Македонскиот министер за одбрана Зоран Јолевски изминатите денови во Филаделфија присуствуваше на националната конвенција на Демократската партија на која поранешната прва дама и државна секретарка Хилар Килтон ја прифати номинацијата за американските претседателски избори на 8-ми ноември, и ексклузивно за Макфакс ги пренесува впечатоците.

Министер Јолевски, бевте гостин изминатите четири дена на Конвенцијата на Демократската партија, на која поранешната државна секретарка Хилари Клинтон беше номинирана за претседателски кандидат. Како ја оценувате конвенцијата? – Ова е моја петта конвенција, во 2008 година присуствував на конвенциите на кои за претседателски кандидати беа номинирани Барак Обама и Џон МекКејн, во 2012 повторно Обама, и Мит Ромни како републикански кандидат.

Конвенцијата во Филаделфија беше со силна енергија, го мотивираше гласачкото тело, не само на Демократската партија, туку и независните гласачи, но имаше порака за републиканските гласачи. Меѓу говорниците беа претседателот Обама, потпретседателот Џозеф Бајден, поранешниот претседател Бил Клинтон, повеќе сенатори, конгресмени, гувернери, уметници, но и мноштво граѓани кои со нивните стории придонесоа за јакнење на пораката зошто Хилари Клинтон заслужува да биде избрана за претседател на САД. Конвенцијата беше насочена кон деловите од американското општество кои се потенцијални нејзини гласачи.

Нејзиниот сопруг, поранешниот претседател Бил Клинтон и ќерка и Челзи ја претставија Хилари како мајка и сопруга. Во американски стил поранешниот претседател Клинтон се осврна на достигнувањата на Хилари, говореше како се сретнале, за најважните моменти од нивниот заеднички живот, со посебен акцент на нејзините достигнувања во областа на заштитата на правата на жените, за здравствената заштита на децата, за правата на афроамериканците, за поголема социјална правда во американското општество, во областа на образованието, незиниот активизам за елиминација на сегрегацијата во школите. Во текот на неговиот говор ја претстави Хилари како лидер кој може да направи промени во животот на обичниот граѓанин. Затоа најчесто повторуван збор му беше „промени“.

Еден од најголемите предизвици во кампањата на Хилари е тоа дека е традиционален политичар и дека доколку ја изберат, политиката во Вашингтон ќе остане иста. Затоа посебен акцент во обраќаната на конвенцијата беше ставен на успешните промени што претседателскиот кандидат Хилари Клинтон го направи во американското општество и резултатите од нив.

Во говорот на Хилари Клинтон, со кој заврши конвенцијата, беа дадени контурите на нејзината платформа, но имаше и одговор на ставовите на противкандидатот Доналд Трамп.

Пред почетокот на конвенцијата имаше стравувања дека гласачкото тело на Демократската партија може да подели на два табора: едниот со Хилари Клинтон и, вториот, со сенаторот Берни Сандерс, кој неочекувано доби голема поддршка на примарните избори. Дали конвенцијата успеа да ги обедини?- Сенаторот Берни Сандерс, во текот на партиските предизбори избори успеа да мотивира сериозен дел од гласачкото телот на Демократската партија, но се разбира недоволно да ја добие номинацијата. Исто така, неговите поддржувачи беа високо мотивирани.

Сенаторот Сандерс се обрати првиот ден на конвенцијата, ги повика гласачите да и дадат поддршка на Хилари Клинтон, и ги повика неговите поддржувачи истото да го направат на изборите во ноември, со цел Хилари Клинтон да биде избрана за претседател. Пораката ја повтори и следниот ден изутрина на појадокот со делегацијата од Калифорнија. По овие негови повици, стана јасно дека Демократската партија ќе се обедини и застане зад кандидатурата на Хилари Клинтон.

Но од обраќањето на сенаторот Сандерс,што беше потврдено и во завршното обраќање на Клинтон може да се заклучи дека значајни елементи од платформата на Сандерс се вклучени во платформата на Хилари Клинтон. Едно од најзначајните ветувања на Сандерс кое се однесуваше на бесплатно универзитетско школување на децата од семејствата чиј годишен приход е под 125.000 долари е прифатено од Хилари Клинтон.

Ова покажа дека сенаторот Сандерс во замена за неговата поддршка на кандидатурата на Клинтон, обезбедил дел од неговата платформа да биде вклучена во програмата на Клинтон. Инаку за одбележување е дека сенаторот Сандерс е од државата Вермонт, со чија национална гарда АРМ има долгогодишна соработка.

Со него имав поголем број средби како амбасадор, но и како министер. Имавме подолг разговор во септември минатата година кога бев во посета на Вермонт.

Ја спомнавте соработката во областа на одбраната. Каква беше пораката од Конвенцијата околу натамошниот ангажман на САД во НАТО?- Претседателскиот кандидата Хилари Клинтон, експлицитно и недвосмислено ја истакна определбата САД и натаму да остане активно ангажиран во НАТО и високо ја оцени соработката со сојузниците и партнерите.

Генералот Џон Ален во брилијантен говор, 30-ина минути пред обраќањето на Хилари Клинтон го истакна значењето на НАТО алијансата и потребата за продолжување на соработката на САД со сојузниците и партнерите./крај/мф/бс

Извор: Макфакс