Надворешна политика
Иванов: Атина настапува од позиција на сила и излегува од рамката на разговорите во спорот со името
Зголемениот интерес на меѓународната заедница, на посредникот Нимиц и на канцеларката Меркел, за спорот за името треба да се искористат за поголем притисок врз Грција, бидејќи Атина настапува од позиција на сила, излегува од рамката на разговорите во спорот со името и не придонесува за изнаоѓање на заемно прифатливо решение, истакна претседателот на Република Македонија, Ѓорге Иванов, во интервјуто за Дневник.
За него посетата на посредникот Нимиц претставуваше уште една можност повторно да се разменат мислења за актуелната состојба во разговорите за надминување на овој проблем, но и надеж процесот да добие интензитет.
„По изјавата на Нимиц во Атина, очигледно е дека наместо почитување на меѓународното право и доследност кон меѓународно преземените обврски, другата страна настапува од позиција на сила, излегува од рамката на процесот и не придонесува за наоѓање заемно прифатливо решение. Наместо одговор на нашите иницијативи за средби и интензивирање на дијалогот, гледаме злоупотреба на позицијата членка на ЕУ, на НАТО и на регионалните иницијативи. Наместо одговор, слушаме изјави кои како да доаѓаат од некое дамнешно време кога со леснотија се убиваа, протеруваа, се асимилираа луѓе што имаа друг идентитет, друг јазик, други имиња и презимиња. Kога со леснотија се кршеа сите по ред човекови права и се погазуваше човечкото достоинство“, истакнува Иванов.
Македонскиот претседател вели дека несфатливо е денес во 21-от век, некои да одбиваат да поверуваат дека Македонија е реалност на Балканот и реалност во Европа. За него несфатливо е денес некому да му го негирате неговиот јазик, неговиот идентитет.
„Несфатливо е некој сé уште да ни го негира нашето право да постоиме и да бидеме тоа што сме, тоа што отсекогаш сме биле. Грција е во многу комотна ситуација. Таа како држава не трпи речиси никаква штета од овој спор што самата го создаде. Најголема штета трпи Република Македонија, чие членство во НАТО е замрзнато, а отворањето на пристапните преговори со Европската Унија и членството во регионалните иницијативи е блокирано.Но, сешто преживеавме овие две децении, сите ембарга, блокади, уцени, ултиматуми, не се причина ние да се откажеме од нашата позиција и нашите барања. Тие барања не само што се принципиелни, туку во целост се во согласност со меѓународното право и меѓународно преземените обврски“, истакнува Иванов.
Наметнувањето на поединечните себични интереси на земја-членка над колективните интереси, не ги прави посилни организациите, смета Иванов и додава дека и самиот медијатор Нимиц по последната посета во Скопје го истакнал интересот на меѓународната заедница за решавање на ова прашање па поради тоа, потребно е да се изврши притисок, кој ќе резултира со почитување на меѓународното право и меѓународно преземените обврски.
„Учеството на Меркел на состанокот на лидерите на Брдо-Бриони процесот недвосмислено покажа дека ЕУ повторно го свртува вниманието кон нашиот регион. Директното вклучување на моќните европски држави во надминувањето на проблемот со македонските евроинтеграции е добредојдено за конечно да ја напуштиме статус кво позицијата. Тоа е нешто што го посакуваат и граѓаните на Македонија“, вели претседателот на Република Македонија.
Иванов нагласува дека во моментов охрабрува фактот што се повеќе соговорници од влијателните ЕУ-членки имаат разбирање за нашиот проблем со евроинтеграциите.
„Годинава тоа беше случај со германската канцеларка, минатата година со францускиот претседател. И не само тие. Се повеќе државници во светот се свесни за неправдата што и е нанесена на Македонија. Проблемот со кочењето на македонските евроинтеграции е проблем и на ЕУ, и тоа е одговорност на сите членки на ЕУ. Тоа лично и го кажав и на канцеларката Меркел во Дубровник. И укажав дека со самото тоа што освен името, се спомнува и идентитетот е излегување од рамката во која се водат разговорите и не дава надеж дека е можно да се најде решение. Kако држава изградивме став дека не може повеќе да се носат одлуки за нас, без нас, како што било во минатото. Во тој контекст, охрабрува заклучокот произлезен од состанокот на лидерите во кој се изразува надеж дека Европскиот совет ќе донесе одлука за почеток на пристапните преговори со Р. Македонија, имајќи предвид можност за паралелни пристапни преговори и решавање на билатералните разлики. Впрочем, тоа за што ние како држава се залагаме“, истакнува Иванов./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.