Претседателот на Комисијата за европски прашања на Собранието на Република Македонија, Артан Груби, за време на официјалната посета на Софија имаше пријателска и отворена средба со членовите на Комисијата за европски прашања и контрола над европските фондови, предводена од Кристијан Вигенин. На средбата беа разменети идеи, мислења и најдобри пракси и уште еднаш беше потврдено дека интеграцијата и напредокот на земјите од Западен Балкан се во фокусот на приоритетите на Република Бугарија.

Пратениците од Комисијата на Народното собрание на Република Бугарија ја искажаа својата готовност со конкретни чекори да отпочнат соработка со својата партнерска Комисија за европски прашања во Собранието на Република Македонија и да ѝ помогнат во градењето на институционалната рамка пред отпочнувањето на процесот на преговори за членство во Европската Унија, врз основа на научени лекции од Република Бугарија.

Груби во рамките на официјалната посета на Република Бугарија се сретна и со Групата за пријателство Бугарија-Македонија во Народното собрание на Република Бугарија, на чие чело се наоѓа г. Борис Ванѓелов.

На средбата беше заклучено дека испраќањето јасни сигнали на добра соработка меѓу двете држави  ќе покаже дека нашата стратешка цел е да споделуваме заеднички вредности во НАТО и Европската Унија.  Тие беа согласни дека конструктивната соработка со опозицијата и градењето консензус за клучните прашања останува неопходна за успешен евроинтегративен процес и градење одржлива иднина за земјата.

Груби оствари средба и со потпретседателот на Народното собрание на Република Бугарија, г. Емил Христов, и г-ѓа Џема Грозданова, претседател на Комисијата за надворешна политика. На состанокот преовладуваше ставот дека треба да се градат нови мостови на пријателство и соработка на сите нивоа меѓу двете држави и меѓу двата парламента, како и дека активностите треба да бележат на интензитет и да се динамизираат во иднина.

До крајот на овој месец министрите за надворешни работи на Македонија и на Грција, Никола Димитров и Никос Коѕијас, ќе имаат нова средба. Точниот датум сè уште не е утврден, рече портпаролот на Владата, Миле Бошњаковски.

„Сè уште сме големи оптимисти и разговорите ќе продолжат со истата динамика. Бараме решение што ќе биде достоинтвено за граѓаните на двете држави“, рече Бошњаковски.

Последната средба на Димитров и Коѕијас се одржа на 12 април во Охрид. Македонскиот министер тогаш изјави дека разговарале за сите прашања и ставови што ја прават разликата во спорот за името. „Од денешната средба има напредок, но сè уште постојат разлики и неусогласени ставови“, рече Димитров. Тој истакна дека на средбата првпат се разговарало за временската рамка и чекорите како ќе се имплементира решението за проблемот за името.

Претседателот на Комисијата за европски прашања, Артан Груби, во рамките на официјалната посета на Бугарија оствари средба со министерката за бугарското претседателство со Советот на ЕУ, Лилијана Павлова.

Како што стои во соопштението на Комисијата, Груби на средбата изразил благодарност за смелоста што за време на првото претседателство на Бугарија со Советот на Европската Унија беше ставена како приоритет една толку важна и чувствителна тема – како да се убедат Брисел и сите земји членки на Унијата дека проширувањето на Унијата со земјите од Југоисточна Европа мора да продолжи како проект.

„Мирот, спокојството, стабилноста и иднината на Европа минуваат низ Западен Балкан, европскиот проект нема да биде завршен без нив“, рекол Груби, кој додал дека датумот за почеток на преговорите е следен предизвик за Македонија.

Павлова на средбата истакнала дека Бугарија ќе вложи напори за повеќе инфраструктурни, енергетски и други проекти за приближување на земјите од Западен Балкан кон Европската Унија, што на самитот на шефови на држави, кој ќе се одржи во Софија на 17 мај, ќе резултира со официјална декларација која ќе биде надополнета и со анекс што ќе содржи иницијативи за конкретни проекти.