Македонија
Пломп: Граѓаните на избори се силни колку секој политичар

Демократијата ја поседуваат граѓаните, а не политичарите, порача амбасадорот на Холандија во Македонија, Воутер Пломп, на тркалезната маса во организација на Транспаренси интернешнал, за Законот за заштита на укажувачи.
„За да функционира демократијата граѓаните имаат исто така одговорност, со гласање на избори, бидејќи изборите се најмоќната алатка што ја има граѓанинот да ја изрази својата волја со избор на оние што ќе ги носат понатаму законите што влијаат на сите. Изборите се ден кога поединецот е исто толку моќен како кој било друг политичар. Ако не гласате, дозволувате другите да одлучат за вашата иднина“, порача Пломп.
Тој рече дека се надева дека колку што е можно повеќе граѓани ќе ја искористат својата можност на 11 декември, да гласаат на предвремените парламентарни избори.
„Демократијата не е само гласањето еднаш на секои четири години или еднаш на предвремени избори, одлуките на политичарите секој ден влијаат на граѓаните и затоа граѓаните мора да бидат информирани кога и како тие одлуки ќе влијаат врз нив. Тука пријавувањето игра клучна улога и независните медиуми и граѓанскиот сектор за обезбедување на тие информации за граѓаните. Демократијата ја поседуваат граѓаните, а не политичарите“, рече Пломп./крај/смф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски за средба со Филипче: Стојам на располагање во секое време, јас сум сериозен човек

Подготвен сум да го примам на средба претседателот на СДСМ, Венко Филипче, но непристојно е за ова да се разговара преку медиуми. Јас сум сериозен човек и најмалку што треба е да се прави естрада на јавна сцена, изјави премиерот Христијан Мицкоски откако лидерот на СДСМ, Венко Филипче, на прес-конференција рече дека е потребен концепт за нов општествен и политички дијалог и дека е потребно за ова да се разговара на лидерска средба.
На новинарско прашање дали ќе има среда со Филипче, Мицкоски рече дека стои на располагање во секое време.
„Јас кажав дека ова е сериозна тема и за сериозна тема се седнува и се разговара. За мене е непристојно преку медиуми да се разговара. Јас реков, подготвен сум да го примам на средба претседателот на СДСМ да го образложи планот, бидејќи се сериозни времиња, јас сум сериозен човек и најмалку што треба е да се прави естрада на јавна сцена. Доколку навистина има план и желба да помогне стојам на располагање во секое време, на полноќ на полноќ, после полноќ после полноќ. Кога ќе каже тогаш, да го сослушам неговиот план и да видиме дали може со тој план нешто да се реши“, рече Мицкоски.
Тој додаде дека, сепак, нема да прифати секакви планови.
„Доколку планот опфаќа „пристап Стабри“ како што беше за време на короната, тогаш јас такви планови не можам да прифатам“, рече Мицкоски.
Македонија
ДУИ не се грижи за Бектеши, ниту за правда за Кочани, плачат само за вниманието што секојдневно го губат, велат од Вреди

Според коалцијата „Вреди“, ДУИ ја игра улогата на жртва пред камерите, но и овој пат, како што велат, биле фатени во измама.
Според „Вреди“ од ДУИ била поднесена иницијатива за Анкетна комисија со само 16 пратеници, а Уставот бара најмалку 20.
„Значи, или не го знаат Уставот, или само сакаат медиумско шоу.
Вистината е едноставна: ДУИ не се грижи за Крешник Бектеши, ниту за правдата за Кочани. Плачат само за една работа – вниманието што секојдневно го губат. Тие не се во можност ниту да ја консолидираат сопствената пратеничка група, таканаречениот „Европски фронт“. Од 18 пратеници што ги има овој фронт, успеале да обезбедат само 16 потписи – ова повеќе отколку било која изјава говори за внатрешната состојба во оваа групација. Кога не можат да ги убедат ниту сопствените пратеници, како ќе бараат јавна правда“, прашуваат од „Вреди“.
Според нив, во оваа политичка паника која сè повеќе ги зафаќа секојдневно, ДУИ е подготвена да оди до крајност, да ги бојкотира локалните избори и да се обиде да предизвика политичка криза, само за да се спаси себеси.
„Вреди“ велат од коалицијата, е дециден дека со вистината нема да се манипулира. Бараат Анкетна комисија за сите трагедии, не само за оние кои ДУИ ги користи за пропаганда – од Ласкарца, модуларната болница во Тетово, Беса транс, до Кочани. Подвлекуваат дека нема да дозволат ДУИ да ја игра улогата на селектор на болката и правдата.
Македонија
Ѓорѓиевски по справувањето со надојдените води: Наместо да излезат на терен, некои чекаат да се случи нешто лошо, за да ја напишат својата следна критика

Градоначалникот Орце Ѓорѓиевски со објава на социјалните мрежи по синоќешните случувања, во кои му се приклучи на градоначалникот на општина Студеничани, Азем Садику, во справување со надојдените води на Маркова Река за ситуацијата што побрзо да се стави под контрола, упати порака: во моменти на криза, не постојат институционални граници, постојат само човечки животи. Потенцираше дека во критични моменти не треба да се чека, туку да се делува – со срце, со раце, со присуство на терен. Тој упати благодарност до сите што помогнаа, но и остра критика кон оние кои кризата ја користат само за политички поени.
„Во ноќите кога државата најмногу треба да биде држава, нема надлежности – има само човечки животи. Кога има несреќа, никој не треба да гледа дали надлежноста е на една или на друга институција, град или општина. Во тие моменти, единствено важно е да се покаже емпатија и солидарност со луѓето.
Така постапивме и оваа ноќ. Заедно со моите колеги, Азем и Дејан- градоначалниците на Студеничани и Аеродром, останавме до раните утрински часови.
Иако надлежноста е на Градот Скопје, од кој веќе подолго време бараме санација на коритото на Маркова Река (за што уредно имаме доставено документација и известување дека „нема предвидени средства“), решивме да не чекаме уште една трагедија. Презедовме активности веднаш. Како луѓе, како јавни личности, како совесни политичари.
Во текот на ноќта, со лична ангажираност, учествувавме во евакуацијата на нашите сограѓани: Енис, Фуркан, Хамза и Али, кои беа заглавени во надојдените води – сега се безбедни.
Мустафовски, кој беспомошно се бореше да не стане жртва на разбеснетата река – денес е дома.
И уште многу други – денес се живи и со своите семејства благодарение на брзата реакција.
Изразувам искрена благодарност до премиерот Христијан Мицкоски, кој веднаш се стави на располагање и со кого бевме во постојана комуникација до доцна во ноќта. Благодарност и до сите колеги, волонтери и граѓани кои не прашаа „чива надлежност е“, туку помогнаа – со срце и со раце.
Но, секогаш кога има неволја, додека едни помагаат, други прават статуси од топлината на својата дневна соба.
Наместо да излезат на терен, некои чекаат да се случи нешто лошо, за да ја напишат својата следна критика.
Тоа не е политика. Тоа е бедна навика што ќе остане зад нас. Засекогаш“, вели Ѓорѓиевски.
Како што вели, политичар се покажува кога е најтешко. „Кога не се штедиш, кога не се криеш, кога не глумиш статуси, туку си таму, со луѓето. Во првите редови“, порача Ѓорѓиевски.
Претходно со своја објава на социјалните мрежи изреагира и градоначалничката на Скопје, Данела Арсовска, која напиша дека џабе се слика со лажен хедонизам градоначалникот Орце Ѓорѓиевски. Му порача дека со превенција се спречуваат поплави а не со глумење на спасител.