Европскиот парламент (ЕП) ја поддржува европската иднина на Македонија, но истовремено порачува дека политичките партии во земјата не треба да трошат време и да штедат напори за спроведување на Договорот од Пржино.

Европратениците Иво Вајгл, Едуард Кукан и Ричард Ховит во вторникот во Скопје порачаа дека во моментов од најголемо значење е сите политички актери во Македонија да се фокусираат кон целосното спроведување на политичкиот договор.

„ЕП покажува постојан интерес за Македонија и во иднина ќе го прави тоа, важно е Македонија да има европски пат и да се задржи на него. Во периодот што помина се направија важни работи, политичките партии покажаа дека можат да соработуваат и да постигнат консензус. Од состаноците, сепак, можеме да видиме дека сé уште постојат разлики и гледишта околу брзината на реформите и околу некои останати забелешки. Посакуваме поголема транспарентност во медиумите и медиумска слобода, може многу да се направи и да се преземат многу конкретни чекори во претстојниот период за да се подобри состојбата во медиумите. Од другите прашања за кои разговаравме, тука беа и изборите и изборниот процес. Очекуваме дека Македонија ќе продолжи по патот на реформите, бидејќи тие само што започнаа. Времето мора да се искористи рационално и партиите мора ги имаат предвид главните интереси на земјата“, изјави словенечкиот европратеник и известувач за Македонија во ЕП, Иво Вајгл.

Според неговиот сограѓанин и исто така европратеник Едуард Кукан, најважната порака е дека Европарламентот сака Македонија што поскоро да излезе од политичката криза во која веќе предолго се наоѓа.

„Се надеваме дека Македонија ќе се развива на својот евроатлански пат. Имавме интензивни разговори со претставниците на партиите, граѓанското општество, претставниците на ДИК, Специјалното обвинителство и сите останати важни актери, ги понуднивме нашите услуги за да може што поскоро да се изнајде решение за земјата да излезе од политичката криза која веќе предолго е тука, и да направи вистински напредок за остварување на европските цели. Имаме добра основа за ова, а тоа е Договорот од Пржино, важно е тој сега да се имплементира, и тоа ќе го отвори патот напред, и сметам дека треба да е патриотска одговорост на партиите да се погрижат ова да се случи. Искрено се надеваме дека и покрај тоа што состојбата е сложена, договорот ќе се имплементира и земјата ќе се движи напред“, порача Кукан.

Британскиот европратеник Ричард Ховит, пак, изјави дека доколку спроведувањето на Договорот течело како што треба, тие немало да бидат во земјата, порачувајќи дека единствената иднина на земјата е преку целосното спроведување на овој политички договор.

„Неделава ќе видите комбиниран дипломатски напор од ЕУ, приајтелите во САД, од нас директно во ЕП а подоцна неделава и од ЕК и еврокомесарот Хан. Секој од нас го кажува истото на овдешните политичарите, а тоа е дека единствената иднина е преку целосната имплементација на Договорот од Пржино. Тој не е целосно имплементиран, инаку немаше да бидеме тука. Тоа мора да ја вклучува и оставката на премиерот, како и структурните реформи и сите останати делови од договорот. Порачуваме дека мора да има кредибилни проверки на теренот во пресрет на изборите. Мора да се направат долгорочни измени, но и краткорочните измени би направиле доста за да имаме фер терен за одржување на избори. Сакаме целосна посветност на работните групи, дури и за време на изборите, бидејќи сме загрижени дека во клучните области нема напредок, или пак има назадување“, рече британскиот европратеник.

Ховит, исто така, изрази загриженост поради она што го чул од поглед на досегашната имплементација на Договорот.

„Сакаме да изразиме загриженост од она што ни го кажа Специјалната обвинителка, односно дека таа се соочува со препреки во своето работење и сметаме дека треба да ѝ се овозможи целосна автономија во работењето. Исто така, претседателот на ДИК ни рече дека за да постигнат обврските од пржинскиот Договор ќе биде потребен и одреден степен на `импровизација`, а ова за нас е загрижувачки во поглед на кредибилитетот на изборите. Исто така, сметаме дека целосното почитување на Договорот од Пржино може да им помогне и на шансите за решавањето на спорот за името, ние веруваме во ова. Но доколку се случи спротивното, тогаш препораката за почетокот на преговорите ќе биде неизвесна“, наведе Ховит.

За време на својата дводневна посета на Македонија, Вајгл, Кукан и Ховит во понеделникот остварија средби со претставниците на најголемите политички партии во земјата, а во вторникот се сретнаа и со членовите на ДИК, како и со специјалната обвинителка Катица Јанева. Посетата на тројката европратеници доаѓа како најава за посетата на еврокомесарот за соседска политика и пристапни преговори Јоханес Хан, кој земјата ќе ја посети во петок./крај/мф/бс

Извор: Макфакс