Надворешна политика
Иванов: Македонија успешно се справува со предизвикот од мигрантската и бегалската криза
Македонија добива комплименти за начинот на справување со мигрантската и бегалската криза, и ние сме една од ретките земји кои успешно се справуваат со овој предизвик, изјави претседателот на Ѓорге Иванов по остварените средби со повеќе учесници на 21-от Самит за климатски промени во Париз.
„Нашиот кризен менаџмент е активиран, имаме прогласено кризна состојба, и постапуваме согласно нашиот закон за сé што е предвидено од тој аспект. Македонија добива комплименти, бидејќи, за разлика од некои други држави кои беа изненадени и не се снајдоа најдобро, Македонија од самиот почеток на кризата прави сé за да нема никакви последици по безбедноста на нашето население“, потенцираше Иванов.
Во разговорите со светските лидери на Самитот се зборувало за македонската евроатлантска интеграција, за состојбите во регионот, како и за предизвиците со мигрантската и бегалската криза.
„Со претседателот Обама зборував за нашата евроатлантска интеграција“, рече Иванов. Додаде дека Македонија го почнува 17-иот акционен план за членство во НАТО, а „стоиме во место и имаме статус-кво состојба во нашата интеграција“. „Со г-ѓа Меркел имавме подолг разговор, кој се однесуваше на проблемот што нé засега сите во нашиот регион, и кој станува сé повеќе глобален проблем. Проблемот со бегалците и мигрантите“, дополни претседателот Иванов.
Говорејќи за средбата со канцеларката Меркел, Иванов истакна дека Македонија има проблеми, односно предизвици кои доаѓаат од територија на Европска унија и од членка на НАТО.
„Разговаравме отворено со г-ѓа Меркел за тоа што сé се подготвува во врска со бегалската криза. Таа информираше за самитот што се одржа меѓу Европската унија и Турција, што е планирано, кои мерки ќе се преземат краткорочно, кои долгорочно, како и за тоа кои се нивните очекувања. Процесите што се почнати со бегалската криза доведоа до тоа што сега коридорите на бегалците ги користат мигрантите од Африка и од Азија и затоа мора да се преземат мерки како што и ние ги преземавме“, појасни македонскиот челник.
Со цел, додаде Иванов, „да се разликуваат тие што бегаат од боиштата, пред сé луѓето од Сирија, Ирак и Авганистан, од оние кои се економски мигранти“.
На средбата со грчкиот премиер која минала во „конструктивна атмосфера“, претседателот Иванов и премиерот Ципрас зборувале за проблемот со бегалците и мигрантите кој претставува продолжение на разговорот што неодамна двајцата го имале во Брисел на лидерскиот состанок посветен на приливот на бегалците низ Балканската рута.
„Oна што го побарав од грчкиот премиер, и во Брисел и сега во Париз, е институциите да соработуваат и да разменуваат податоци, бидејќи тоа е во интерес, пред сé, на нашите држави, на нашите народи, но и на регионот. Голем дел од странските борци кои се на боиштата во Сирија и Ирак сега како бегалци и мигранти се пробиваат низ Европа, и ја загрозуваат безбедноста на самата Европа. Затоа е неопходна соработка на службите, не само меѓу нас и Грција, туку долж целиот коридор и самата Европска унија, затоа што размената на податоци од безбедносен карактер отсуствува и во самата Унија“, рече Иванов.
Додаде оти со премиерот Ципрас разговарале и за мерките за градење доверба меѓу Македонија и Грција, како и за неопходноста од нивната имплементација.
„Мора да посветиме многу повеќе внимание на имплементирање на мерките за градење доверба, кои треба да поттикнат повеќе соработка во областите кои не можат да трпат поради проблемот со името. Тука се, во прв ред, нашата академска и бизнис заедница, како и комуникацијата меѓу населението“, изјави македонскиот претседател, и нагласи дека сето она што како позитивен пример е досега покажано, мора да се поттикнува и што повеќе развива.
За Самитот на климатски промени во Париз, Иванов рече дека бил одлична можност да се слушнат пораките од многу светски лидери и нивната загриженост за сето она што се случува со нашата планета. Според него, климатските промени предизвикуваат такви последици кои не почитуваат државни граници и не ги почитуваат поделбите што се направени од луѓето и од државите.
„Доминира свеста дека сме моќни како цивилизација за еден предизвик, на кој мораме заеднички да наоѓаме одговор. На минатите самити имавме многу декларативен однос кон овие прашање. Сега, конкретно во овој момент е потребно нешто што веќе е најавено. Конкретни иницијативи чија цел e глобалното затоплување да не биде поголемо од 2 Целзиусови степениа, бидејќи последиците за човековата цивилизација се катастрофални“ рече Иванов./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.