Бугарскиот европратеник Ангел Џамбаски остро го критикуваше хрватскиот претседател Зоран Милановиќ, кој, како што рече, ја обвини Софија за мешање во внатрешните работи на Северна Македонија, дека сака да и наштети и да ја понижи.

Џамбаски вели дека ова е уште една антибугарска кампања и намерна провокација, и тоа на прашање каде што не се потребни тензии.

Според Џамбаски, Милановиќ е загрижен поради барањата на Софија за промена на некои делови од историјата во македонските учебници, што е услов Бугарија да даде зелено светло и да овозможи отворање на преговорите за влез на официјално Скопје во ЕУ.

Осудувајќи ја изјавата на Милановиќ, Џамбаски вели дека хрватскиот претседател се меша во внатрешните работи на Бугарија, со најавата дека отворено ќе се спротивстави на бугарските услови за членство на Македонија во ЕУ.

„Шефот на хрватската држава е огорчен од фактот дека ваквите активности против РСМ доаѓаат од земја која е членка на ЕУ. Јас сум огорчен и од фактот дека една членка на ЕУ напаѓа друга и зазема силна страна во спорот во кој тој не е вмешан“, напиша Џамбаски.

Тој вели дека однесувањето на Милановиќ е неодговорно поради тврдењето дека Бугарија сака да и наштети на Македонија и да ја понижи.

„Морам уште еднаш да повторам … Нашата долгорочна битка е во учебниците што ги образуваат новите генерации во РСМ …“, напиша Џамбаски.

Вчера, за време на состанокот во рамките на процесот Брдо-Бриони на Брдо кај Крањ, Милановиќ рече дека не сите земји биле на исто ниво за време на преговорите за пристапување во ЕУ, а што се однесува до Северна Македонија, тој рече дека земјата е во невозможна позиција.

Тој рече дека се работи за некои услови што Бугарија и ги постави на Северна Македонија во напредната фаза на европскиот пат, и се однесува на содржината на некои учебници по историја.

Опозициската ВМРО-ДПМНЕ бара средба со власта за законот за изградба на клинички центар и дотогаш најавува блокада во законодавниот дом.

Координаторот на пратеничката група на ВМРО-ДПМНЕ, Никола Мицевски, изјави дека неопходни се измени на законското решение.

„Законот за клинички центар ќе биде блокиран сè до моментот додека тој предлог на закон од 35 листови со коишто бараат да потрошат пола милијарда евра не го поправат и исправат и не седнат со опозицијата да разговараат за тоа. Да ве потсетам, во 2017 година министерот Филипче во оваа сала заедно со сите членови на Комисијата за здравство и сите пратенички групи, презентираше проект дека ќе почне да се гради клинички центар. Тоа беше во 2017 година. Ние сме на средината на 2021 година, ‘К’ нема од клинички центар“, рече Мицевски.

По основ на другите обвинувања за законските решенија, тој истакна дека Законот за служба во Армијата има одредени забелешки за коишто имало реакција од одредени групации на пензионирани офицери, а ВМРО-ДПМНЕ поднеле четири суштински амандмани коишто не се прифатени од владејачко мнозинство.

„Морам да напоменам дека таков ист закон, комплетно ист закон, со 4-те забелешки вметнати од наша страна е во собраниска процедура и, за жал, на денешната седница истата таа власт којашто нè обвинува за блокада, не го става овој закон како точка на дневен ред, а во неа се опфатени сите поволности коишто ги имаат и професионалните војници во однос на добивање одредени средства, некаде околу 1.000 евра по основ на година работен стаж во случај на пензионирање и неможност државата да им најде вработување на истите“, рече Мицевски.

Пратениците на ВМРО-ДПМНЕ продолжуваат со опструкции, со блокади на важни законски решенија, обвини портпаролот на СДСМ, Костадин Костадинов.

Тој вели дека партијата предводена од Христијан Мицкоски по секоја цена работи на штета на граѓаните, на државата.

„ВМРО-ДПМНЕ овде во Собранието не се откажува од блокада на законот со кој државата конечно ќе добие нов современ клинички центар по речиси 80 години. Пратениците на ВМРО-ДПМНЕ се против унапредување на здравствениот систем, против здравствените работници, против подобри здравствени услуги за сите граѓани. Пратениците на ВМРО-ДПМНЕ се и против наставниците и стручните соработници“, изјави Костадинов.

Тој нагласи дека ВМРО-ДПМНЕ е против тоа над 4.700 наставници и стручни соработници во основното и средното образование да добијат вработување на неопределено време, да добијат економска сигурност. Исто така, како што рече, ВМРО-ДПМНЕ се против припадниците на Армијата.

„Тие се противат војниците да добиваат отпремнина и до 20.000 евра и да имаат други поволности при пензионирање. Тие се против стипендирање на дефицитарните кадри во Армијата и натамошно јакнење на капацитетите на одбраната. Пратениците на ВМРО-ДПМНЕ се против граѓаните, против здравствените работници, против наставниците, против образованието, против припадниците на Армијата. Сè што е во интерес на граѓаните, ВМРО-ДПМНЕ го кочи, опструира и блокира“, додаде портпаролот на владејачката партија.

Затоа шест пати ВМРО- ДПМНЕ се поразувани на избори, затоа уште долго ќе се во опозиција, порача тој.