Надворешна политика
Свечено испратен контингентот од АРМ во силите ИСАФ во Авганистан
Република Македонија 20 години успешно учествува во мисијата ИСАФ и ние сме горди со сите досегашни учества во неа, со сите војници кои досега учествуваа и со кои сега одат во Авганистан, истакна министерот за одбрана Зоран Јолевски во четвртокот по повод испраќањето на последниот контингент од Армијата на Република Македонија во рамките на силите ИСАФ во Авганистан.
Воедно, пред началникот на Генералштабот на АРМ, генерал-потполковник Горанчо Котески, државниот секретар во министерството, Сашо Стефаноски и останатиот воен врв, Јолевски додаде дека учеството во оваа меѓународна мисија е уште една можност да се потврдат и покажат вештините, знаењата и професионалниот однос кон секоја дадена задача.
„Констатацијата за вашата врвна обученост не е само наша – тоа го потврдуваат сите наши партнери во силите ИСАФ, партнери во НАТО Алијансата“, изјави Јолевски.
Укажувајќи на целите на земјата, Јолевски порача дека стратешката определба на Република Македонија е да биде дел од Европската Унија и НАТО-алијансата, час поскоро.
Командантот на контингентот, потполковникот Али Хајро, во своето обраќање пред присутните рече дека пред припадниците на оваа ротација е една одговорна задача кон која треба сериозно да се пристапи.
„Како претставници на АРМ, ветуваме дека доследно и чесно ќе го претставиме ликот на Армијата на Република Македонија. Јас верувам во вас, во вашата лојалност, храброст и решителност, но исто така барам и дисциплинирано, одговорно, совесно и професионално да одговорите на поставените задачи“, порача потполковникот Хајро.
Во рамките на седумнаесеттата ротација од Армијата на Република Македонија во силите ИСАФ во Авганистан, 150 припадници на Првата механизирана пешадиска бригада заедно со најстариот национален претставник ќе бидат распоредени во главната команда на силите, во Кабул. Припадниците на АРМ ќе бидат задолжени за обезбедување на главната команда на силите, и тоа во рамките на контингентот од Обединетото Кралство./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муцунски во прва работна посета на Брисел на средби со генералниот секретар на НАТО и високи претставници на ЕУ
Министерот за надворешни работи и надворешна трговија, Тимчо Муцунски, од Луксембург продолжува во прва работна посета на Брисел, во чии рамки ќе се сретне со генералниот секретар на НАТО, Јенс Столтенберг, како и високи претставници на Европската Унија.
Во фокусот на разговорите ќе бидат евроинтегративниот процес на државата, реформските процеси, како и активностите во рамките на НАТО, со посебен фокус на претстојниот аамит на алијансата, што ќе се одржи идниот месец во Вашингтон.
Посетата на Муцунски на Брисел на почетокот на мандатот како министер за надворешни работи и надворешна трговија е показател за цврстата определба на земјата за што побрзо членство во Европската Унија и посветениот придонес кон глобалниот мир и регионалната стабилност како кредибилна земја членка на НАТО.
Македонија
Муцунски се сретна со Вархељ: Новата Влада е силно посветена на реформската агенда и европските интеграции
Министерот за надворешни работи и надворешна трговија, Тимчо Муцунски, се сретна со еврокомесарот за соседство и проширување, Оливер Вархељ, во Луксембург.
Во фокусот на разговорите беа приоритетите и активностите на новата Влада, како и актуелностите поврзани со европското досие на земјата.
„Новата Влада е силно посветена на реформската агенда и европските интеграции, а во периодот што следува ќе преземеме низа активности во насока на забрзување на нашиот евроинтегративен процес. Политиката на проширување на ЕУ е најдобрата алатка за поттикнување на реформските и демократските процеси, но истовремено е и клучна геостратешка инвестиција во мир, стабилност и економски развој на земјите од регионот, но и Европа како целина“, нагласи Муцунски.
Соговорниците разменија мислења и за планот за раст на ЕУ оценувајќи го како силна поддршка од страна на ЕУ за економско зајакнување на земјите од Западен Балкан, поттикнување на регионалната соработка, но и доближување на земјите од регионот поблиску до ЕУ и пред формалното членство.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.