Два месеца најмалку му се потребни на Основното јавно обвинителство да ги разгледа и да утврди што сé има во материјалите најдени во становите на З.Б. каде беше откриена фабрика за фалсификување лични документи, но и пронајдени биле десетици илјади снимени телефонски разговори.

Како што соопшти заменикот на основниот јавен обвинител на ОЈО Скопје, јавниот обвинител Јован Цветановски на прес-конференцијата во вторникот, оформени се повеќе предмети во врска со настанот за поодамна публикувани сомненија во медиумите за наводна афера за печатење на фалсификувани патни исправи, како и за доставени наводно фалсификувани лични карти од едно лице до Министерството за внатрешни работи „По предметите интензивно се постапува од страна на повеќе обвинители. Обвинителите кои постапуваат по предметите досега дадоа наредби за преземање истражни дејствија до одделот за Организиран криминал при МВР и ординационите единици во МВР кои се  надлежни за различни видови вештачења. Во текот на истражните дејствија издадени се наредби за вештачење, претреси и разговори со повеќе лица за утврдување на фактичката состојба“, рече Цветановски.При извршените претреси на станови на осомниченото лице З.Б., како и на други лица, пронајдени се голем број обрасци за патни исправи, возачки дозволи, лични карти и други документи за подготовка на невистинита документација. „Исто така, пронајдени се машини и опрема, и тоа преси, секачи и компјутерска опрема за изготвување фалсификувана документација. Првичните сознанија на обвинителството укажуваат дека постојат основи на сомнение дека порано споменатите патни исправи, лични карти, машини и опрема, соодветствуваат со оние пронајдени при претресот. Добиени се и првични известувања од овластените лица за содржината на пронајдените податоци во компјутерите во кои меѓудругото се наведува дека постојат и фајлови на десетици илјади телефонски разговори. За содржината и потеклото на разговорите поради обемноста на материјалот ќе биде потребен временски период од најмалку два месеца за да утврдиме“, рече обвинителот Цветановски.Постапката се води против повеќе лица, а бидејќи главниот осомничен З.Б., веќе е на издржување казна затвор за него не е потребна дополнителна мерка за негово обезбедување. За другите лица кои во моментов се осомничени од судијата на претходна постапка определени се мерки за обезбедување, но одлуката дали и за кои лица и какви мерки за обезбедување ќе бидат потребни и ќе побара е само на јавните обвинители кои работат по тие предмети.Како што рече Цветановски. поради карактерот на истрагата во овој момент не се во можност да споделат повеќе информации./крај/мф/бб