Македонија
Meџити: Со 34,5 милиони евра ќе се гради кампус на Универзитетот „Мајка Тереза“
Одлука за инвестиција во вредност од 34,5 милиони евра за изградба на кампусот на Универзитетот „Мајка Тереза’“ во Скопје е донесена денеска на седница на Владата.
Првиот вицепремиер и министер за животна средина и просторно планирање Изет Меџити на прес-конференција попладнево информираше дека кампусот ќе има амфитеатар, канцеларии за академски дел, спортска сала, базен, менза. Ќе биде модерен комплекс со сите потребни елементи за подобар стандард за студентите, најави Меџити.
Овој проект, рече тој, не е само обична градба, туку симбол на нашата визија за светла иднина за младите и за нашата земја.
– Со децении генерациите сонувале за ваков образовен центар кој ќе го збогати не само знаењето туку и душата на целата нација. Денеска тој сон се остварува. Во Универзитетот „Мајка Тереза“ се запишани околу пет илјади студенти од цела земја. Проектот е спремен. Доставен е до Министерството за транспорт. Зборувавме со министерот Александар Николоски и заменик-министерката Калтрина Зеколи Шаќири, работат интензивно да се добие дозволата за градба која ќе биде еден од условите заедно со финансиската основа да се отвори тендер. Се подготвуваат постапките. Ќе се добие и дозвола за градба, што е предуслов за отворање, односно за камен темелник на кампусот, рече првиот вицепремиер.
Според Меџити, започнувањето на процедурите за изградба на овој универзитетски кампус од страна на новата Влада е повеќе од потребно и од посебно значење за создавање на најдобри услови за младите и за нивно задржување во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дождовите не го намалија бројот на пожари на отворено
„И покрај падот на температурата за околу 15 степени и дождовите што заврнаа, бројот на пожари и интервенции на отворен простор воопшто не се намалени. За жал се уште сме сведоци на неодговорно и несовесно однесување на група граѓани“, информираа денеска од ТППЕ Струмица, откако во изминатите три денови гаснеа четири пожари на отворено.
Како што информираа струмичките пожарникари, утрово во 05:20 часот на улицата „Ѓуро Ѓаковиќ“ била запалена помошна просторија.
Спречено е ширење на пожарот на куќата и поголема материјална штета, а денеска во 13:00 часот во атарот на село Вељуса била запалена нискостеблеста шума и сува трева.
Запалена била и нискостеблеста шума и сува трева во атарот на село Рич и нискостеблеста и борова шума во близина на браната „Водоча“.
Македонија
Oпштина Аеродром реагира: Ги унапредуваме условите во училиштата за разлика од времето со СДСМ кога децата немаа учебници
Остро ги отфрламе обвинувањата од СДСМ за тоа дека изминатите години не сме придонеле ништо за модернизација на нашите училишта, затоа што реалноста е сосема различна од нивните тврдења, реагира Општина Аеродром на обвинувањата што претходно денес ги изнесе СДСМ.
Општината нагласува дека додека СДСМ беа на власт, учениците не добиваа ниту учебници, што се основни средства за изведување на наставата, па поради тоа сега немаат никаков кредибилитет да ја критикуваат, ниту централната, ниту локалната власт.
„Ние како Општина, изминатите три години навистина се потрудивме учениците да го добијат најдоброто, а училиштата да ги следат современите текови на образовниот процес. Токму затоа ќе издвоиме дел од проектите и од активностите што се реализирани во училиштата во Општина Аеродром.
– Проект ,,Учиме да пливаме” воведовме бесплатни часови за пливање за секое прваче и за дечињата со посебни образовни потреби;
– Проект – грижа за дечињата со посебни образовни потреби – бесплатни часови по пливање и бесплатни часови за спортување со лиценцирани тренери во ООУ „Александар Македонски“ каде спортуваат и се дружат со останатите дечиња од групата;
-Проект Дигитализација на наставниот процес во училиштата;
– Бесплатен таблет за секој ученик во четврто одделение според концепцијата за дигитализација на основното образование и смарт табли за секое училиште;
– Проект – фотоволтаици на секое училиште – поставени фотоволтаици на сите основни училишта;
– Инвестиравме во енергетско ефикасни фасади на училиштата ( ООУ „Блаже Конески“ и подрачното основно училиште „Гоце Делчев“)
– Реконструкција на внатрешноста на ООУ „Лазо Ангеловски“, „Љубен Лапе“, „Ѓорѓија Пулевски“, „Браќа Миладиновци“, „Гоце Делчев“.
– Промена на санитарните јасли во „Љубен Лапе“, „Лазо Ангеловски“, „Браќа Миладиновци“, централното и подрачното училиште „Гоце Делчев“.
– Реконструкција на велосипедскиот полигон во „Ѓорѓија Пулевски“
– Секоја година учениците добиваат бесплатна училишна униформа;
– А, само оваа година Општината издвои 5 милиони денари за реконструкција и санација на училиштата;
Тука не застануваме, наредните денови ја отпочнуваме градбата и доградбата на ООУ „Блаже Конески“ со што значително ќе се зголеми капацитетот на ова училиште, едно од најстарите училишта во Аеродром, кое конечно ќе добие нов изглед.
Ова се само дел од инвестициите во училиштата во Аеродром, а ние остануваме посветени на унапредување на условите во воспитно-образовниот проецес, како за учениците, така и за наставниците“, се наведува во соопштението на Општина Аеродром.
Македонија
ДУИ: Неспособноста на губитниците од Вреди ја прекина постапката за двојазични сообраќајни табли
Јавното претпријатие за државни патишта ги стопираше постапките за проектот на претходното раководство кој имаше за цел промена на сите сообраќајни знаци на автопатиштата, согласно законот за употреба на албанскиот јазик, велат од ДУИ преку допис до медиумите.
Оценуваат дека се работи за чекор без преседан и штетен за спроведувањето на законот кој гарантира јазична еднаквост.
„И покрај тоа што заврши процесот на избор на фирма за реализација на проектот, сегашното раководство одлучи да ја прекине постапката. Ова може лесно да се провери во електронскиот систем за јавни набавки, што отвора сериозни прашања за односот на оваа влада кон спроведувањето на овој закон. Демократската унија за интеграција предупредува дека овие неуспеси се резултат на недостатокот на изборен легитимитет на оваа власт, нејзината јасна неспособност да управува со клучните процеси и нејзината зависност од политичките влијанија на ВМРО. Овие постапки се неприфатливи и сериозно му штетат на процесот на институционална еднаквост во државата“, велат од ДУИ.
Опозициската партија додава дека наместо да се соочат со своите одговорности, тие се обидуваат да ги прикријат овие масовни неуспеси со неосновани политички напади и непотребни прогони.