Надворешна политика
Австрија ќе помогне во решавањето на спорот за името, но бара и реформи
Австрија ќе направи се што може за да ја забрза динамиката на решавањето на спорот за името меѓу Македонија и Грција, но истовремено инсистира и на сите неопходни реформи кои ќе ја придвижат земјата на европскиот пат, е пораката на шефот на австриската дипломатија Себастијан Курц, кој во средата во Скопје оствари средба со својот македонски колега Никола Попоски.
Според Курц, Австрија како земја партнер на Македонија има одредени очекувања околу тоа како треба да се одвиваат работите, се со цел да се обезбеди поволна клима за привлекување на странски инвестиции, а како дел од ова е и враќањето на опозицијата во Парламентот, со што би се продолжил политичкиот дијалог.
„Како партнери имаме одредени очекувања и претстави како треба да се одвиваат работите кај нашиот партнер. За да може да се гарантира добра клима за инвестирање сметам дека се нужни реформи на економски план а исто така и во однос на правдата. Исто така ја замолувам и опозицијата да се врати во Парламентот бидејќи тоа е местото каде што се води политички дијалог и дискурс, а секако јас како одговорно лице за интеграција имам и голема желба за Македонија, каде се вклучени и меѓуетничките односи кои треба да функционираат беспрекорно“, порача австрискиот министер.
Шефот на македонската дипломатија Никола Попоски пак порача дека Македонија ги цени заложбите што ги прави Австрија, која е втор најголем инвеститор во земјата и е еден од клучните двигатели на економските активности, како во Македонија, така и во регионот.
„Во периодот во кој очекуваме и формално отпочнување на преговорите со ЕУ, најпотребно за Македонија е да се искористи инструментот Пристапен дијалог на високо ниво (ХЛАД), и да продолжиме со реформите кои се значајни во секој случај пред и по членството во ЕУ и на тој начин да помогнеме за создавање на една поволна клима за реализација на најбитниот проект на овој дел во Европа, а тоа е интеграцијата во ЕУ. Австрија и досега беше еден од главните поддржувачи и двигатели на овој процес а според денешните разговори тоа ќе остане и во иднина. Ова е најзначајната порака која можеме да ја упатиме услови кога Европа е преокупирана со поголем број на проблеми од економска и политичка природа“, изјави шефот на македонската дипломатија.
Во поглед на спорот за името со Грција, Курц смета дека овој проблем трае навистина предолго и дека двете страни голема одговорност за изнаоѓање на решение.
„Сметаме дека треба да се дојде до решение за спорот за името, тој трае предолго и ние како Австрија ќе извршиме притисок и ќе направиме што можеме за да внесеме развој и динамика за решавање на ова прашање. Потребна е севкупна свесност на цела Европа дека нерешавањето на овој проблем може само да наштети. За мене не е јасно зошто во однос на овој спор нема никакво придвижување, а двете страни како вклучени страни имаат многу поголеми работи за решавање како што се прашањата од економската сфера и благосостојбата. Не ми замерувајте поради тоа што сум оптимист и сметам дека по изборите во Грција ќе има една позабрзана динамика во однос на овие разговори“, вели Курц.
Двајцата министри се осврнаа и на темата за слободата на медиумите, при што австрискиот министер порача дека оваа област е од големо значење за Унијата поради тоа што на тој начин се врши контрола и одржување на демократијата.
„Слободата на медиумите е од голема важност за ЕУ, само така можеме да извршиме еден вид на контролен механизам за жива демократија, и ова се прашања кои се важни за да се одржи демократијата. ЕУ тоа го бара од сите свои земји членки и од оние коишто се аспиранти и имаат потенцијал да станат нејзини членки“, потенцира Курц.
„Се разбира дека кога се работи за медиумската сфера сите имаат свои одговорности, и политичарите и медиумите и новинарите. Во однос на мерките кои ги преземаме се работи за едно од поглавјата кое е дел од поширокиот дел кој го водиме со Комисијата и за кој трета година имаме конкретни реформи кои се реализирани. Имаме донесено еден законски пакет во соработка со ЕК и сите стручни соговорници на домашно и меѓународно поле и тие законски примени имаат определен број на промени кои во нашата ситуација се сметаат за значителен исчекор, нешто што е констатирано од ЕК, ОБСЕ, Советот на Европа и другите институции“, изјави Попоски.
Австрискиот министер исто така најави дека кон крајот на август годинава во Виена ќе се одржи Виенска конференција посветена на евроинтеграциите на земјите од западен Балкан и од која се очекуваат и конкретни резултати во поглед на европскиот пат на сите земји кои се аспиранти за да станат членки на Унијата./крај/мф/бс
Извор: Фото/МИА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.