Надворешна политика
Јолевски – Најденов: Поддршката од Бугарија за членството на Македонија во ЕУ и НАТО е од исклучително значење
Стратешките цели на Македонија се членство во Европската унија (ЕУ) и НАТО, а поддршката од Бугарија е од исклучително значење, порачал министерот за одбрана Зоран Јолевски по средбата со својот бугарски колега Ангел Најденов во вторникот во Софија.
„Ние ќе продолжиме и понатаму да ја продлабочуваме соработката за постигнување на овие приоритети во надворешната политика на Република Македонија. Интеграцијата на Република Македонија во ЕУ и во НАТО ќе придонесе за зајакнување на стабилноста, безбедноста и просперитетот не само на нашата земја, туку и на регионот и Европа во целина. Затоа, поддршката од Република Бугарија е многу значајна, а интензивните контакти ќе придонесат за уште поголемо приближување на двете земји, армии и на двата народи“, изјавил Јолевски по средбата со Најденов.
Бугарскиот министер за одбрана порачал дека Бугарија од Македонија очекува исполнување на сите неопходни услови за членство во овие организации, како и почитување на принципот на добрососедски односи. Најденов нагласил дека постојат разни иницијативи кои би можеле да помогнат за развој на дијалогот и промоција на заедничките национални иницијативи кои би го зајакнале развојот и партнерството меѓу двете страни, пренесуваат бугарските медиуми.
„Овој сооднос е огромен, но за жал, се уште недоволно распореден и има неискористен потенцијал, а огромен чекор во таа насока би било координацијата и потпишувањето на договор за добрососедство и соработка, кој остава простор за развој на нашите односи и поддршка за членство на Република Македонија“, рекол Најденов, потенцирајќи дека ова е главниот приоритет.
Јолевски и Најденов посочиле дека соработката на двете земји во областа на одбраната официјално е започната со потпишување на Спогодбата за билатерална соработка во 1999 година, и дека во 2014 година е потпишан План за воена соработка, во кој акцентот е ставен на средби и размена на експертско ниво со цел да се сподели бугарското искуство на патот на евроатлантските интеграции.
Јолевски исто така укажал дека досегашните обуки, школувања, учеството во заеднички вежби и соработката во рамки на регионалните иницијативи, се потврда за интензивната одбранбена соработка меѓу Македонија и Бугарија./крај/мф/бс
Извор: Фото/МИА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.