Претседателот на ВМРО-ДПМНЕ, Христијан Мицкоски, од денеска замина во мини дипломатска офанзива кај сестринските партии во регионот и Европа, информираат од опозициската парија.

Од таму додаваат дека Мицкоски ќе оствари средба со унгарскиот премиер, Виктор Орбан, и со словенечкиот премиер, Јанес Јанша.

„Мицкоски веќе рече дека секоја средба има своја цел посочувајќи дека како една од темите на која ќе се разговара на средбите е токму блокираната европска перспектива на Република Македонија, како и за можноста Унгарија и Словенија да помогнат за придвижување кон европската иднина“, се посочува во партиското соопштение.

„Независно што ВМРО-ДПМНЕ е во опозиција, сметам дека треба да се искористи целиот расположлив потенцијал да се направи своевиден притисок и да се придвижиме кон патот на ЕУ. Имаме две опции – или да се задушиме во домашни обвинувања за тоа кој шири лажни вести, а кој ја говори вистината, па да се спроведува операција со која ќе се сака да се прикрие анексот на договорот за кој јавно говори Бугарија, а гледаме дека власта во Македонија моли бога да не се дознае. Втората опција е да не чекаме, да тропнеме на вратите што можеме да ги отвориме и да побараме поддршка за она што е заедничка стратегиска цел, а тоа е одблокирање на патот кон ЕУ“, изјави Мицкоски пред планираните посети.

Успешната соработка во однос на борбата против илегалната миграција на регионално и на меѓународно ниво беше во фокусот на средбата помеѓу министерот за внатрешни работи Оливер Спасовски и амбасадорката на Обединетото Кралство, Рејчел Галовеј, која се одржа денеска во просториите на МВР.

Притоа било истакнато дека Северна Македонија, кога станува збор за борбата против илегалната миграција, преставува одличен пример како се стекнува имиџ на сериозна земја.

На средбата, меѓу другото, се разговарало и за важноста од забрзување на процесите за исполнување на НАТО-стандардите во институциите во земјава, информираат од МВР.

Двете страни во текот на разговорите ги потврдиле своите заложби за уште поинтензивна соработка во иднина на сите полиња за одржување на безбедноста.

Министерот за надворешни работи, Бујар Османи, во рамките на официјалната посета на Грција се сретна со претседателката Катерина Сакеларопулу, грчкиот премиер Кирјакос Мицотакис, како и алтернативниот министер за европски прашања, Милтијадис Варвициотис.

Како што информираат од ресорното министерство, разговорите биле насочени кон динамизирање на севкупните односи меѓу двете земји преку посветена имплементација на преспанскиот договор со цел развивање и зајакнување на заедничкото партнерство.

„Само со заеднички напори можеме стратешкото партнерство да го претвориме во долгорочно и стабилно пријателство, што како земји соседи со сигурност ќе донесе подобар живот за граѓаните на двете земји. Во регионот добивме нова реалност, докажавме дека сите предизвици може ефикасно да се решат преку заеднички и координирани напори. Оттука, јас цврсто верувам дека соработката меѓу Северна Македонија и Грција е дефинитивно нова интегративна моќ за целиот регион“, истакнал Османи.

На средбите бил нагласен и досегашниот активен ангажман на Грција во делот на европските интеграции на Северна Македонија, при што било потенцирано дека земјата остануваа наш доследен поддржувач, еден од главните лобисти и промотори во процесот.

„Не смее да биде загрозена европската перспектива на земјите од Западен Балкан. Сите мора да вложиме во развојот на добрососедските односи, да ја засилиме регионалната соработка и да ја зачуваме европската иднина на регионот. Само преку рушење на стереотипите од минатото и создавање стабилни пријателства ќе обезбедиме просперитетна иднина за нашите граѓани“, заклучил Османи.