Македонија и Ватикан споделуваат заеднички духовни и културни вредности кои претставуваат цврсти мостови меѓу двете земји, а билатералните односи меѓу двете страни се одлични, со можност за нивно унапредување во областа на културата, науката и здравството, согласни премиерот за спроведување на изборите Емил Димитриев и државниот секретар на Ватикан, кардиналот Пиетро Паролин.
 

Македонија и Ватикан споделуваат заеднички духовни и културни вредности кои претставуваат цврсти мостови меѓу двете земји, а билатералните односи меѓу двете страни се одлични, со можност за нивно унапредување во областа на културата, науката и здравството, согласни премиерот за спроведување на изборите Емил Димитриев и државниот секретар на Ватикан, кардиналот Пиетро Паролин.

„Цивилизациското наследство на Мајка Тереза и светите браќа Кирил и Методиј создадоа нераскинливи историски врски за кои се обврзавме дека ќе ги негуваме и во иднина. Го поздравуваме досегашниот развој на билатералните односи меѓу Република Македонија и Светиот Престол, релации кои се одраз на меѓусебно разбирање и искрена почит. Се согласуваме дека пред нашите две земји стојат неискористени потенцијали за нивно натамошно унапредување, како на билатерален, така и на меѓународен план“, истакна премиерот Димитриев.

Димитриев додал дека со Паролин разговарале и за плодната соработка во областа на културата, здравството, науката, образованието, покренувајќи иницијативи за дополнително проширување на соработката во сферите на заемен интерес. Кардиналот Паролин, пак, додал дека односите меѓу Македонија и Ватикан се одлични.

„Сепак, на средбата посочивме на можноста за подобрување на тие односи во одредени точки. Заклучивме дека споделуваме заеднички вредности меѓу кои промовирањето на мирот, духовните вредности, соживотот, почитувањето на различностите. Сето тоа се вредности кои носат подобрување на животот во едно општество“, пораа Паролин.

На средбата станало збор и за повеќе етички теми кои се однесуваат на животот, семејството и бракот, а разговарано било и за почитувањето меѓу религиите, но и за проблемите кои се врзани со манипулација на религиозните чувства како причина за создавање конфликтни ситуации.

Двете страни разговарале и за европската и евроатлантската перспектива на Македонија, пришто според Димитриев, „поддршката од Ватикан секогаш имала голема важност за нас и апелиравме таа да продолжи со уште поголем интензитет во периодот кој следува“.

Околу можноста за евентуална посета на папата Франциск на Македонија, кардиналот истакна дека нему веќе му е упатена покана од страна на македонската Влада и на Католичката црква. Притоа додаде дека се посочени одредени датуми како оној за одбележување на 1.100 годишнината од раѓањето на Свети Климент Охридски или канонизацијата на Мајка Тереза во септември годинава.

Паролин сепак додал дека одлуката за посета на Македонија не е донесена ниту пак може да се зборува за некаков датум и дека годинава ќе се случуваат многу важни настани во Рим бидејќи била прогласена за година на милосрдието, со што Папата веќе откажал многу посети за да посвети доволно внимание на овие активности./крај/мф/бс