Министерот за надворешни работи, Никола Попоски, во четврток, 25-ти септември, на маргините на Генералното собрание на Обединетите нации во Њујорк, се сретна со неколку свои колеги, а учествуваше и на средби чиј фокус беше југоисточна Европа.

Од Министерството за надворешни работи соопштија дека министерот Попоски се сретнал со министерот за надворешни работи на Виетнам, Фам Бин Мин. 

„Двајцата министри се договорија, со цел да се зголеми економската соработка, да се направат работни групи од министерствата за надворешни работи и финансии, за финализирање на договорите за промоција на инвестиции и ослободување од двојно оданочување. Министерот Бин Мин искажа интерес за возвратна посета на Македонија и продолжување на активностите за бизнис промоција во двете земји“, се вели во соопштението. 

Попоски се сретнал и со министерот за надворешни работи на Обединетите арапски емирати, Шеикот Абдула Бин Зајед Бин Султан Ал Нахијан, кој го оценил отворањето на македонска амбасада во ОАЕ како одличен избор и подвлече дека нивниот фокус e да го прошират своето присуство со инвестиции во Балканот. Двајцата министри се согласиле дека треба да се продолжи со либерализацијата на визниот режим и со проширување на промоцијата на можности за соработка меѓу двете земји и преку склучување на договори. 

Министерот Попоски се сретнал и со министерот за надворешни работи на Кралството Шпанија, Хозе Мануел Гарсија Маргало, кој го потврдил длабокото пријателство помеѓу двете земји и искажал благодарност за подршката на Република Македонија при кандидатурата на Шпанија за членство во Советот за безбедност на Обединетите нации. 

Шефот на македонската дипломатија се сретнал и со Генералниот секретар на ОБСЕ, Ламберто Заниер, со кого разговарал за безбедносната ситуација на територијата на земји членки на ОБСЕ. 

Албанскиот МНР Дитмир Бушати беше домаќин на работниот ручек на министри за надворешни работи во рамки на Процесот за соработка на југоисточна европа (ПСЈИЕ). 

„Министрите подвлекоа дека фокусот колку што е на регионалната соработка преку вакви форуми, исто треба да се биде и на билатералната соработка помеѓу секои од земјите во регионот посебно. Министерот Попоски потенцираше дека, “покрај политичката комуникација меѓу влади и администрација, земјите треба да посветат внимание на зближување на бизнис заедниците и така, претставувајќи се како заеднички пазар, да привлекуваат инвеститори однадвор. Тоа ќе биде фокусот на Македонија како претседавач на Централно европската иницијатива идната година, тоа предлагаме да биде фокус и на ПСЈИЕ идната година“, соопшти МНР. 

На крај, министерот Попоски учествувал на Тркалезната маса за Регионалната перспектива на Западен балкан на заканата од странски борци во Сирија и Ирак, организирана од страна на Помошникот државен секретар на САД за Европа, Викториа Нуланд. 

САД и сите земји од Западен балкан едногласно потврдиле дека насилниот религиозен екстремизам може ефективно да се потисне само преку ефикасна регионална соработка. 

„Напорите кон потиснување на вакви насилни појави можат да вродат резултати само ако се насочени воедно кон манифестацијата на насилството, да се спречи ширење на погрешни толкувања, поттикнување на верска омраза или мобилизирање на борци во странство, како и преку пораки за обесхрабрување на фанатизмот од страна на верските лидери“, заклучиле тие. 

Исто така, вчера Попоски заедно со претседателот Ѓорге Иванов присуствуаа на прием во МКЦ, организиран од македонски интелектуалци во Њујорк, со настап на познатиот македонски музичар Дуке Бојаџиев.крај/мф