Македонија
Попоски: Притисокот од мигрантскиот бран не е исчезнат, туку само привремено решен
Вицепремиерот и министер за надворешни работи Никола Попоски, во четвртокот учествуваше на меѓународната конференција за миграции во Виена, а во рамките на која имаше обраќање на панел на високо политичко ниво „Европски политики за мигранти и бегалци – Што потоа”.
„Постои стравување во европски рамки дека може да се повтори 2015-та година со масовни хаотични миграциски движења. Тоа може да доведе до низа еднострани одлуки од земјите членки на ЕУ. Во крајна линија и суспензии на слободата на движење. Во година кога неколку членки имаат избори ризиците од политизација се многу поголеми“, изјави Попоски.
„Сегашниот ред е резултат на контролите што се воведоа за спречување нелегални премини и на Договорот ЕУ-Турција. Едно е јасно, притисокот не е исчезнат туку само се изнајдени привремени решенија”, истакна тој, посочувајќи дека во Виена најголем дел од разговорите биле за тоа што може дополнително да се направи во овој период на затишје.
На панелот учествуваа и МНР на Австрија, Себастијан Курц, Генералниот секретар на ОБСЕ Ламберто Заниер, Еврокомесарот Јоханес Хан, Потпретседателот на Владата и МНР на Малта Џорџ Вела – со кои на маргините на конференцијата, МНР Попоски оствари билатерални средби.
На средбите се разговараше за билатералните односи, набљудувачката мисија на изборниот процес во Република Македонија, Извештајот на Европската Комисија и неопходноста да се промени пристапот на повторени препораки без процес на преговори за членство.
„Последното е неопходно да биде поддржано од сите кои и мислат добро на Унијата и се грижат за нејзиниот публицитет”, порача македонскиот министер./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Неколку скопски општини денеска без струја
Од ЕВН Македонија АД известуваат дека денеска без електрична енергија ќе останат:
– од 08:30 до 14:00 часот, корисниците од дел од улиците: Полог и Кочанска, општина Кисела Вода;
– од 08:30 до 16:00 часот, корисниците од населените места и објектите од село Алдинци кон Солунска Глава, општина Студеничани;
– од 09:00 до 14:00 часот, корисниците од дел од ул. Македонско Косовска Бригада, општина Шуто Оризари;
– од 09:00 до 14:00 часот, корисниците од објектите во околината на зграда бр. 17 на бул. Партизански Одреди, општина Центар;
– од 09:30 до 13:00 часот, корисниците од ул. 6 во село Бардовци, општина Карпош.
Македонија
Непречен сообраќај по влажни коловози
Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Времето денес облачно со повремени врнежи од дожд и засилен ветер
Времето денес ќе биде променливо облачно и релативно топло со повремени локални врнежи од дожд. Наместа врнежите ќе бидат поројни со услови за појава на грмежи. Ќе дува засилен до силен ветер од југозападен правец (над 70 km/h). Минималната температура ќе биде во интервал од 8 до 15, а максималната ќе достигне од 19 до 24 степени.
Во Скопје, променливо облачно, претпладне со повремен дожд, локално пороен. Ќе дува умерен, во делови од котлината повремено засилен ветер од јужен правец. Минималната температура ќе се спушти до 13, а максималната ќе достигне до 23 степени.
Во утре ќе има преодно стабилизирање на времето. Од недела до вторник ќе преовладува променливо облачно време со повремени локални врнежи од дожд. Во понеделник наместа врнежите ќе бидат пообилни и поројни со услови за појава на грмежи. Ќе дува засилен, повремено силен ветер од јужен правец (над 70 km/h).

