Обвинителството откри детали од вчерашната трагедија во Прилеп. Дежурен јавен обвинител од Основното јавно обвинителство Прилеп извршил увид во куќа лоцирана во центарот на градот, каде беа пронајдени телата на 11-годишно дете и двајца мажи на возраст од 43 и 63 години.

Според првичните сознанија од истрагата, трагедијата започнала поради семејни недоразбирања и нерешени имотно-правни односи. Како што информираат од обвинителството, 63-годишниот маж прво го убил својот внук од сестра и неговиот син, а потоа, откако оставил објава со објаснување на мотивите на социјалните мрежи, си го одзел животот.

„Издадена е наредба за обдукција на телата, како и за вештачење на сите трагите, оружјето и муницијата пронајдени на лице место“, соопштија од Јавното обвинителство, кое продолжува со истрагата за да ги потврди сите околности и детали поврзани со тројното убиство.

Од Министерството за внатрешни работи засега нема официјални информации што точно се случило, како и потврда за шпекулациите дека убиецот пред да си го одземе животот пукал кон полицаец, како и дека фрлил експлозивна направа.

Во рамки на засилената сообраќајна контрола што ја спроведоа полициските службеници од СВР Скопје вчера во периодот од 16:00 до 24:00 часот, биле казнети вкупно 128 возачи за различни прекршоци.

Контролата се одвивала на повеќе локации низ градот, а според информациите од Министерството за внатрешни работи, дел од прекршителите биле фатени како управуваат возило под дејство на алкохол, други возеле без возачка дозвола, а голем дел биле казнети и поради неправилно паркирање.

„Забележавме и непочитување на законските одредби поврзани со користење мобилен телефон за време на возење, како и возење без врзан безбедносен појас“, велат од МВР, додавајќи дека во контролата биле вклучени и мотоциклисти, кај кои биле откриени повеќе прекршоци, вклучително и управување без соодветна документација.

Како што информира полицијата за непрописно паркирани има 23 санкции, за возење без возачка дозвола девет мерки, за возење под дејство на алкохол две санкции.

Изречени се осум мерки за користење на мобилен телефон при возење, пет санкции за некористење на сигурносен појас, пет мерки за управување возило со несоодветна категорија, 15 санкции за возачи на моторцикл, како и други видови на сообраќајни прекршоци.

Сообраќајните контроли ќе продолжат и во наредните денови. Според МВР целта на овие акции е да се подигне свеста и да се спречат трагични последици на патиштата.

Во изминатото деноноќие пожарите повторно ја зафатија Македонија, но според утринскиот извештај на Центарот за управување со кризи (ЦУК), ситуацијата е под контрола. До 7 часот утринава, евидентирани биле вкупно 28 пожари на отворен простор, од кои два сѐ уште се активни, четири се ставени под контрола, а дури 22 се целосно изгаснати.

Активните пожари се бележат во селото Николич, општина Дојран, каде што гори нискостеблеста шума, како и во Чучер Сандево, во пределот меѓу селата Горњани и Блаце, каде што се работи за шумски пожар со посложен пристап.

„На терен се сите расположливи сили – пожарникари, припадници на шумската полиција и доброволци. За среќа, поголемиот дел од пожарите се изгаснати, но вниманието сè уште е насочено кон Дојран и Чучер Сандево, каде огнот е активен“, велат од ЦУК.

Во меѓувреме, четири пожари се ставени под контрола. Тоа се локациите кај Црешнево, Крапа и Локвица во Македонски Брод, каде што горела деградирана дабова шума, потоа с. Слатино (исто така во Македонски Брод), с. Џидимирци во Велешко и с. Перово во Ресен, каде што горела трска.

Позитивна е веста што голем дел од пожарите се успешно изгаснати. Најмногу интервенции имало во западниот и југоисточниот дел од земјата – во општини како Струга, Штип, Куманово, Гевгелија, Кичево, Охрид, Виница и Македонски Брод, каде што беа зафатени депонии, ниска вегетација и шумски предели.

Од ЦУК апелираат до граѓаните да не палат оган на отворено и да пријавуваат секој сомнителен чад или пламен. Во услови на високи температури, и најмала искра може да предизвика голема катастрофа.