Осознаваме дека во оваа криза има правен процес кој е во тек и се однесува на одговорност за прислушувањето или објавувањето на снимките, и тоа е важен аспект, но исто така имаше и прашања во врска со можност за злоупитреба на владина сила, кои мора да се адресираат, порача американскиот заменик помошник државен секретар за европски и евроазиски прашања, Хојт Ји во четвртокот по средбата со премиерот Никола Груевски.
                                                                

Осознаваме дека во оваа криза има правен процес кој е во тек и се однесува на одговорност за прислушувањето или објавувањето на снимките, и тоа е важен аспект, но исто така имаше и прашања во врска со можност за злоупитреба на владина сила, кои мора да се адресираат, порача американскиот заменик помошник државен секретар за европски и евроазиски прашања, Хојт Ји во четвртокот по средбата со премиерот Никола Груевски.

„За овие прашања се потребни одговори и одгорност. Апелираме до Владата и нејзините институции да ги сфатат ваквите обвинувања за злоупотреби и можно нелегално однесување многу сериозно, во најмала мера со иста сериозност како што владата ги сфаќа обвинувањата против лидерот на опозицијата, господинот Заев“, порача Ји.

Американскиот заменик помошник секретар исто така порача дека САД ќе останат силен поддржувач на македонските европски интеграции, а со цел земјата да излезе од политичката криза, тој ги повика вклучување на сите општествени чинители. Ји ја повика и опозицијата да се врати во Парламент што е можно поскоро.

„Во случајот на опозицијата се надеваме дека опозиционерите ќе се вратат во Парламентот што е можно поскоро со цел да ја извршуваат својата демократска улога за која се избрани. Се надеваме дека Македонците ќе се сплотат во оваа криза и ќе имаат конструктивна улога во изнаоѓањето на начини за излез од кризата и враќањето на фокусот на важните работи. Тоа се продолжување на моментумот кон Европа и НАТО, создавање на посилна економија, создавање на поволна клима за странски, како и домашни известиции со што би се создале работни места и подобра иднина за сите Македонци“, изјави Американецот.

Покрај со премиерот Груевски, Ји во четвртокот оствари и средби со шефот на македонската дипломатија Никола Попоски, како и со лидерот на ДУИ, Али Ахмети.

Од македонското МНР соопштуваат дека Попоски и Ји разговарале за севкупните односи меѓу Македонија и САД, при што бил истакнат заемниот интерес за натамошно надградување на стратешкото партнерство и политичкиот дијалог, како и на билатералната соработка.

Централно внимание беше посветено на обидите на Македонија за деблокада на интеграцијата во НАТО и ЕУ, согласно главните стратешки определби на државата, а во таа насока на американскиот соговорник му беа пренесени заложбите на Владата за што поскоро изнаоѓање на заемно прифатливо решние за наметнатиот спор околу името, соопштуваат од МНР.

Ји и лидерот на ДУИ, Ахмети пак, отворено разговарале за политичката криза во Македонија, придонесот на ДУИ во надминувањето на актуелната криза, како и за интеграцијата на Македонија во НАТО, соопштуваат од ДУИ.

Ахмети ја изразил подготвеноста на ДУИ да даде конкретен придонес кон итното надминување на состојбата на политичка криза во земјата, истовремено барајќи Вашингтон да ги охрабри партнерите во Брисел за да се продолжи со поинтензивен процес на преговори меѓу двете страни, особено во пресрет на министерскиот состанок на НАТО во мај, велат од ДУИ./крај/мф/бс