Во пресрет на Самитот на НАТО во Кардиф, кој ќе се одржи во четврток и петок, во англискиот град Бристол во средата македонскиот министер за одбрана Зоран Јолевски оствари билатерална средба со колегата од Словенија, Роман Јакич, при што уште еднаш беше констатирана одличната соработка на двете земји, како и подготвеноста на Македонија за полноправно членство во НАТО и Европската унија. .

Министерот Јолевски ја отвори средбата истакнувајќи ја одличната досегашна соработка во одбраната и додаде дека добрите политички односи помеѓу двете земји посебно се рефлектираат на одбраната. Во оваа прилика министерот Јолевски заблагодарувајќи се за досегашните обуки на припадници на АРМ на Воените образовни институции во Република Словенија, рече дека е особено задоволен што оваа година на Воената академија во Скопје ќе се школува и кадет од Словенија.

„Словенија ја поддржува политиката на проширување како на НАТО, така и на ЕУ. Република Словенија и јас како министер за одбрана сме големи поддржувачи на Република Македонија, за да биде дел од овие организации и воедно жалиме што една земја тоа го попречува“, рече министерот за одбрана на Република Словенија, Роман Јакич.

„Имаме многу добри односи меѓу двете министерства и армии, и во иднина очекувам истите да ги продлабочиме. Мојата позиција е многу јасна, Македонија треба да се приклучи на двата клуба НАТО и ЕУ, затоа што тоа е за доброто на сите“, истакна Јакич.

Во оваа прилика министерот Јолевски се заблагодари за поддршката и додаде дека ќе се залага и во иднина овие две земји да имаат одлична соработка.

Началникот на Генералштабот на Словенечките воени сили, генерал-мајор, Добран Божич, ја искористи оваа прилика да истакне дека македонските војници се одлично подготвени и воедно се заблагодари за соработката и поддршката за време на заедничките вежби.

„Ви благодарам за убавите и искрени зборови кои ги упатувате за нашите офицери и војници и само ќе додадам дека соработката помеѓу нашите две армии се пример за останатите земји не само од регионот“, возврати на пофалбите Началникот на генералштабот на АРМ, Генерал потполковник, Горанчо Котевски.

Подоцна во средата министерот Јолевски се сретна и со британскиот пратеник Алистер Бурт, на којашто уште еднаш од страна на британски пратеник беше искажана поддршката за Република Македонија за остварување на своите цели, членство во НАТО и ЕУ.

Претходно во вторникот Јолевски во Долниот дом на британскиот парламент во Лондон имаше одвоени средби со двајца еминентни членови на парламентот на Обединетото Кралство, односно со Лиам Фокс, кој е поранешен министер за одбрана, и со Марк Причард е дел од програмата на парламентот за развој на квалитетна дебата за воени прашања, при што македонскиот министер за одбрана од британските пратеници доби јасна поддршка за македонските аспирации во НАТО./крај/мф/сн

Извор: Макфакс