Македонија
Oсмани: НАТО и ОБСЕ треба да ја одиграат својата улога кога станува збор за поддршката на Украина

Претседавачот со ОБСЕ, Бујар Османи, денеска во Брисел имаше свое обраќање пред Северноатлантскиот совет на НАТО, каде што ја претстави програмата на Северна Македонија како претседавач со ОБСЕ во 2023 година.
Пред Советот, со кој претседаваше заменик-генералниот секретар на НАТО, Мирчеа Џоана, Османи ја истакна важноста на улогата на НАТО и ОБСЕ во европската безбедносна архитектура и ја презентира визијата на Северна Македонија како претседавач на ОБСЕ. Тој посочи дека фокусот на претседавањето ќе биде ставен на луѓето и на вредностите и принципите на ОБСЕ, кои беа прекршени со руската агресија врз Украина.
„Агресијата на Руската Федерација против Украина ги потресе столбовите на нашата безбедност“, потенцира Османи додавајќи дека Украина ќе остане врвен приоритет и клучно безбедносно прашање. „Наш приоритет во сите три аспекти ќе биде да обезбедиме суштинска поддршка за Украина и нејзиниот народ“, рече тој.
Претседавачот со ОБСЕ, Османи, пред присутните истакна дека агресијата кон Украина мора да престане, како и дека смртта на цивилите и пустошот се неприфатливи, а последиците и цената на оваа војна за цела Европа и за целиот ОБСЕ-регион ги карактеризира како жални и неподносливи.
„Цивилните страдања се причината за нашиот силен фокус на луѓето кои се први на удар од оваа агресија. Оние кои се директно изложени на војна и конфликти се плашат за своите животи, а пак оние кои се подалеку чувствуваат несигурност, вознемиреност и неизвесност. Нивниот начин на живот е доведен во прашање и нивното секојдневие е нарушено. Нашиот ангажман е пред сѐ за луѓето. Ова е нашето мото и движечката сила за годината што претстои“, истакна Османи пред присутните.
Османи во обраќањето ја спомена улогата на двете организации во промовирањето на контролата на оружјето и мерките за градење доверба и безбедност.
„И двете организации треба да ја одиграат својата улога кога станува збор за поддршка на Украина, но и за другите земји учеснички или партнерите. Тие ги имаат потребните алатки и механизми за да придонесат за поголема безбедност и стабилност“, потенцира Османи.
Османи пред Северноатлантскиот совет на НАТО ги спомена и другите кризни ситуации во регионот на ОБСЕ истакнувајќи дека централна Азија и регионот на Југоисточна Европа ќе останат во фокусот. Тој најави зајакнување на теренските мисии на ОБСЕ и поддршка за севкупното присуство на терен.
На врвот на листата на приоритети на Северна Македонија како претседавач со ОБСЕ, Османи ги посочи и борбата против корупцијата и промовирањето на доброто владеење наведувајќи дека тоа е заедничка болест, која го загрозува демократскиот и социо-економскиот раст.
Тој најави дека Организацијата ќе се посвети на поддршка на основните човекови права и промовирање толеранција и недискриминација како предуслови за општата безбедност.
Претседавачот со ОБСЕ, Османи, на крајот од своето обраќање ја истакна важноста на соработката меѓу ОБСЕ и НАТО.
„Многу ми е драго што стратешкиот концепт усвоен минатата година во Мадрид, кој кристално јасно покажува дека НАТО има намера да ги зајакне нашата заедничка координација и соработката. Како претседавач со ОБСЕ, уверен сум дека сите можеме да имаме корист од оваа соработка бидејќи работиме за да придонесеме во процесите за безбедност и стабилност во Европа и светот“, истакна Османи.
Пред обраќањето пред Северноатлантскиот совет на НАТО, Османи оствари средба со заменик-генералниот секретар на НАТО, Мирчеа Џоана, каде што имаше можност да оддаде признание за ангажманот на Џоана во својство на претседавач со ОБСЕ во 2001 година кога неговите напори доведоа до поголема стабилност на нашата земја и регионот.
Во заедничка изјава Османи повтори дека и покрај нивната поинаква природа и цел, и НАТО и ОБСЕ имаат важна улога во зачувување на европската безбедност. „И двете организации се засновани на принципи и вредности, кои во случајот на ОБСЕ се грубо прекршени со воената агресија. Верувам дека има простор за соработка и треба да ги исцрпиме сите можности за да придонесеме за поголема безбедност во регионот на Европа, но и пошироко“, рече Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ахмети го посети семејството на Хашим Тачи: „Ќе го пречекаме како победник на правдата кога ќе се врати“

Лидерот на ДУИ, Али Ахмети на социјалните мрежи објави дека го посетил семејството на поранешниот косовски претседател Хашим Тачи, за, како што вели, да им даде срце и сила на неговите родители и роднини во битката за правдата.
„Нивниот син со пријателите го брани достоинството на ОВК. Правдата одложува, но не заборава. Гордо ќе го пречекаме Тачи со пријателите кога ќе се врати како победник на правдата“, напиша Ахмети на социјалните мрежи.
Хашим Тачи се изјасни за невин на судењето за воени злосторства на Косово, заедно со тројцата други членови на Главниот штаб на ОВК, Кадри Весели, Јакуп Красниќи и Реџеп Селими, на судскиот процес што пред неколку месеци почна во Хаг по речиси тригодишна истрага и повеќе од 20 години од војната.
Тачи се соочува со 10 обвиненија за апсење, убивање и мачење на оние кои се сметале за непријатели, вклучително и Албанци, Срби и Роми, додека се обидувале да ја преземат власта за време на ослободителната војна во 1998-99 година.
Македонија
Димитров: Северна Македонија да го сфати важното место на историската комисија за пристапувањето во ЕУ

Република Северна Македонија треба да го сфати важното место што го има работата на Мешовитата бугарско-македонска историска комисија во процесот на пристапување на земјата во Европската унија. Ова за бугарската агенција БГНЕС го изјави професорот Ангел Димитров, копретседател на Мешовитата бугарско-македонска комисија за историски прашања.
Во изјавата тој оцени дека на досегашните бројни состаноци не се постигнати резултати.
Темата на која најдолго се задржале било изнајдувањето на заедничка позиција за претставувањето на Охридската архиепископија, но како што кажа Ангелов, за жал не успеале да се договорат, пренесе БГНЕС.
Македонија
Ковачевски се сретна со американската амбасадорка: Важно е сите политички партии да го поддржат европскиот пат

Претседателот на Владата, Димитар Ковачевски, денеска имаше средба амбасадорката на САД во земјава, Анџела Прајс Агелер.
Kaко што соопштија од Владата, на состанокот станало збор за суштинските прашања во врска со напредокот на Северна Македонија во евроинтеграциите.
Реафирмирана е јасната порака на Соединетите Американски Држави, дека земјава по членството во НАТО, треба да стане членка и на ЕУ, за што, нашата држава има силна и конкретна поддршка од САД.
Нагласено е дека Северна Македонија е фактор на стабилноста и безбедноста во регионот и е посочено на важноста – сите политички партии во државата да го поддржат европскиот пат на државата.
Притоа, изразено е очекувањето дека сите политички лидери ќе го имаат предвид актуелниот контекст на случувања и дека во таа насока и ќе се носат и претстојните политички одлуки во Собранието.
На средбата со американската амбасадорка Агелер, како и при средбата на премиерот Ковачевски со сенаторот Крис Марфи во Скопје и на средбите со високите американски претставници Блинкен и Ескобар во САД, е потврдено искреното долгогодишно пријателство и успешното стратешко партнерство помеѓу Северна Македонија и САД, кое што се развива на принципите на доверба и разбирање.
„Како Влада, ја почитуваме добронамерноста на нашиот голем и стратешки партнер САД, како и на другите пријателски држави, членки на НАТО и ЕУ коишто нè поддржуваат во следниот исчекор во евроинтеграциите, којшто има одредувачка насока кон полноправното членство на нашата држава во ЕУ. Реално е очекувањето тоа да се случи до 2030 година и подготвени сме со уште посилен интензитет да работиме на потребните реформски процеси. Граѓаните заслужуваат да живеат во држава членка на Европа, со европски квалитет на живот и европска иднина за младите, во родната земја“, рече премиерот Ковачевски, на средбата со амбасадорката Агелер.