Комитетот за надворешни работи на Европскиот парламент (АФЕТ), во вторникот ја усвои Резолуцијата на известувачот Иво Вајгл за Македонија, во која по деветти пат се бара итно отворање на пристапните преговори за членство во Европската унија (ЕУ).

Анти-македонските амандмани на коалицијата на европратеници од Грција и Бугарија не пројдоа во однос на оваа Резолуција што се однесува на последниот извештај на Европската комисија за Македонија, јавува дописникот на МИА од Брисел.

Известувачот Иво Вајгл, во понеделникотизлезе со 16 компромисни амандмани, како одговор на рекордните 296 амандмани поднесени на неговата Предлог-резолуција. Европратениците во рамки на АФЕТ-групата во вторникот ги изгласаа овие амандмани, при што за издвојување е тоа што ЕП по деветти пат бара отворање на пристапните преговори за Македонија, повторно (во однос на макеоднската Влада) се употребува придавката „македонски”, а и се осудува сегашната политичка криза во земјата и од Владата и опозицијата се бара во рамки на Собранието да ги решат поделбите.

ЕП бара конструктивен и инклузивен дијалог на Владата и опозицијата и дека е поделена одговорноста на Владата и на опозицијата да обезбедат одржлива политичка соработка, што е есенцијално за демократскиот развој на земјата.

Европскиот парламент го повторува по деветти пат повикот до Советот да одреди датум за почеток на пристапните преговори без понатамошно одложување со цел да не се загуби моментумот, да се зголемат реформите поврзани со европското законодавство и да се засили процесот на демократизација.

„ЕП повторува дека прашањето за името, што е билатерално прашање, не треба да претставува пречка за отворање на пристапните преговори, иако треба да се реши пред завршувањето на процесот на преговори. Исто така, ЕП го поддржува размислувањето на Комисијата дека неуспехот на страните да најдат компромис по две декади на посредувани разговори има директно и негативно влијание на европските аспирации на земјата и нејзиниот народ. Се повикуваат двете влади да превземат конкретни чекори кон изнаоѓање на заеднички прифатливо решение и ја повторува важноста и потребата од конструктивен пристап за решавање на билатералните прашања со соседите“, порачуваат од Европскиот парламент.

Во оваа Резолуција, се потсетуваат земјите-членки на ЕУ да се вратат на предлогот за отворање на преговорите со Македонија во 2015 година, со назнака дека отворањето на преговорите може само позитивно да влијае да се решат билатералните прашања. Притоа, ЕП наведува дека понатамошно продолжување на статус-кво ситуацијата го минира кредибилитетот и ефективноста на политиката на проширување на ЕУ и позицијата на Унијата во регионот.

Новата Резолуција на Европскиот парламент за Македонија идниот месец треба да биде потврдена од целиот состав (751 европратеник) на Европарламентот, на пленарна седница во Стразбур идниот месец. Резолуциите за земјите-кандидати што ги носи ЕП, а кои се носат во однос на извештаите на Европската комисија, немаат никаква правна основа и служат само како политичка порака до Брисел и самите држави на кои се однесуваат./крај/мф/бс