Министерот за надворешни работи на Република Македонија Никола Попоски, во четврток имаше обраќање пред пратениците на Комисијата за надворешна политика во Собранието на Република Македонија.

Се осврна на најзначајните активности на полето на надворешната политика во 2015 година: процесот на европското и евроатлантско интегрирање, односите со државите од соседството и пошироко во светот, економската и јавната дипломатија, грижата за македонските граѓани и интереси во странство, како и други значајни активности на Министерството. Информираше и за успешното претседавање со Централно-европската иницијатива.

„Членството во ЕУостанува основен национален приоритет. Дијалогот се одвива во континуитет што е од значење во насока на одржливост на процесот,” истакна министерот Попоски. Тој се осврна и на значењето на овогодишната препорака на ЕК за отпочнување на пристапни преговори.  

„По седми пат, и оваа година, Европската комисија даде препорака за почеток на преговори со Унијата, што е од значење за зачувување на моментумот и фокусот врз реформскиот процес. Спроведувањето на преостанатите обврски од политичкиот договор, реформскиот процес и спроведувањето на изборите во април 2016 се наша заедничка обврска. Ние мораме да испорачаме и  да ги лишиме од изговори сите оние што ја доведуваат во прашање нашата подготвеност за почеток на пристапните преговори. Сметаме дека е од взаемен интерес, Унијата на пролет да ги иницира пристапните преговори.  На тој начин,  кредибилитетот на политиката за проширување ќе се зајакне”, истакна МНР Попоски.

 “Континуираниот политички и општествен консензус за членство на Македонија во Алијансата и понатаму претставува генератор за нашите евро-атлантски аспирации. Пресудата на Меѓународниот суд на правдата останува силен аргумент од правен аспект“, заклучи МНР Попоски.

Република Македонија и во текот на 2015 настојуваше да развива добрососедски односи со сите соседи и да ја унапредува регионалната соработката вклучително во рамките на регионалните организации и иницијативи во кои партиципира.

 „Успевме да оствариме дополнителен визибилитет во регионални рамки, пред сè преку успешното претседавање со Централно-европската иницијатива како најстара организација од регионот, со изразена евро-интегративна димензија”, истакна МНР Попоски. 

Реферирајќи на односите со соседните држави, истакна дека односите со Србија, Албанија и Косово и во 2015 бележат позитивен тренд заснован врз споделување на европските вредности и интегративни заложби. Подвлече дека сме посветени на натамошното унапредување на односите со Бугарија со која имаме сестрана соработка, вклучително и преку  постигнување финален исчекор кон  склучување на Договорот за пријателство, добрососедство и соработка. Зборувајќи за односите со Грција, упати на заложбите за унапредување на дијалогот и соработката преку развивање на клима на меѓусебна доверба. Констатираше дека односите бележат извесен позитивен тренд.

„Не е реално да креираме очекувања дека позитивниот тренд на соработка и комуникација може преку ноќ да го реши наметнатиот спор кој нè оптоварува над две децении. Од наша страна ќе бидеме ангажирани за негово надминување. Притоа ќе се водиме од добро познатите ставови и интереси на Р. Македонија, кои се засновани на европските вредности за недискриминација, почитување на демократските стандарди, како и меѓународните правни норми. Во секој случај, ќе работиме на соработка со јужниот сосед бидејќи е тоа наш стратешки интерес“.

 Тој се осврна и на билатералните односи со европските и воневропските држави, со дел од кои беше соодветно одбележана 20-годишнината од воспоставувањето на дипломатските односи. Остварени се голем број посети и средби на разни нивоа со политичка, но и економска димензија, усогласени низа проекти, потпишани договори и проектирани идни активности, со цел интензивирање на соработката и пријателството.  

 Во рамките на мултилатералните ангажмани, министерот Попоски истакна дека Р. Македонија активно придонесува врз процесите во мултилатералната арена. Тоа, меѓудругото, го аргументираше сочленството и активното учество во Советот за човекови права во Женева,  Бордот на гувернери на Меѓународната агенција за атомска енергија во Виена, како и во Извршниот одбор на УНЕСКО. Во своето обраќање се осврна и на соработката со ОБСЕ. Говорејќи за престојните избори во април 2016 година, тој заклучи “ОБСЕ има експертиза која може да биде корисна за зголемување на довербата и одржување фер и демократски избори. Тоа ќе биде од помош за отстранување на креирани предизвици поради недоверба.“  Информираше дека согласно првичните најави изборите ќе ги набљудуваат најмалку 300 меѓународни набљудувачи.

Во продолжение, се задржа на економската дипломатија како важен аспект во процесот на привлекување странски инвестиции и промоција на РМ како атрактивна туристичка дестинација.  Упати на проактивниот ангажман во оваа сфера, преку кој македонската дипломатија има придонесено во реализацијата на околу дваесетина проекти поврзани со директните странски инвестиции.

 Министерот Попоски информираше за остварените активности и идни планови во неколку важни сектори на МНР, и како такви ги издвои: јавната дипломатија, дипломатската академија и Институтот за геостратешки истражувања и надворешна политика.

Информираше за активностите за зајакнување на комуникацијата и збогатување на содржините во соработката со припадниците на македонските национални заедници во соседните држави и воопшто, припадниците на дијаспората во светот.

 Во делот на конзуларната надлежност на Министерството, акцент беше ставен на активностите за заштитата на интересите на македонските државјани во странство. /крај/со/ст