Поранешниот македонски амбасадор во Унгарија, а сегашен во Грција, Дарко Ангелов ги отфрли пишувањата во некои медиуми за одземањето на орденот „8-ми Септември“, кој на унгарскиот премиер Виктор Орбан му беше доделен од страна на претседателот Ѓорге Иванов, потенцирајќи дека истиот е доделен поради извонредните заслуги и поддршка за евроинтеграциите на Македонија.

„Како поранешен македонски амбасадор во Унгарија, токму во периодот на подемот на соработката со оваа држава (2010-2014) и обезбедената силна унгарска поддршка за македонските надворешно-политички цели, се чувствувам должен да го напишам ова. Уште повеќе, како иницијатор на предлогот за доделување на орденот „8-ми Септември“ на премиерот Орбан од страна на претседателот Иванов, сносам и значаен дел од одговорноста. Како што е јасно наведено во самиот указ за доделување на орденот од страна на претседателот Иванов, истиот се додели за извонредните заслуги на премиерот Орбан и на унгарската влада за силната, континуирана поддршка на РМ за нејзините евро-атлатнтски интеграции“, вели Ангелов.

Според него, Македонија има бројни пријатели, но ретки се тие како унгарскиот премиер Орбан и неговата земја, кои не еднаш го исполниле она што им го ветиле на македонските државни претставници.

„Република Македонија има бројни пријатели, но ретки се тие како премиерот Орбан и Унгарија кои не е еднаш го исполнија ветеното дадено на средбите со нашите државни претставници; за разлика од повеќето други, поддршката не остануваше само на реторика и куртоазија, туку беше проследена со конкретна унгарска активност во Брисел и на други места каде поддршката е најзначајна. Унгарскиот премиер во 2011 год. го направи и првиот смел чекор на еден странски државник во поддршка на РМ кога упати писмо до сите ЕУ премиери и раководството на Унијата во кое истакна дека РМ треба безусловно да ги започне преговорите за членство, додека разговорите за името да се одвиваат паралелно, со што ниту еден интерес на Грција нема да биде загрозен. За време на унгарското претседавање со ЕУ истата година, имаше бројни слични гестови на унгарските претставници, како и претседателска и премиерска официјална посета на Будимпешта, односно Скопје (уникатна ситуација во споредба со било кое друго ЕУ претседавање пред и потоа)“, објаснува Ангелов.

Тој додава дека кулминацијата во односите помеѓу двете земји се случила во 2012-та година, кога Унгарија го призна уставното име на Македонија.

„Сите македонски новинари, уредници, па и некои политичари, кои се „загрижени” за состојбата со демократијата во Унгарија, а сега и за справувањето со бегалската криза, ова многу добро го знаат, како и фактот дека орденот се додели за унгарската надворешно-политичка поддршка за РМ, ни повеќе, ни помалку. И самиот премиер Орбан, при примањето на орденот од претседателот Иванов истакна дека признанието го смета за израз на благодарност кон сиот унгарски народ. Затоа, новинари, критикувајте ја внатрешната политика на Унгарија колку сакате, но молам, вашите внатрешно-политички гледишта и интереси во РМ не ги ставајте на сметка на македонско-унгарското пријателство за кое требаше месеци и години вложен труд да се издигне на нивото кое само би посакале да го имаме и со други држави“, заклучува поранешниот македонски амбасадор во Унгарија./крај/мф/бс

Извор: Макфакс