И во иднина ќе се случуваат напади слични на оние во Брисел, а она што треба да се направи за тие да се спречат е поефикасна соработка помеѓу безбедносните служби на сите земји, изјави во вторникот претседателот на Република Македонија, Ѓорге Иванов, кој оствари посета на Агенцијата за разузнавање, каде се информираше околу напорите кои беа направени во екот на мигрантската криза и големиот број на бегалци кои транзитираа низ Македонија, за да стигнат до западна Европа.
 

И во иднина ќе се случуваат напади слични на оние во Брисел, а она што треба да се направи за тие да се спречат е поефикасна соработка помеѓу безбедносните служби на сите земји, изјави во вторникот претседателот на Република Македонија, Ѓорге Иванов, кој оствари посета на Агенцијата за разузнавање, каде се информираше околу напорите кои беа направени во екот на мигрантската криза и големиот број на бегалци кои транзитираа низ Македонија, за да стигнат до западна Европа.

„И во иднина ќе се случуваат такви настани, службите мора да соработуваат и на безебедносен план да разменуваат информации. Да не робуваме на бирократски процедури, не сме биле во ЕУ, не сме имале право на пристап до базите, ние тоа го нудиме за безбедноста на континентот, безбедноста на другите земји во ЕУ кои и во иднина ќе се соочуваат со терористички напади и закани. Не само Европа, ова е планетарен феномен, терористички акти има насекаде низ светот, бидејќи сите тие што не и мислат добро на човековата цивилизација ги користат сите придобивки на 21-от век и се многу поиновативни и креативни од службите во државите кои по инерција како да се се уште останати во 20-от век. Моите критики беа упатени токму на тоа, да се менуваме и како држави и како служби и секојпат да бидеме проактивни и чекор пред сите закани кои постојат“, изјави претседателот Иванов, запрашан околу тоа како ги коментира последните терористички напади кои се случија во белгиската престолнина Брисел, а во кои животите ги загубија 28 лица, а имаше и многумина повредени.

Според Иванов, земјава своите забелешки околу безбедносниот аспект на бегалската криза ги упатила уште во октомври минатата година, кога барала пристап до базите на Фронтекс и Шенген, за да ги размени податоците кои ги има, а кои во тој момент биле исто така неопходни и за земјите од Европската унија.

„Конкретно ако некој дошол со фалсификувани документи и ние сме му ги одземале и ги имаме сите негови податоци, тогаш тие податоци треба да ги има секоја членка на Унијата за на таквото лице да не му даде азил. Меѓутоа немавме разбирање затоа што регулативата е таква што трети земји немаат пристап до такви бази и затоа ние реагиравме. Но после мојата изјава веќе имаме раздвиженост меѓу партнерските служби, тие доаѓаат се интересираат и ги користат податоците а очигледно ќе изелзе дека дел од овие што вклучени во Брисел, како и тие претходно во Париз, дел од нив ја користеле таа рута. Постојано се потенцираше на хуманитарниот аспект на кризата, сите инсистираа и навистина е неопходно тоа што на тие луѓе им е потребна помош и поддршка и справување со сето тоа што го доживеале, меѓутоа ние потенциравме за безбедносниот аспект на кризата, поради тоа што меѓу тие бегалци има и повратници од боиштата во Сирија. Да не бидеме наивни, само во Македонија имавме 72 повратници од лица коишто учествувале на боиштата, отишле како екстремисти се вратиле како терористи. Преку илјада лица од Балканот учествуваат во Сирија, а 60 отсто од нив се вратени, илјадници, односно има д три илјади повратници на територијата на ЕУ. Тие ги користеле овие рути на бегалците, меѓу нив продреле и се вратиле и сега еве што се случува“, рече Иванов.

Македонскиот претседател исто така додаде дека и покрај овие недостатоци со кои земјата се соочувала, таа успеала да покаже дека знае како да се справи со ваков предизвик, и тоа многу подобро од земји кои се членки на ЕУ и НАТО.

„Нашите граѓани, со исклучок на тие во Гевгелија и Куманово, не почуствуваа дека низ државата поминаа еден милион бегалци, поради тоа што сите институции функционираа за тоа Македонја да ја оствари улогата како транзит земја. Со тоа што се постигна договор меѓу Турција и ЕУ, може да се види на нашата јужна граница. Македонија ги има сите ризици што ги имаат земјите од опкружувањето и од Европа, гледате што се случи денес во Брисел. Заканите постојат но ние успешно се справуваме со нив и превентивно и проактивно делуваме, нашите граѓани треба да бидат спокојни, затоа што со сите ризици што досега постоеја, нашите институции во соработка со нивните партнерски служби ги спречуваа, а за многу од тие настани ќе се дознае во идно време кога атмосферата ќе биде поинакво. Ние како земја сме на една од најфреквентите рути, меѓу Блискиот Исток и Европа, и таа рута ја користеа и мигрантите но ја користат и тие што немаат добри намери. Гледаме дека има повратници од војната во Сирија, има т.н. екстремисти, терористи, криумчари и сите оние што се бават со овој профитен бизнис, односно сите се вклучија во шверцот на мигранти кој е најдоходовен, а според извештајот на Европол профитот од овој бизнис минатата година бил 6 милијарди евра“, објасни Иванов.

Иванов на крајот додаде дека сепак никој не треба да биде наивен и да мисли дека сите ризици се завршени, поради тоа што вакви работи ќе има и во иднина, но македонските институции го положиле т.н. стрес тест во однос на бегалската криза и се справиле како што тоа доликува./крај/мф/бс