Очигледно беше дека изостана одговор од страна на грчките власти при инцидентите што се случија во неделата кај Идомени кога беше спречен масовен насилен премин на мигранти на македонско-грчката границаа, додека македонските власти реагираа согласно одговорноста за сопствената територија и одлуките на Советот на Европската унија, рече во вторникот министерот за надворешни работи Никола Попоски.

Попоски истакна дека постои простор за подобрување на соработката со Грција, како и дека таа ќе се продолжи. Според него, и во иднина може да се очекуваат слични инциденти како оној од изминатиот викенд.

Група мигранти во неделата ја пробија заштитната ограда на македонско – грчката граница, при што официјално биле повредени вкупно 23 полицајци и припадници на АРМ.

„Веројатно беше очигледно дека изостана определен одговор од страна на грчките власти при овие инциденти. Ние не остануваме на тоа дека со вчерашниот инцидент завршува предизвикот. Многу е веројатно дека ќе има многу други вакви предизвици. Но, решението е следно: повлекување на мигрантите во рамки на центрите за прием кои се финансирани од ЕУ и ставени на располагање, продолжување на одлуката за гранично обезбедување и функционирање на планот кој е договорен помеѓу ЕУ и Турција. Друга подобра алтернатива во овој момент ниту од ЕУ, ниту од нас, ниту од Грција, не е дојдена и треба само да се фокусираме на негово спроведување“, рече министерот за надворешни работи.

На прашњето дали бегалците кои се наоѓаат во прифатните центри во Македонија, Попоски одговори дека тие треба да бидат опфатени со договорот ЕУ-Турција.

„Во врска со бегалците кои се наоѓаат во Македонија без никакава алтернатива тие треба да бидат вклучени во делот на сите оние мигранти кои се заглавени меѓу грчките острови и Германија, односно треба да бидат дел од договорот кој веќе е воспоставен. За оние кои се легитимни азилобаратели, а во Македонија се дојдени од земја членка на ЕУ да бидат прифатени во таа или во друга земја членка на ЕУ. За оние пак кои не се, мора да бидат предмет на реадмисија односно враќање во нивните земји на потекло. Дали се заглавени во Македонија, во Србија, во Австрија или во Грција третманот треба да биде подеднаков“, порача е Попоски.

„Секоја држава, а тоа е и дел од одлуките на ЕУ, треба да ги преземе одговорностите на сопствена територија. Македонските безбедносни сили презедоа мерки за спречување нелегален масовен премин на мигрантите со користење насилство на македонска територија. Тоа е нешто што не сме го одлучиле поради наша лична волја, туку е дел од одлуките што ги донесе Советот на ЕУ. Впрочем, за ова прашање јавно се изјаснија и Европската комисија и неколку земји членки. Пораката е многу јасна. Секој треба да си води сметка за сопствената територија и мислам дека многу попродуктивно ќе биде во следниот период, доколку и грчките власти и сите оние кои се наоѓаат на балканската рута, се фокусираат на преземање мерки на сопствената територија и за хуман третман, но и за безбедност во граничните рамки“, рече шефот на македонската дипломатија на состанокот на челнциите на владејачката коалиција „За подобра Македонија“ предводена од ВМРО-ДПМНЕ./крај/мф/сн

Извор: Макфакс