Надворешна политика
УНХЦР: Во Македонија рекорден влез на 5.600 мигранти во еден ден
Рекордни 5.600 мигранти влегле во четвртокот во Македонија од Грција, двојно повеќе отколку вообичаена досегашна бројка кога тој број осцилираше меѓу 2.000 и 3.000лица, објави во петокот Високиот комесаријат на ОН за бегалци – УНХЦР во соопштението за медиумите.
Претходно во петокот македонското Министерство за внатрешни работи објави дека во четвртокот дека биле издадени потврди за искажана намера за поднесување барање за азил на вкупно 1.808 странски државјани меѓу кои 310 се деца кои го придружуваат носителот на потврдата, како и уште 125 деца кои патуваат без родител.
„Вчера (во четвртокот, 3-ти септември) во Македонија влегле 5.600 луѓе“, се наведува во изјавата на портпаролката на УНХЦР, Мелиса Флеминг. Станува збор за рекорден број влегувања во Македонија од Грција во еден ден, истакнува Флеминг и појаснува дека е тешко да се предвиди како ќе се развиваат работите следните денови и седмици.
Претставникот на УНИЦЕФ, Бертран Десмулинс, пак, предупредува дека македонските власти успеваат да регистрираат само половина од мигрантите коишто пристигнуваат од Грција, поради што во прифатните центри имаат отежнат пристап до хуманитарната помош. На новинарско прашање во седиштето во Женева, тој не знаеше да одговори дали причините за тоа се од логистички или, пак, од политички карактер.
Вообичаено од почетокот на октомври, поради влошувањето на времето на Средоземјето, ослабува притисокот на бегалците врз Грција и Италија, но последните бројки и натаму се високи без оглед на временските прилики, додава Флеминг. Од јануари годинава Средоземјето го минале 365.000 мигранти, објави Меѓународната организација за миграции (IMO).
Во периодот од 19-ти јуни до 4-ти септември во Македонија се издадени потврди на вкупно 58.959 странски државјани, од кои, 40.318 се мажи, 8.047 се жени, 9.277 се деца кои го придружуваат носителот на потврдата, како и уште 1.317 деца кои патуваат без родител, на кои им е издадена потврда за искажана намера за поднесување барање за признавање на право на азил, објави во петокот Министерството за внатрешни работи.
Од почетокот на 2015 година, бројот на регистрирани бегалци и мигранти е поголем од 130.000, а доколку продолжи ваквиот тренд на нивниот прилив од Грција, се проценува дека до почетокот на зимата ќе надмине 200.000 лица.
Говорејќи во четвртокот за Словенечката телевизија, македонскиот министер за надворешни работи Никола Попоски истакна дека Македонија, којашто веќе подолг период е соочена со навалицата од мигранти и бегалци „не доби многу помош од Европската унија, но неоправдано стекна многу негативен публицитет поради наводните бруталности на нејзините безбедносни сили“.
„Единствената конкретна помош изнесуваше 18.000 евра за македонскиот Црвен крст“, реле Попоски, додавајќи дека трошоците коишто Македонија ги има со мигрантите се изразуваат во милиони евра.
„Лесно е да се осудува Македонија од далеку, а да не се помага да се надмине проблемот. Би можеле да се однесуваме неодговорно и да кажеме дека тоа не е наша грижа, и да ја отвориме границата за сите, но тоа би било неодговорно и би ја засилило кризата во Европската унија“, предупреди Попоски./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.