Министерство за образование и наука во континуитет се залага за подобрување на квалитетот на образованието, преку осовременување на наставните програми и на наставата и учењето, како и градење јасни стандарди при следењето и вреднувањето на сите субјекти вклучени во образовниот процес, истакна ресорниот министер Абдилаќим Адеми на научната конференција „Практичната настава на идните педагози, наставници и воспитувачи во мултикултурни средини – искуства и предизвици.

„Министерството, како матична институција се грижи за образовните политики кои го креираат образовниот простор во Република Македонија“, рече Адеми кој во четвртокот присуствуваше на меѓународната научна конференција „Практичната настава на идните педагози, наставници и воспитувачи во мултикултурни средини – искуства и предизвици“, која се одржа на Филозофскиот факултет при Универзитетот „Св. Кирил и Методиј“ во Скопје, при што истакна и дека ваква заедничка средба на практичари и научни соработници ќе даде со конструктивни искуства и идни соработки кои ќе придонесат кон натамошно унапредување на релевантните образовни политики.

„Во таа смисла, нашето Министерство во континуитет се залага за подобрување на квалитетот на образованието, преку осовременување на наставните програми, континуирана обука на наставниот кадар, осовременување на наставата и учењето, градење јасни стандарди при следењето и вреднувањето на сите субјекти вклучени во образовниот процес, како и овозможување личен, професионален и кариерен развој на секој поединец во образованието“, напомна министерот Адеми

Додаде дека станува збор за систематски и организирани практики, со релативно посовремен датум, со кои во најгенерални рамки македонското образование во ôд се приближува кон европскиот образовен простор.

„Евидентно е дека воведувањето и имплементацијата на бројните промени, европски програми и иницијативи се насочени кон осовременување на македонскиот образовен систем, во смисла на следење н асовремените развојни тенденции во образованието во Европа, како и зајакнување на институционалните капацитети во сферата на образовните политики“, заклучи Адеми

Според него, надминувањето на рецидивите од минатото и имплементацијата на меѓународно признатите норми и стандарди во високото образование, ќе останат да бидат императив во делувањето на Министерството за образование и наука.

„Само на тој начин високото образование во целост ќе ја остварува својата мисија на национално и интернационално ниво“, изјави Адеми.

Во таа смисла, додаде, Министерството дава континуирана поддршка на високообразовните институции, особено на Филозофските и на Педагошките факултети во насока на обезбедување предуслови за зајакнување на стручните компетенции на студентите преку создавање услови за реализирање на практичната настава во средини од различен карактер, во рурални-урбани, централни и подрачни училишта, мултикултурни и мултиетнички средини.

„Мисијата на ОБСЕ во Скопје и Министерството за образование и наука, се долгогодишни партнери во делот на креирање на образовни политики насочени кон интегрирано образование. Посебно ме радува што овие напори на Мисијата на ОБСЕ во Скопје имаат свое продолжение и се рефлектираат во соработката со филозофските и педагошките факултети и со Македонскиот центар за граѓанско образование кои, исто така, се наши големи пријатели и промотори на активности насочени кон интеграција во образовниот систем“, додаде Адеми

Напомнува, исто така, и дека сите студенти, посебно идните педагози, наставници и воспитувачи, треба да се оспособат да ја разберат нашата мултиетничка и мултикултурна реалност и да стекнат вештини за идентификување, анализирање и успешно справување со најразлични ситуации кои произлегуваат од таа реалност./крај/мф/сн

Извор: Макфакс