Надворешна политика
Заев на средбата со Бабиќ: Ќе избереме нов собраниски претседател, ќе има и нова Влада

Претседателот на СДСМ, Зоран Заев во петокот се сретна со амбасадорката на Босна и Херцеговина, Лепа Бабиќ, пришто разговараа за потребата од што побрза разврска на политичката криза во Македонија, соопштуваат од партијата.
„Очекуваме во понеделник да се избере новиот претседател на Собранието кој ќе го извести Ѓорге Иванов дека е должен веднаш да ми го даде мандатот за состав на новата реформска Влада“, сооопшти Заев.
На средбата се разговараше за очекувањата на домашната јавност, граѓаните и бизнис секторот за стабилизација и развој на Македонија.
„Европската унија и НАТО ги поддржуваат демократските процеси во Македонија и отвораат врати за овие стратешки перспективи на земјата. Имаме демократски обезбедено парламентарно мнозинство од 67 пратеници и Програма на новата реформска Влада за унитарна Македонија, посветена на потребите на граѓаните. Не смее никој да ги блокира институциите за лични цели и затскривање од одговорност за направени криминални дела. Знаеме дека имаме работа со неразумно и исплашено раководство на ВМРО-ДПМНЕ коешто е подготвено да ги жртвува интересите на граѓаните и државата и затоа внимателно ги движиме процесите. Но граѓаните избраа промени и тие ќе се случат“, рече Заев.
На состанокот се разговараше и за продлабочување на економската и културната соработка помеѓу Република Македонија и Босна и Херцеговина во блиска иднина./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Андоновски: Извештајот на Стејт департментот е најкритички, Владата е најкорумпираниот елемент на државата

Последниот извештај на Стејт департментот на САД за заштита на човековите права во Македонија е најкритичниот во последните години во врска со гарантирањето на човековите права од страна на Владата и, генерално, властите, изјави Стефан Андоновски, меѓународен секретар на ВМРО-ДПМНЕ.
Според него, јасно е дека Владата е најкорумпираниот елемент на државата.
„И ако ги анализираме и претходните извештаи, јасно е дека ставот на Стејт департментот од опоменувачки во последните три години стана осудувачки за работата на оваа Влада и од умерена и внимателна критика прерасна во директна осуда на она што Владата го прави“, рече Андоновски.
Тој додава дека корупцијата стана неизлечива болест за оваа Влада.
„На 47 страници 22 пати извештајот зборува за висока корупција во сите ешалони на власта. И ако во 2020 или 2021 година државни службеници биле сметани за корумпирани, сега корумпирани се цели слоеви на владејачката елита. Во судството, од одредени примери на погрешно судиско однесување, сега неправдата и корупцијата прераснаа во проблем број 1 и на граѓаните и на меѓународните партнери. Отсуството на судска независност и драстично намалената доверба – најниско измереното ниво на доверба во правосудниот систем од независноста на земјата, односно четири отсто, само ги покажува вистините што сите ние ги живееме секој ден.
Извештајот ја лоцира и одговорноста. Екстремно ниската доверба на јавноста во судството се должи на значителна судска корупција затоа што судиите намерно ги одложуваат судењата или апелациските разгледување за да овозможат стапување во сила на институтот застареност. И за ова не е виновно само правосудството, јасно е дека е виновна Владата“, нагласи тој.
Андоновски наведе делови од извештајот: „Владата не секогаш ги почитувала судската независност и непристрасноста. Владата не ја почитувала. Случаите на несоодветно однесување на судството, несоодветниот политички и деловен притисок на судиите“ се дел од причините за мизерната состојба во судството. Затоа, Ковачевски, ако почнува ветинг, тој треба да почне од себе. Да се прочисти себе од Владата затоа што тој е оној што владее со непотизам, купување услуги, лична корист и судир на интереси.
Извештајот алармира и за директни злоупотреби од страна на припадниците на безбедносните сили, извештаи дека полицијата злоупотребувала притвореници и затвореници и употребувала прекумерна сила, полициски распити на новинари за т.н. информативни интервјуа. Извештајот забележува и нечовечко и понижувачко постапување и тешка пренатрупаност во одредени затворски одделенија. На крајот, новинарските слободи се сериозно засегнати“, рече Андоновски.
Јасно е дека сите гледаат оти корупцијата ја јаде Владата на ДУИ и СДСМ, заклучи Андоновски.
Македонија
Првпат Македонец ќе оценува напредок на друга држава: Николоски избран за известител за Босна и Херцеговина

Потпретседателот на ВМРО-ДПМНЕ, Александар Николоски, објави дека мониторинг-комитетот на Парламентарното собрание на Советот на Европа го избрал за известител за Босна и Херцеговина.
„Тоа значи дека во следниот период ќе го следам прогресот на Босна и Херцеговина во делот на исполнување на обврските што оваа држава ги има преземано кон Советот на Европа, пред сè, во делот на почитувањето на основните човекови права, владеењето на правото, борбата со криминалот и корупцијата, изборните реформи, како и воспоставувањето функционална правна држава.
Ова е огромна чест за мене. Но, во исто време претставува признание за Македонија затоа што македонски пратеник, конечно, е во позиција да пишува извештаи и да известува за она што се случува во други држави, а не само Македонија да е под мониторинг и други да известуваат за Македонија.
Ова значи многу за Македонија затоа што значи многу за имиџот на државата, значи дека Македонија може и има политичари што може да ја претставуваат надвор од државата, а јас ќе се потрудам со целиот мој капацитет и со целиот мој авторитет да направиме добри работи за регионот, од кој дел секако е и Босна и Херцеговина“, вели Николоски.
Тој се надева дека државата ќе напредува и дека во Сараево, во Бања Лука, во Мостар и во другите градови ќе има напредок кон едно пофункционално владеење на правото, напредок кон една хармонизирана држава, напредок кон исполнување на обврските што ги има Босна и Херцеговина кон Советот на Европа и, како што рече, почитување на Дејтонскиот мировен договор и сите други одлуки што ги имаат донесено Советот на Европа, ЕУ и ОН за Босна и Херцеговина.
Македонија
Османи – Давидоју: Во фокусот пристапните преговори во ЕУ и реформите

Министерот за надворешни работи, Бујар Османи, денес оствари средба со специјалниот пратеник на Романија за Западен Балкан, амбасадорот Адријан Давидоју, кој престојува во работна посета на нашата држава.
Османи ја поздрави одлуката за назначување специјален претставник за Западен Балкан како израз на интересот на Романија за севкупните процеси во регионот, вклучително и во Северна Македонија.
Во фокусот на разговорите беа почнатите пристапни преговори за членство на нашата земја во Европската Унија, реформскиот процес и конзистентната политичка и техничка поддршка на Романија во тој контекст. Беше направен осврт и врз планираните уставни промени, со кои дополнително ќе се зајакнат демократските капацитети на нашата држава и општество.
Соговорниците разменија мислења за предизвиците на претседавањето со ОБСЕ и беа презентирани досега преземените активности на нашето претседавање со Организацијата во 2023 година. Се разговараше и за претседавањето со САД – Јадранската повелба, како и подготовките за претседавањето со процесот за соработка во Југоисточна Европа, кое почнува во јули.
Во однос на последната средба на делегациите на Косово и Србија, беше нагласено дека изнаоѓањето решение за отворените прашања е од суштинско значење за целиот регион, а одлуката разговорите да се реализираат во Охрид претставува важно признание за Северна Македонија.