Вицепремиерот за евроинтеграции Фатмир Бесими смета дека доколку политичките партии не успејат да го испочитуваат политичкиот договор од 2-ри јуни, а воедно не се исполнат ниту потенцираните реформски приоритети, тогаш Македонија би можела да се соочи со губење на препораката за почеток на преговори со Европската унија (ЕУ).

„Важно пред сè за Република Македонија и граѓаните на Република Македонија, потоа за извештајот, што всушност значи еден патоказ за нашето движење кон членството во ЕУ, секако е важно политичкиот договор што е постигнат на 2-ри јуни и последователните протоколи, за испочитување на истиот договор, да се исполнуваат целосно, а во исто време е и пакетот на итните реформски приоритети. Тоа е пасошот за Република Македонија за извештај кој ќе носи препорака или треба да носи препорака и за натамошно приближување кон започнување и отворање на преговори на Република Македонија за членство во Европска унија“, вели Бесими во неделното интервју за Радио Слободна Европа.

Бесими потенцира дека она што е важно во моментов, е тоа што беше договорено на 2-ти јуни да се испочитува целосно, како во смисла на содржина, така и во смисла на временските рокови.

„Очигледно во некои активности роковите се пробиени, но останува обврската за политичките партии да го испочитуваат тоа што е договорено, значи Македонија за да има извештај кој е афирмативен за Република Македонија пред Советот на Европска унија, то ест, да се испочитува целосно пакетот, односно договорот од 2-ри јуни и да се работи во исполнување на сите реформи од ургентните реформски приоритети. Овие се обврските што ги има Република Македонија“, смета Бесими.

Во однос на препораката од страна на Европската комисија, која шест години по ред е позитивна и препорачува почеток на преговорите со ЕУ, Бесими додава дека таа мора секоја година да се заработи, а оваа година добивањето на препораката зависи и од спроведувањето на она што политичките лидери го договорија на 2-ри јуни.

„И оваа година тоа што се постигна со 2-ри јуни и со пакетот итни реформски приоритети Македонија е на патот кон повторно добивање на уште една препорака, но тоа не е загарантирано. Доколку не се испочитува политичкиот договор од 2-ри јуни и доколку нецелосно работиме на исполнување на итните реформски приоритети, може да се случи и да не ја добиеме препораката. Меѓутоа интерес и на Република Македонија и на Европска унија секако е да се работи на подобрување на климата и реформскиот ангажман за Македонија и оваа година да има препорака. Значи во таа насока оди, како што веќе работат и на исполнување на политичкиот договор и во однос на реформите, Македонија чекори кон еден извештај со препорака“, вели Бесими за Радио Слободна Европа.

Во поглед на процесот на евроинтеграциите пак, Бесими додава дека кај земјите од регионот, вклучувајќи ја и Македоија, постои оптимизам дека Берлинскиот процес, покренат од страна на германската канцеларка Ангела Меркел, е уште една потврда дека проширувањето е една од темелните политики на ЕУ, како во однос на инфраструктурни проекти за интегрирање и поврзување на регионот, а исто така и во однос на нови можности за регионален пристап, како што се образованието и младите.

„Во текот на оваа година, на Форумот во Виена се адресираше уште едно прашање за отворени билатерални прашања на земјите од Балканот, кое се адресира како уште едно прашање што треба да се надмине, да се најдат механизми со цел регионот што поскоро да се вклучи, односно да стане членка на ЕУ. Значи, такви процеси секако дека го враќаат оптимизмот и во лидершипот во регионот, но и кај граѓаните од земјите на Западен Балкан за нивната европска перспектива“, заклучува Бесими во неделното интервју за РСЕ./крај/мф/бс