Политичките кризи не се ексклузивитет во Македонија, Балканот а, ниту, пак, во Европската унија (ЕУ), она што е важно е како ќе се справиме со нив и дали тоа ќе придонесе за јакнење на институциите и државата, порача во средата шефот на македонската дипломатија Никола Попоски, во пресрет на конференцијата „Париз и Балканот 2016 – главните предизвици и очекувања за Македонија“, односно подготвителниот состанок за Самитот „Западен Балкан 6“ (WB6) кој ќе се одржи на 4-ти јули во Париз, како дел од Берлинскиот процес.

„Ова не смее да биде никаков разубедувачки факт за посветеноста на следниот самит и нашата интеграција во ЕУ, бидејќи доколку така се однесуваа нашите претходници кои се дел од ЕУ, таа можеби немаше ниту да постои. Ако која и да е политичка криза беше фактор да не продолжиме со европската интеграција, тогаш работата ќе беше назад уште во 50-тите години“, изјави Попоски.

Француската амбасадорка Лоренс Оер додаде дека во моментов постои политичка криза и во неколку други земји во регионот и дека она што е во моментов важно е политичките партии да продолжат да разговараат околу изборите и да постигнат договор.

„Во другите земји, исто така, се случува политичка криза во моментот, не само во Скопје и најважно е политичките партии да продолжат да разговараат околу изборите и да се договорат, бидејќи политичката криза не треба да генерира и други видови кризи, односно земјата да се најде во некаква економска криза, сето тоа е нешто што ЕУ воопшто не го посакува. Самитот кој ќе се одржи во Париз е многу важен настан за напредокот на земјата во повеќе области, како што се инфраструктурата, младите и граѓанското општество“, рече Оер.

Запрашан околу тоа како ќе се претстави Македонија на овој Самит, Попоски рече дека сликата за земјата нема да биден ишто полоша од која и да е слика за другите држави во регионот, а може и пошироко. Министерот, исто така, се осврна и на позициите на Бугарија и Грција во однос на можното воведување на економски санкции кон Македонија поради долготрајната политичка криза во земјата.

„Грција е во најдобра позиција да процени колку е неразумно и непродуктивно да се воведуваат санкции и ембарга бидјеќи поминаа низ тоа во 90-тите години и имаат сфатено дека ефектот во ниедно поле не бил позитивен. Нивото на соработка меѓу Македонија и Грција само охрабрува и секоја од земјите членки треба да носи одлуките врз основа на нивното лично искуство, барем во случајот на Грција и Бугарија крајно неразумно е да има било какво конфротирање со Македонија, туку тие земји треба да бидат пионери во промоциајта на македонската интеграција во ЕУ“, додаде Попоски.

Во поглед на тоа дали последните политички случувања ќе имаат ефект за препораката на Европската комисија за почетокот на пристапните преговори, Попоски вели дека состојбата секако ќе ја чини земјата, но дека Македонија мора да се посвети на спроведувањето на итните реформски приоритети.

„Во оваа фаза не зборуваме за препорака, тоа е нешто што го оценува Комисијата и таа во ноември повторно ќе има извештај и видување. И во овој дел политичката криза има цена на чинење, но доколку го задржиме фокусот на спроведувањето на итните реформски приоритети, без разлика на тоа колку брзо ќе се одвиваат другите работи поврзани со политичкиот дијалог, Македонија е земја која има капацитет да води преговори со ЕУ. Остатокот е политичко прашање, Советот носи одлуки врз основа политичка проценка“, заклучи шефот на дипломатијата./крај/мф/бс

Извор: Фото/МИА