Македонскиот претседател Ѓорге Иванов и неговиот албански колега Бамир Топи на денешната средба во Скопје констатираа добри политички односи меѓу двете земји и се заложија за поголема економска соработка

За Македонија и Албанија интеграцијата во евроатлантските структури е незаменлива алтернатива за натамошен просперитет и стабилност на регионот. Двете земји имаат задоволително ниво на билатерални односи кои ги градат низ отворен дијалог за сите прашања од заемен интерес, а фокусот во иднина треба да се стави на подобрување на економската соработка, оценија македонскиот и албанскиот претседател, Ѓорге Иванов и Бамир Топи, по денешната средба во Скопје.Претседателот Иванов посочи дека Македонија и Албанија ги поврзуваат многу работи, меѓу кои заедничката историја, географија, како и заедничките предизвици во делот на општествените реформи и трансформации.„Значаен сегмент во нашите односи треба да биде економската соработка за која ценам дека воопшто не кореспондира со нивото во политичките односи, со можностите на двете економии и со фактот дека сме соседи, истакна Иванов.Тој изрази очекување дека во наредниот период ќе продолжи заемната поддршка на планот на ЕУ и НАТО-интеграциите бидејќи, како што додаде, интеграцијата на сите земји од регионот ќе ја зацврсти неговата стабилност.Говорејќи за придобивките од визната либерализација кои македонските граѓани веќе ги чувствуваат, Иванов изрази надеж дека наскоро ќе бидат достапни и за граѓаните на Албанија со што ќе овозможи нејзин побрз напредок како демократска, слободна и отворена држава.Албанскиот претседател Топи истакна дека сите треба да го уживаат правото на слободно движење и оти албанските граѓани наскоро ќе добијат безвизен режим.Тој го поздрави спроведувањето на Охридскиот рамковен договор кој придонесува за стабилниот развој на демократските односи и за еднаквост на сите граѓани во Република Македонија. Топи ги повика сите политички фактори да се придржуваат кон спроведувањето на Договорот верификуван од меѓународната заедница.Двајцата преседатели на средбата разговарале за повеќе прашања од економската област, за изградбата на Коридорот 8, железницата и заштитата на еко-зоната Охрид – Преспа.За време на дводневна посетата, албанскиот претседател Топи ќе се сретне и со претседателот на Собранието на Република Македонија Трајко Вељаноски и со македонскиот премиер Никола Груевски.Топи ќе има обраќање и пред пратениците во македонското Собрание.Шефовите на двете држави, Иванов и Топи, ќе имаат поздравни обраќања и на македонско-албанскиот бизнис форум што ќе се одржи утре во Скопје, со цел да се интензивираат економските односи меѓу Македонија и Албанија.Во агендата на албанскиот претседател се и средби со лидерите на ДУИ, ДПА и на НД, Али Ахмети, Мендух Тачи и Имер Селмани, како и со претседателот на СДСМ, Бранко Црвенковски.Делегацијата, предводена од претседателот Топи, ќе ги посети и општините Тетово и Дебар, каде се очекува да биде прогласен за почесен граѓанин.