Надворешна политика
Иванов за „То Вима“: Мигрантската криза е можност Македонија и Грција да почнат да соработуваат
Мигрантската криза е можност за институциите на нашите две соседни држави да ја надминат недовербата и да почнат да соработуваат, порача македонскиот претседател Ѓорге Иванов во интервјуто за грчкиот весник „То Вима“.
„На грчката јавност треба да и биде јасно дека затворањето на балканскиот коридор не е на штета на Грција, туку напротив во нејзина корист. Македонија никогаш не беше дел од решението за ограничување на чие било движење и никогаш не сме поддржале исклучувања на Атина од иницијативите поврзани со мигрантската криза“, рече Иванов.„Грција дозволи импровизирани кампови на самата гранична линија со Република Македонија и со тоа ги охрабри мигрантите да користат илегални премини, со што директно ја загрози нашата национална безбедност. Потврда за ова е инцидентот на 14 март, кога околу 2.500 лица беа илегално уфрлени на македонска територија“, вели македонскиот претседател запрашан како го коментира затворањето на балканскиот коридор и дали смета дека Атина требало да биде вклучена во дискусиите за изнаоѓање решение за напливот на бегалци по Балканската рута. „Трагедијата е што ваквата практика продолжува. И покрај затворениот коридор, секоја вечер регистрираме над 100 обиди за илегален влез во Република Македонија. По сѐ изгледа дека одредени политичари во Грција не ја сфаќаат сериозноста на безбедносните ризици што со себе ги носи оваа криза. Веќе постојат индиции дека дел од уапсените и осомничените за терористичките напади ја користеле токму Балканската рута“, вели Иванов во интервјуто за „То Вима“. „За парадоксот да биде уште поголем, сега во Грција се води негативна кампања против Македонија. Грчките граѓани треба да бидат информирани дека и јавно, но и во разговорите со моите соговорници од ЕУ барав да и се помогне на Грција“, изјави македонскиот претседател во интервјуто. Во однос на „Мерките за доверба“ Иванов потенцираше дека тие беа на инцијатива токму на македонската страна, и дека Република Македонија направи сѐ за да изгради мостови со грчкото општество дури и во услови кога грчката влада правела сѐ за да ја поткопа таквата соработка. „Тука се вбројуваат и многуте неуспешни обиди за средба со сегашниот и поранешниот грчки претседател. Надвор од секаква логика е претседателите на две соседни земји, без оглед дали сегашни или поранешни, да не се сретнат ниту еднаш. За чудо, до денес нема позитивен одговор од Атина за моја средба со грчкиот претседател, иако не инсистираме ниту на формат, место, време или тема на средбата“, изјави македонскиот претседател. Средби со македонски стопанственици, професори, студенти или новинари уште долго време ќе бидат незамисливи за официјална Атина, вели Иванов. „На 25 март, по повод прославата на Денот на независноста на Грција, по втор пат присуствував на дипломатскиот прием кој го приредува грчкиот амбасадор во Скопје. Веќе следниот ден, мојот грчки колега, претседателот Павлопулос, ја „врати услугата“ – со уште една навредлива изјава за Македонија“, посочува македонскиот претседател. Ниту еден проблем, вели Иванов, не бил решен со негово игнорирање и избегнување на комуникација. „На таков начин нема да се реши ниту мигрантската криза, ниту прашањето за името. Егото и агресивните политики од минатото треба да се заборават еднаш засекогаш, а за доброто на новите генерации и нивниот напредок, треба да се соочиме со проблемите, не да бегаме од нив“ , порача претседателот Иванов во интервјуто.Запрашан на што се должи „замрзнувањето“ на преговорите за прашањето околу името, претседателот Иванов порача дека тој секој пат бил и е подготвен за директни средби со кој било политичар и општественик од Грција.Моите средби со премиерот Ципрас се охрабрувачки, вели Иванов. „Реалноста е дека Република Македонија е суверена и независна држава, и со наметнати и еднострани решенија невозможно е да имаме соодветно затворање на ова прашање“, изјави претседателот Иванов.Тезата што ја пласираа одредени грчки политичари, дека Македонија се обидува својот влог во мигрантската криза да го пазари за членство во НАТО или ЕУ, Иванов ја оцени како небулозна.Иванов изрази надеж дека повеќето Грци сфаќаат дека Република Македонија не е непријател на нивната земја, туку напротив, е нација со која Грција дели многу повеќе отколку што се чини на прв поглед. „Би сакал да има доволен број на политичари во Атина кои би имале храброст да го признаат ова и да го спојат со непобитниот факт дека сигурна, стабилна и напредна земја на нивната северна граница, членка на ЕУ и НАТО, е во најдобриот стратешки интерес на Грција“, порачува Иванов во интервјуто за „То Вима“. /крај/со/сј/ст
Извор: Претседател на РМ/То Вима
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.