ги оценија како директен напад врз Бадентеровото мнозинство и темелите на Охридскиот рамковен договор.
„Вчерашните изјави на Димитриевски не се изолирани. Тоа е дел од оркестрирана кампања на оваа влада и нејзините партнери за рушење на правдата, еднаквоста и стабилноста во државата“, се вели во реакцијата на ДУИ.
Од партијата потсетуваат дека уште од првиот ден на мандатот, Владата систематски ги поткопува темелите на мултиетничкото општество.
„Го укинаа балансерот, ја девалвираа имплементацијата на Охридскиот договор доверувајќи ја на Иван Стоилковиќ, човек со антиалбански и путинистички ставови, ја избришаа дијаспората од пресметките и со тоа ги намалија Албанците во општинските совети“, наведуваат од ДУИ.
Посебно алармантно, според нив, е обидот на Димитриевски да го отвори прашањето за Бадентеровото мнозинство.
„Тоа е уставен механизам кој гарантира еднаквост и стабилност. Секој напад врз него е напад врз самата архитектура на мирот во земјава“, порачуваат од партијата.
ДУИ потсети и на „дволичноста“ на Димитриевски, потсетувајќи дека токму тој им го забрани користењето на албанското знаме на советниците на ВРЕДИ, а денес, како што велат, се обидува да го релативизира Охридскиот договор.
„Ова не е случајност, ова е истата програма на ВМРО која пред изборите најавуваше укинување на Законот за јазиците и враќање чекор назад. Денес нивните партнери ја спроведуваат таа агенда“, велат од ДУИ.
Партијата најавува дека граѓаните ќе го дадат конечниот збор на претстојниот референдум.
„Октомври е близу. Народот ќе каже јасно и гласно – Охридскиот договор е недопирлив, достоинството на Албанците не е предмет на преговори, а секој обид за исклучување ќе биде жестоко казнет“, порачуваат од ДУИ.
Македонија
Филипчe: ВМРО-ДПМНЕ се гушка со ДУИ, ние ја научивме лекцијата

Претседателот на СДСМ, Венко Филипче, во интервју за телевизија Сител категорично ја отфрли тезата дека неговата партија ја рехабилитира Демократската унија за интеграција (ДУИ), нагласувајќи дека политичкиот процес не функционира на таков начин.
„Не ја рехабилитирам ДУИ ниту јас, ниту СДСМ. Партија се рехабилитира со работа на своите членови, а на крај довербата ја враќаат или не ја враќаат граѓаните“, изјави Филипче.
Тој потенцираше дека социјалдемократите ги научиле лекциите од претходната коалиција со ДУИ и дека денес принципите на коалицирање се поставени на сосема поинакви основи: „Се темелат на вредности, на политики, на луѓе и на програми.“
Филипче истовремено ја насочи критиката кон ВМРО-ДПМНЕ, за која рече дека е токму таа партија која во моментов гради нова блискост со ДУИ, и тоа спротивно на ветувањата дадени во кампањата.
„Ние слушаме дека има некаква нова релација, дека ВМРО-ДПМНЕ е таа што иницирала приближување и затоплување на односите со ДУИ. Да потсетам – што ветуваа премиерот и ВМРО-ДПМНЕ? Дека ќе ги апсат ДУИ, беа криминалци, Соравија, Лотарија… Што видовме од тоа? Ништо. На Артан Груби му ја дигнаа рампата за Косово, а Максим Димитријевски со ДУИ си гласаа ДУП-ови во Куманово“, истакна лидерот на СДСМ.
Повикувајќи на политичка сериозност, тој повтори дека социјалдемократите во овој момент немаат никаква соработка со ДУИ и дека таа епизода за нив е затворена: „Ја научивме лекцијата, и таа добра лекција ќе ја користиме во градењето на идните коалиции“.
Македонија
Пожарите еден по еден се гаснат, но опасноста останува кај Тиквешко езеро

Утрово до 08:30 часот во Македонија евидентирани се вкупно шест пожари, од кои еден сè уште е активен, а пет се ставени под контрола, соопшти Центарот за управување со кризи (ЦУК).
Активниот пожар е во Општина Кавадарци, во близина на Тиквешкото Езеро, каде огнот зафатил нискостеблеста шума и сува трева. Екипите на терен работат на негово локализирање, но поради сувата вегетација и повремениот ветер гаснењето е отежнато.
Покрај овој пожар, властите потврдуваат дека пет други пожари кои вчера предизвикаа сериозни проблеми се веќе под контрола. Во Македонски Брод, во повеќенаменското подрачје „Јасен“, огнот зафати мешана шума, но со интервенција на пожарникарите и шумската полиција е спречено негово ширење.
На планината Кожуф, во Општина Гевгелија, вчерашниот приземен пожар е стабилизиран, а надлежните дежураат за да не дојде до повторно разгорување.
Во Општина Желино се случија два пожара – во селото Мерово, каде изгоре дел од мешана шума, и во селото Церово, каде пламените јазици зафатија ниска вегетација и делови од мешана шума. Двете жаришта се ставени под контрола, но остануваат ризични поради топлото време.
Пожар се случи и во селото Долгаец, во Општина Долнени, каде исто така беше зафатена мешана шума. И таму состојбата е стабилизирана.
Надлежните апелираат на максимална внимателност, бидејќи сувата вегетација и високите температури овозможуваат брзо ширење на пожарите, а најмал невнимателен потег може да предизвика сериозни последици.