Министерот за надворешни работи Никола Попоски во интервју за австриски Der Standard, потенцира дека колку подолго земјата е надвор од Европската унија (ЕУ), толку се поголеми шансите за да настане хаос внатре во земјата но и на Балканот.

„Колку подолго Македонија е надвор од ЕУ толку поголеми се шансите да се направи хаос тука. На Балканот има групи кои не направија ништо друго освен што водат војни и многу од нив имаат криминална заднина и ги користат политичките агенди“, вели Попоски.

Запрашан околу решавањето на спорот за името со Грција, македонскиот министер смета дека во моментот јужниот сосед не е во најдобра состојба да се фокусира на овој проблем, а бегалската криза и затворањето на балканската мигрантска рута дополнително ги отежнува односите меѓу двете страни.

„Целата ситуација ни ги отежна односите ос Грција. Грција со години го блокира нашиот влез во НАТО и во ЕУ, но нашата цел е да ги олабавиме односите. Откако почнавме да ги спроведуваме одлуките на Советот на ЕУ, Грција гледа на тоа како да ѝ го отежнуваме животот. Но тоа не беше нашата намера. Сега Грција сфати дека ние ѝ правиме услуга на земјата со тоа што спречуваме нелегална миграција. На крај, со миграциската криза се отежнува и економијата. На пример, половина од нашиот увоз и извоз оди преку пристаништето во Солун и ако земат предвид и прекините на патиштата и железничката пруга, тогаш е драматично“, вели Попоски.

Според шефот на македонската дипломатија, одговорноста околу евроинтеграциите на Македонија лежат и во самата ЕУ, која едногласно треба да донесе позитивна одлука за почеток на преговорите за членство.

„ЕУ не инсистира, како во сите други процеси на проширување, дека овие билатерални теми мора да се решат во преговорите за проширување. Сите земји-членки на ЕУ треба да се согласат дека треба да ги почнеме преговорите за проширување. Тоа би било позитивен стимул за двете страни. Но, сега сме оставени надвор и нема надеж. Ако во ситуацијата се повикаме на тоа да се најде прифатливо решение за сите страни, тогаш тоа е како да затворите два волци и едно јагне во иста просторија и да им речете: се обидуваме да ви најдеме замено прифатлив предлог за вечера“, порача Попоски.

Министерот во интервјуто за австрискиот весник се осврнува и на бегалската криза, за која потенцира дека земјата веќе потрошила огромни финански средства во обидите успешно да ја изменаџира истата.

„За управување со бегалската криза потрошени се 30 до 40 милиони евра. Распределивме дополнителни трупи и дополнителна опрема, има и трошоци за прекувремена работа и за транспорт. Во последните два месеци месеци спроведовме европски проект кој ни овозможува да покриеме барем дел од трошоците за македонските службеници или службениците од ЕУ. Но не станува збор за Фронтекс, туку и за билатералните спогодби со Словенија, Австрија, Унгарија, Чешка, Хрватска“, додава Попоски во интервјуто за Der Standard./крај/мф/бс