Премиерот Никола Груевски, кој престојува во дводневна посета на Брисел, изјавил дека има приближување на ставовите меѓу Македонија и Европската комисија (ЕК) во однос на предложените измени на Уставот со вметнување на бракот и отворање на финансиски зони.
 

Премиерот Никола Груевски, кој престојува во дводневна посета на Брисел, изјавил дека има приближување на ставовите меѓу Македонија и Европската комисија (ЕК) во однос на предложените измени на Уставот со вметнување на бракот и отворање на финансиски зони.

На состаноците кои Груевски ги оствари со еврокомесарот за проширување Штефан Филе и директорот на Генералниот директор за проширување Кристијан Даниелсон, биле отворени повеќе теми, а соговорниците најмногу се задржале на две клучни теми: предложените уставни измени и подготовката на Акциски план од страна на Владата за справување со забелешките нотирани во последниот прогрес-извештај на ЕК за Македонија.

„На средбите со Филе и со Даниелсон навлеговме подлабоко во уставните измени што Владата ги предложи и ги отвори за расправа. Објаснивме многу поенти, посебно откако во меѓувреме изанализиравме голем број работи, контактиравме со Венецијанската комисија. Притоа, имам чувство дека сериозно ги доближуваме позициите со претставниците на Еврокомисијата“, истакна Груевски по средбите.

„Разговаравме и за други теми, но најголем дел од времето посветивме на овие две теми оти истите беа и најмногу проблематизирани од страна на Европската и Венецијанската комисија. Не би сакал однапред да прогнозирам, но од разговорите имам впечаток дека се доближуваат нашите ставови и дека работите, се надевам, ќе одат во добар правец. Се разбира, ги отворивме и сите други теми што се значајни и актуелни за Македонија, но најмногу се концентриравме на овие точки“, додал Груевски.

Македонскиот премиер потврди и дека ги известил Филе и Даниелсон дека Владата на Република Македонија подготвува Акциски план за реформи кој очекува во наредните десетина дена да се усвои, а планот произлегува од препораките во Извештајот за напредокот на Република Македонија во евроинтеграциите на ЕК.

„Откако ги добивме нивните забелешки, ние многу анализиравме, размислувавме и разговаравме со Венецијанската комисија, па сега доаѓаме назад со адаптирани предлози за кои мислам дека имаме доближување на ставовите. Плус, дообјаснивме и некои работи за кои верувавм дека недоволно им биле објаснети на нашите соговорници во Европската комисија и дека им требаше дополнително објаснување. Причината е што, во овој дел, досега најмногу комуникацијата се одвиваше по писмен пат, а сега беше поразлично кога седнавме на маса и поразговаравме за детали. Се поставија прашања, се одговори на истите и оттука ми доаѓа чувството дека имаме одредено доближување“, изјавил македонскиот премиер.

Со реализирањето на средбите со првите луѓе за проширување на Европската унија, премиерот Груевски ја заврши дводневната работна посета на европската престолнина, каде во четвртокот присуствуваше на Самитот на Европските народни партии (EPP)./крај/мф/бс