Иднината на Република Македонија е во НАТО и во Европската унија, истакна шефот на македонската држава, Ѓорге Иванов во своето годишно обраќање во Собранието, додавајќи дека, за жал, откако во 2005 година земјата стана кандидат за членство во Унијата, Европскиот совет не успеа досега да најде начин за земјата да ги започне преговорите за членство. 

„Знаеме колкави се штетите и знаеме кои се последиците од блокадите на нашето членство во НАТО и во Европската унија. Блокадите предизвикуваат фрустрации во македонското општество, нестабилност во политичкиот живот и тензичност во меѓуетничките односи “, рече Иванов.

„Последиците ги гледаме и ги чувствуваме. И токму овие последици од блокадите сега некои ни ги наведуваат како причина за неможноста да ги отпочнеме преговорите за членство во Унијата. Не е тешко да дојдеме до заклучокот. Ние сме сега всушност блокирани и поради последиците од наметнатата блокада,“ рече македонскиот претседател.

Претседателот Иванов, нагласи дека двојните стандарди со кои сме соочени не можат да ја победат вистината, и потсети дека во историјата сме минале низ многу премрежја.

„Нè негирале, бришеле и игнорирале. Нè асимилирале, делеле и раселувале. Но, и покрај сè, сме издржале. Како што пред 70 години, на АСНОМ, успеавме да создадеме наша сопствена држава, така денес, сме уверени дека ќе станеме членка на Европската унија и НАТО. Затоа што Македонија ја градиме во нас, од нас, за нас, за да живееме и ние и идните генерации во мир и благосостојба, рече Иванов.

Тој рече дека официјална Атина може да го забави, но не и да го спречи нашето поврзување со Европа, не може веќе да ги спречи македонските граѓани да патуваат низ Европа, македонските компании да тргуваат со Европа.

„Официјална Атина може да ни го забави патот кон Брисел, но не може да нè спречи да ги имаме европските вредности, стандарди и критериуми. А токму тие се целта на нашиот европски пат – да ја донесеме Европа во Македонија. Наша обврска е да ги спроведеме реформите, да ги постигнеме стандардите и принципите, да ги обезбедиме човековите права и правото на човечко достоинство, за доброто на граѓаните на Македонија“, истакна претседателот Иванов.

Македонскиот претседател во своето обраќање искажа поддршка за реализираните заеднички седници на владите од нашиот регион, притоа додаде дека во таа насока се и неговите чести средби со сегашните и поранешните претседатели од регионот.

„Се надевам дека со идниот претседател и на нашиот јужен сосед ќе го надоместиме она што е пропуштено во изминативе две децении. Крајно време е заедно да видиме што сè сме пропуштиле и сè што сме изгубиле во неповрат, и сè што можеме да добиеме ако ја надминеме оваа бариера во нашите односи. Која ќе биде користа за граѓаните на двете земји, за македонскиот и за грчкиот народ, но и за поширокиот регион во целина“, подвлече Иванов.

Во однос на нашата надворешна политика, шефот на државата нагласи дека продолжуваме да се водиме од принципот на отвореност кон сите, која како што рече не е само декларативна, туку конкретна, и побара од македонската дипломатија да биде максимално активна и отворена.

 „Уште од првиот ден на вториот мандат, продолжив со истиот интензитет. За само седум месеци имав 10 посети на странски држави и над 40 средби и разговори со некои од највлијателните државници во светот за суштествените прашања што се однесуваат на Македонија, “ рече македонскиот претседател, и истакна дека наша цел е да градиме добри односи со сите добронамерни држави во светот, а најдобри можни односи со сите наши соседи./крај/мф/бс